เอวํ รญฺโญ คุณกถํ กถยมานาย เทวิยา (ตํ) สุตฺวา โพธิสตฺโต ตสฺส คุณํ ปกาเสนฺโต จตุตฺถํ คาถมาห

ยา ทลิทฺที ทลิทฺทสฺส อฑฺฒา อฑฺฒสฺส กิตฺติมา

สา หิสฺส ปรมา ภริยา สหิรญฺญสฺส อิตฺถิโยติ ฯ

ตตฺถ กิตฺติมาติ กิตฺติสมฺปนฺนาติ อตฺโถ ฯ สา หิสฺส ปรมาติ ยา ทลิทฺทสฺส สามิกสฺส ทลิทฺทกาเล สยมฺปิ ทลิทฺที หุตฺวา ตํ น ปริจฺจชิ ฯ อฑฺฒสฺสาติ อฑฺฒกาเล อฑฺฒา หุตฺวา สามิกเมว อนุวตฺตติ สมานสุขทุกฺขาว โหติ สา หิ อสฺส ปรมา อุตฺตมา ภริยา นาม ฯ สหิรญฺญสฺสาติ สหิรญฺญสฺส ปน อิสฺสริเย ฐิตสฺส อิตฺถิโย โหนฺติเยว อนจฺฉริยเมวาติ ฯ