ลคฺคิตฺวา สีเส อิฏฺฐกจุณฺณํ โอกีริตฺวา จตุกฺเก จตุกฺเก กสาหิ ตํ โปเถนฺโต ๑- ขรสฺสเรน ปณเวน อาฆาตนํ เนติ ฯ อิมสฺมึ กิร นคเร วิโลปการโก โจโร คหิโตติ สกลนครํ สงฺขุภิ ฯ ตทา พาราณสิยํ สหสฺสํ คณฺหนฺตี สามา นาม คณิกา โหติ ราชพลฺลภา ปญฺจสตวณฺณทาสีปริวารา ปาสาทตเล วาตปานํ วิวริตฺวา ฐิตา ตํ นิยฺยมานํ ปสฺสิ ฯ โส ปน อภิรูโป ปาสาทิโก อติวิย โสภคฺคปฺปตฺโต เทววณฺโณ สพฺเพสํ มตฺถกมตฺถเกน ปญฺญายติ ฯ สามา ตํ ทิสฺวา ปฏิพทฺธจิตฺตา หุตฺวา เกน นุโข อุปาเยนาหํ อิมํ ปุริสํ อตฺตโน สามิกํ กเรยฺยนฺติ จินฺตยนฺตี อตฺเถโก อุปาโยติ ญตฺวา อตฺตโน อตฺถการิกาย เอกิสฺสา หตฺเถ นครคุตฺติกสฺส สหสฺสํ เปเสสิ อยํ โจโร สามาย ภาตา อญฺญตฺร สามาย อญฺโญ เอตสฺส นิสฺสโย นตฺถิ ตุมฺเห กิร อิทํ สหสฺสํ คเหตฺวา เอตํ วิสชฺเชถาติ ฯ สา ตถา อกาสิ ฯ นครคุตฺติโก อยํ โจโร ปากโฏ น สกฺกา เอตํ วิสชฺเชตุํ อญฺญํ ปน มนุสฺสํ ลภิตฺวา อิมํ ปฏิจฺฉนฺนยานเก นิสีทาเปตฺวา เปเสตุํ สกฺโกมีติ อาห ฯ สา คนฺตฺวา ตสฺสา อาโรเจสิ ฯ ตทา ปเนโก เสฏฺฐิปุตฺโต สามาย ปฏิพทฺธจิตฺโต เทวสิกํ สหสฺสํ เทติ ฯ โส ตํทิวสมฺปิ สูริยตฺถงฺคมนเวลาย สหสฺสํ คณฺหิตฺวา ตํ ฆรํ อคมาสิ ฯ สามาปิ สหสฺสภณฺฑิกํ คเหตฺวา อูรูสุ ฐเปตฺวา โรทนฺตี นิสินฺนา โภติ กึ เอตนฺติ วุตฺเต สามิ อยํ โจโร มม ภาตา อหํ

นีจํ กมฺมํ กโรมีติ มยฺหํ สนฺติกํ น เอติ นครคุตฺติกสฺส ปหิเต สหสฺสํ ลภมาโน วิสชฺเชสฺสามีติ สาสนํ เปเสสิ อิทานิ อิมํ สหสฺสํ อาทาย นครคุตฺติกสฺส สนฺติกํ คนฺตุํ น ลภามีติ ฯ โส ตสฺสา ปฏิพทฺธจิตฺตตาย อหํ คมิสฺสามีติ อาห ฯ เตนหิ ตยา อาภตเมว คเหตฺวา คจฺฉาหีติ ฯ โส ตํ คเหตฺวา นครคุตฺติกสฺส เคหํ คจฺฉติ ฯ โส ตํ เสฏฺฐิปุตฺตํ ปฏิจฺฉนฺนฏฺฐาเน ฐเปตฺวา โจรํ ปฏิจฺฉนฺนยาเน นิสีทาเปตฺวา สามาย ปหิณิตฺวา อยํ โจโร รฏฺเฐ ปากโฏ สมนฺธการํ ตาว โหตุ อถ นํ มนุสฺสานํ ปฏิสลฺลีนเวลาย ฆาตาเปสฺสามาติ อปเทสํ กตฺวา มุหุตฺตํ วีตินาเมตฺวา มนุสฺเสสุ ปฏิสลฺลีเนสุ เสฏฺฐิปุตฺตํ มหนฺเตนารกฺเขน อาฆาตนํ เนตฺวา อสินา สีสํ ฉินฺทิตฺวา สรีรํ สูเล อาโรเปตฺวา นครํ ปาวิสิ ฯ ตโต ปฏฺฐาย สามา อญฺเญสํ หตฺถโต กิญฺจิ น คณฺหาติ เตเนว สทฺธึ อภิรมมานา วิจรติ ฯ โส จินฺเตสิ สเจ อยํ อญฺญสฺมึ ปฏิพทฺธจิตฺตา ภวิสฺสติ มมฺปิ มาราเปตฺวา เตเนว สทฺธึ อภิรมิสฺสติ อจฺจนฺตํ มิตฺตทุพฺภินี เอสา มยา อิธ อวสิตฺวา ขิปฺปํ ปลายิตุํ วฏฺฏติ คจฺฉนฺโต ปน ตุจฺฉหตฺโถ อคนฺตฺวา เอติสฺสา อาภรณภณฺฑิกํ คเหตฺวา คจฺฉิสฺสามีติ จินฺเตตฺวา เอกทิวสํ ตํ อาห ภทฺเท มยํ ปญฺชเร ฐิตา กุกฺกุฏา วิย นิจฺจํ ฆเรเยว โหม เอกทิวสํ อุยฺยานกีฬํ กีฬิสฺสามาติ ฯ สา สาธูติ สมฺปฏิจฺฉิตฺวา ขาทนียโภชนียาทึ สพฺพํ ปฏิยาเทตฺวา สพฺพาภรณปฏิมณฺฑิตา เตน สทฺธึ ปฏิจฺฉนฺนยาเน นิสีทิตฺวา อุยฺยานํ อคมาสิ ฯ โส ตตฺถ ตาย สทฺธึ กีฬนฺโต อิทานิ มยฺหํ ปลายิตุํ วฏฺฏตีติ ตาย สทฺธึ กิเลสรติยา รมิตุกาโม วิย เอกํ กณวีรคจฺฉนฺตรํ ปวิสิตฺวา ตํ อาลิงฺคนฺโต วิย นิปฺปีเฬตฺวา วิสญฺญึ กตฺวา ปาเตตฺวา สพฺพาภรณานิ โอมุญฺจิตฺวา ตสฺสาเยว อุตฺตราสงฺเคน พนฺธิตฺวา ภณฺฑิกํ ขนฺเธ ฐเปตฺวา อุยฺยานวตึ ลงฺฆิตฺวา ปกฺกามิ ฯ สาปิ ปฏิลทฺธสญฺญา อุฏฺฐาย ปริจาริกานํ สนฺติกํ อาคนฺตฺวา อยฺยปุตฺโต กหนฺติ ปุจฺฉิ ฯ น ชานาม อยฺเยติ ฯ มํ มตาติ สญฺญาย ภายิตฺวา ปลาโต ภวิสฺสตีติ อนตฺตมนา หุตฺวา ตโตเยว เคหํ คนฺตฺวา มม ปิยสามิกสฺส อทิฏฺฐกาลโตว อลงฺกตสยเน น สยิสฺสามีติ ภูมิยํ นิปชฺชิ ฯ ตโต ปฏฺฐาย มนาปํ สาฏกํ น นิวาเสติ เทฺว ภตฺตานิ น ภุญฺชติ คนฺธมาลาทีนิ น ปฏิเสวติ ฯ เยนเกนจิ อุปาเยน อยฺยปุตฺตํ ปริเยเสตฺวา ปกฺโกสาเปสฺสามีติ นฏเก ปกฺโกสาเปตฺวา สหสฺสํ อทาสิ ฯ กึ กโรม อยฺเยติ วุตฺเต ตุมฺหากํ อคมนฏฺฐานํ นาม นตฺถิ ตุมฺเห คามนิคมราชธานิโย จรนฺตา สมชฺชํ กตฺวา สมชฺชมณฺฑเล ปฐมเมว อิมํ คีตํ คาเยยฺยาถาติ นเฏ สิกฺขาเปนฺตี ปฐมํ คาถํ วตฺวา ตุมฺเหหิ อิมสฺมึ คีตเก คีเต สเจ อยฺยปุตฺโต ตสฺมึ ปริสพฺภนฺตเร ภวิสฺสติ ตุมฺเหหิ สทฺธึ กเถสฺสติ อถสฺส มม อโรคภาวํ วตฺวา ตํ อาทาย อาคจฺเฉยฺยาถ โน เจ อาคจฺฉติ สาสนํ เปเสยฺยาถาติ ปริพฺพยํ ทตฺวา นเฏ อุยฺโยเชสิ ฯ เต พาราณสิโต นิกฺขมิตฺวา ตตฺถ ตตฺถ สมชฺชํ กโรนฺตา เอกํ ปจฺจนฺตคามํ อคมึสุ ฯ โสปิ โจโร ปลายิตฺวา ตตฺถ วสติ ฯ เต ตตฺถ สมชฺชํ กโรนฺตา ปฐมเมว อิมํ คีตกํ คายึสุ