ตตฺถ อมฺพปกฺกนฺติ มธุรอมฺพผลํ ฯ อุทกํ สีตนฺติ คงฺคาย อุทกํ สีตลํ ฯ เอตํ ภุตฺวาติ พฺราหฺมณ เอตํ อมฺพผลํ ปริภุญฺชิตฺวา สีตลํ อุทกํ ปิวิตฺวา ยถารุจิเต รมณีเย รุกฺขมูเล นิสินฺโน สมณธมฺมํ กโรนฺโต อิมสฺมึ วนสณฺเฑ วสาติ ฯ

พฺราหฺมโณ ปเคว ตาว โหตุ ปจฺฉา ชานิสฺสามีติ สสปณฺฑิตสฺส สนฺติกํ คโต เตนาปิ กิมตฺถมาคโตสีติ วุตฺเต ตเถวาห ฯ ตํ สุตฺวา โพธิสตฺโต โสมนสฺสปฺปตฺโต พฺราหฺมณ สุฏฺฐุ เต กตํ อาหารตฺถาย มม สนฺติกํ อาคจฺฉนฺเตน อชฺชาหํ มยา อทินฺนปุพฺพํ ทานํ ทสฺสามิ ตฺวํ ปน สีลวา ปาณาติปาตํ น กริสฺสสิ คจฺฉ นานาทารูนิ สงฺกฑฺฒิตฺวา องฺคาเร กตฺวา มยฺหํ อาโรเจหิ อหํ อตฺตานํ ปริจฺจชิตฺวา องฺคารมชฺเฌ ปติสฺสามิ มม สรีเร ปกฺเก ตฺวํ มํสํ ขาทิตฺวา สมณธมฺมํ กเรยฺยาสีติ เตน สทฺธึ สลฺลปนฺโต จตุตฺถํ คาถมาห

น สสสฺส ติลํ อตฺถิ น มุคฺคา นปิ ตณฺฑุลา

อิมินา อคฺคินา ปกฺกํ มมํ ภุตฺวา วเน วสาติ ฯ