อตีเต พาราณสิยํ พฺรหฺมทตฺเต รชฺชํ กาเรนฺเต โพธิสตฺโต ตสฺส สพฺพกิจฺจการโก อมจฺโจ อโหสิ ฯ อเถกทิวสํ ราชา ราชปุตฺตํ ๑- อุปฏฺฐานํ อาคจฺฉนฺตํ ทิสฺวา อยํ มม อนฺตเร ทุพฺเภยฺยาติ ตํ ปกฺโกสาเปตฺวา ตาต ยาวาหํ ชีวามิ ตาว นคเร วสิตุํ น ลจฺฉสิ อญฺญตฺถ วสิตฺวา มมจฺจเยน รชฺชํ กาเรหีติ อาห ฯ โส สาธูติ ปิตรํ วนฺทิตฺวา เชฏฺฐภริยาย สทฺธึ นครา นิกฺขมิตฺวา ปจฺจนฺตํ คนฺตฺวา อรญฺเญ ปณฺณสาลํ มาเปตฺวา วนมูลผลาผเลน ยาเปนฺโต วิหาสิ ฯ อปรภาเค ราชา กาลมกาสิ ฯ อุปราชา นกฺขตฺตํ โอโลเกนฺโต ตสฺส กาลกตภาวํ ญตฺวา พาราณสึ อาคจฺฉนฺโต อนฺตรามคฺเค เอกํ ปพฺพตํ อทฺทส ฯ อถ นํ ภริยา อาห สเจ เทว อยํ ปพฺพโต สุวณฺณมโย อสฺส ทเทยฺยาสิ เม กิญฺจีติ ฯ กาสิ ตฺวํ กิญฺจิ น ทสฺสามีติ ฯ สา อหํ อิมสฺมึ สิเนเหน จชิตุํ อสกฺโกนฺตี อรญฺญํ ปาวิสึ อยญฺจ เอวํ วเทติ อติวิย ถทฺธหทโย ราชา หุตฺวา เอส มยฺหํ กลฺยาณํ น กริสฺสตีติ อนตฺตมนา อโหสิ ฯ โส อาคนฺตฺวา รชฺเช ปติฏฺฐิโต ตํ อคฺคมเหสิฏฺฐาเน ฐเปสิ อิทํ ยสมตฺตกเมวาทาสิ ฯ

อุตฺตรึ ปน สกฺการสมฺมาโน นตฺถิ ฯ ตสฺสา อตฺถิภาวมฺปิ น ชานาติ ฯ โพธิสตฺโต อยํ เทวี อิมสฺส รญฺโญ อุปการิกา ทุกฺขํ อคเณตฺวา อรญฺญวาสํ วสิ อยํ ปเนตํ อคเณตฺวา อญฺญาหิ สทฺธึ อภิรมนฺโต วิจรติ ยถา เอสา สพฺพิสฺสริยํ ลภติ ตถา กริสฺสามีติ จินฺเตตฺวา เอกทิวสํ ตํ อุปสงฺกมิตฺวา มหาเทวิ มยํ ตุมฺหากํ สนฺติกา ปิณฺฑมตฺตมฺปิ น ลภาม กสฺมา อมฺเหสุ ปมชฺชิตฺถ อติวิย ถทฺธหทยาติ อาห ฯ สา เทวี ตาต สจาหํ อตฺตนา ลเภยฺยํ ตุยฺหมฺปิ ทเทยฺยํ อลภมานา ปน กึ ทสฺสามิ ราชาปิ มยฺหํ อิทานิ กินฺนาม ทสฺสติ ตาต โส อนฺตรามคฺเค อิมสฺมึ ปพฺพเต สุวณฺณมเย ชาเต มยฺหํ กิญฺจิ ทสฺสสีติ วุตฺเต กาสิ ตฺวํ น กิญฺจิ ทสฺสามีติ อาห สุปริจฺจชมฺปิ น ปริจฺจชีติ ฯ กึ ปน รญฺโญ สนฺติเก อิมํ กถํ กเถตุํ สกฺขิสฺสถาติ ฯ กึ น สกฺขิสฺสามิ ตาตาติ ฯ เตนหิ รญฺโญ สนฺติเก ฐิโต ปุจฺฉิสฺสามิ ตุมฺเห กเถยฺยาถาติ ฯ สาธุ ตาตาติ ฯ โพธิสตฺโต เทวิยา รญฺโญ อุปฏฺฐานํ คนฺตฺวา ฐิตกาเล อาห นนุ อยฺเย มยํ ตุมฺหากํ สนฺติกา กิญฺจิปิ น ลภามาติ ฯ ตาต อหํ ลภมานา ตุยฺหํ ทเทยฺยํ อหเมว กิญฺจิ น ลภามิ ราชาปิ อิทานิ มยฺหํ กินฺนาม ทสฺสติ โส หิ อรญฺญโต อาคมนกาเล เอกํ ปพฺพตํ ทิสฺวา สจายํ ปพฺพโต สุวณฺณมโย อสฺส กิญฺจิ เม ทเทยฺยาสีติ วุตฺเต กาสิ ตฺวํ น กิญฺจิ ทสฺสามีติ วทติ สุปริจฺจชมฺปิ น ปริจฺจชีติ เอตมตฺถํ ทีเปนฺตี ปฐมํ คาถมาห