ตตฺถ มมํ ภุตฺวาติ ยนฺตํ อหํ อคฺคึ กโรหีติ วทามิ อิมินา อคฺคินา ปกฺกํ มํ ภุญฺชิตฺวา อิมสฺมึ วเน วส เอกสฺส สสสฺส สรีรนฺนาม เอกสฺส ปุริสสฺส ยาปนมตฺตํ โหตีติ ฯ

สกฺโก ตสฺส กถํ สุตฺวา อตฺตโน อานุภาเวน เอกํ องฺคารราสึ มาเปตฺวา โพธิสตฺตสฺส อาโรเจสิ ฯ โส ทพฺพติณสยนโต อุฏฺฐาย ตตฺถ คนฺตฺวา สเจ เม โลมนฺตเรสุ ปาณกา อตฺถิ เต มา มรึสูติ ติกฺขตฺตุํ สรีรํ วิธูนิตฺวา สกลสรีรํ ทานมุเข ทตฺวา ลงฺฆิตฺวา ปทุมปุญฺเช ราชหํโส วิย ปมุทิตจิตฺโต องฺคารราสิมฺหิ ปตติ ฯ โส ปน อคฺคิ โพธิสตฺตสฺส สรีเร โลมกูปมตฺตมฺปิ อุณฺหํ กาตุํ นาสกฺขิ ฯ หิมคพฺเภ ปวิฏฺโฐ วิย อโหสิ ฯ อถ สกฺกํ อามนฺเตตฺวา พฺราหฺมณ ตยา กโต อคฺคิ อติสีตโล มม สรีเร โลมกูปมตฺตมฺปิ อุณฺหํ กาตุํ น สกฺโกติ กินฺนาเมตนฺติ อาห ฯ ปณฺฑิต นาหํ พฺราหฺมโณ สกฺโกหมสฺมิ ตว วีมํสนตฺถํ อาคโตสฺมีติ ฯ สกฺก ตฺวํ ตาว ติฏฺฐ สกโลปิ เจ โลกสนฺนิวาโส มํ ทาเนน วีมํเสยฺย เนว เม อทาตุกามตฺตํ ปสฺเสยฺยาติ โพธิสตฺโต สีหนาทํ นทิ ฯ อถ นํ สกฺโก สสปณฺฑิต ตว คุโณ สกลกปฺปํ ปากโฏ โหตูติ ปพฺพตํ ปีเฬตฺวา ปพฺพตรสมาทาย จนฺทมณฺฑเล สสลกฺขณํ ลิขิตฺวา โพธิสตฺตํ อาเนตฺวา ตสฺมึ วนสณฺเฑ ตสฺมึเยว วนคุมฺเพ ตรุณทพฺพติณปิฏฺเฐ นิปชฺชาเปตฺวา อตฺตโน เทวโลกเมว คโต ฯ เตปิ จตฺตาโร ปณฺฑิตา สมคฺคา สมฺโมทมานา สีลํ ปูเรตฺวา อุโปสถกมฺมํ กตฺวา ยถากมฺมํ คตา ฯ

สตฺถา อิมํ ธมฺมเทสนํ อาหริตฺวา สจฺจานิ ปกาเสตฺวา ชาตกํ สโมธาเนสิ ฯ สจฺจปริโยสาเน สพฺพปริกฺขารทายโก คหปติ โสตาปตฺติผเล ปติฏฺฐหิ ฯ ตทา อุทฺโท อานนฺโท อโหสิ ฯ สิคาโล โมคฺคลฺลาโน ฯ มกฺกโฏ สารีปุตฺโต ฯ สกฺโก อนุรุทฺโธ ฯ สสปณฺฑิโต ปน อหเมวาติ ฯ

สสปณฺฑิตชาตกํ ฉฏฺฐํ