เวลุวรุกฺขมูเล เอกสฺส ตาลคจฺฉสฺส เหฏฺฐาวสติ ฯ โส เอกทิวสํ โคจรมาทาย อาคนฺตฺวา ตาลปณฺณสฺส เหฏฺฐา นิปนฺโน จินฺเตสิ สเจ อยํ ปฐวี สํวฏฺเฏยฺย กหํ นุโข คมิสฺสามีติ ฯ ตสฺมึเยว ขเณ เอกํ เวลุวปกฺกํ ตาลปณฺณสฺส อุปริ ปตติ ฯ โส ตสฺส สทฺเทน อทฺธา ปฐวี สํวฏฺฏตีติ อุปฺปติตฺวา ปจฺฉโต อโนโลเกนฺโตว ปลายิ ฯ ตํ มรณภยภีตํ เวเคน ปลายนฺตํ อญฺโญ สสโก ทิสฺวา ปุจฺฉิ กึ โภ อติวิย ภีโต ปลายสีติ ฯ มา ปุจฺฉ โภติ ฯ โส กึ โภ ภีโตติ ปจฺฉโต ธาวเตว ฯ อิตโร นิวตฺติตฺวา อโนโลเกนฺโตว เอตฺถ ปฐวี สํวฏฺฏตีติ อาห ฯ โสปิ ตสฺส ปจฺฉโต ปลายิเยว ฯ เอวํ ตมญฺโญ อทฺทส ตมญฺโญติ เอวํ สสกสหสฺสานิ เอกโต หุตฺวา ปลายึสุ ฯ เต เอโกปิ มิโค ทิสฺวา เอกโต หุตฺวา ปลายิ ฯ เอโก สูกโร เอโก โคกณฺโณ เอโก มหิโส เอโก ควโย เอโก ขคฺโค เอโก พฺยคฺโฆ เอโก สีโห เอโก วารโณ ทิสฺวา กิเมตนฺติ วตฺวา เอตฺถ ปฐวี สํวฏฺฏตีติ วุตฺเต ปลายิ ฯ เอวํ อนุกฺกเมน โยชนมตฺตํ ติรจฺฉานพลํ อโหสิ ฯ ตทา โพธิสตฺโต ตํ พลํ ปลายนฺตํ ทิสฺวา กิเมตนฺติ ปุจฺฉิตฺวา เอตฺถ ปฐวี สํวฏฺฏตีติ สุตฺวา จินฺเตสิ ปฐวีสํวฏฺฏนํ นาม น กทาจิ อตฺถิ อทฺธา เตสํ กิญฺจิ ทสฺสนํ ๑- ภวิสฺสติ มยิ โข ปน อุสฺสุกฺกํ นาปชฺชนฺเต สพฺเพ นสฺสนฺติ ชีวิตํ เนสํ ทสฺสามีติ ฯ สีหเวเคน ปุรโต ปพฺพตปาทํ คนฺตฺวา

ตตฺถ ติกฺขตฺตุํ สีหนาทํ นทิ ฯ เต สีหภยตชฺชิตา กินฺติ นิวตฺติตฺวา ปิณฺฑิกา อฏฺฐํสุ ฯ สีโห เตสํ อนฺตรํ ปวิสิตฺวา กิมตฺถํ ปลายถาติ ปุจฺฉิ ฯ ปฐวี สํวฏฺฏตีติ ฯ เกน สํวฏฺฏมานา ทิฏฺฐาติ ฯ หตฺถี ชานนฺตีติ ฯ หตฺถึ ปุจฺฉิ ฯ เต มยํ น ชานาม สีหา ชานนฺตีติ วทึสุ ฯ สีหาปิ น ชานาม พฺยคฺฆา ชานนฺตีติ ฯ พฺยคฺฆาปิ มยํ น ชานาม ขคฺคา ชานนฺตีติ ฯ ขคฺคาปิ ควยา ชานนฺตีติ ฯ ควยาปิ มหิสา ชานนฺตีติ ฯ มหิสาปิ โคกณฺณา ชานนฺตีติ ฯ โคกณฺณาปิ สูกรา ชานนฺตีติ ฯ สูกราปิ มิคา ชานนฺตีติ ฯ มิคาปิ มยํ น ชานาม สสกา ชานิสฺสนฺตีติ ฯ สสเกสุ ปุจฺฉิยมาเนสุ อยํ กเถตีติ ตํ สสกํ ทสฺเสสุํ ฯ อถ นํ เอวํ กิร สมฺม ปสฺสสิ ปฐวี สํวฏฺฏตีติ ปุจฺฉิ ฯ อาม สามิ มยา ทิฏฺฐาติ ฯ กตฺถ วสนฺโต ปสฺสสีติ ปุจฺฉิ ฯ ปจฺฉิมสมุทฺทสมีเป เวลุวมิสฺสกตาลวเน วสามิ อหญฺหิ ตตฺถ เวลุวรุกฺขมูเล ตาลคจฺเฉ ตาลปณฺณสฺส เหฏฺฐา นิปนฺโน จินฺเตสึ สเจ ปฐวี สํวฏฺฏติ กหํ คมิสฺสามีติ อถ ตํขณญฺเญว ปฐวิยา สํวฏฺฏนสทฺทํ สุตฺวา ปลาโตมฺหีติ ฯ สีโห จินฺเตสิ อทฺธา ตสฺส ตาลปณฺณสฺส อุปริ เวลุวปกฺกํ ปติตฺวา ททฺธภายนสทฺทมกาสิ สฺวายํ ตํ สทฺทํ สุตฺวา ปฐวี สํวฏฺฏตีติ สญฺญํ อุปฺปาเทตฺวา ปลายิ ตตฺตโต ชานิสฺสามีติ ฯ โส ตํ สสกํ คเหตฺวา มหาชนํ อสฺสาเสตฺวา อหํ อิมินา ทิฏฺฐฏฺฐาเน ปฐวิยา สํวฏฺฏนํวา อสํวฏฺฏนํ วา ตตฺตโต ญตฺวา อาคมิสฺสามิ ยาว มมาคมนา ตุมฺเห อิเธว โหถาติ สสกํ ปิฏุฐิยํ อาโรเปตฺวา สีหเวเคน ปกฺขนฺทิตฺวา ตาลวเน สสกํ โอตาเรตฺวา เอหิ ตยา ทิฏฺฐฏฺฐานํ ทสฺเสหีติ อาห ฯ น วิสหามิ สามีติ ฯ เอหิ มา ภายีติ ฯ โส เวลุวรุกฺขํ อุปสงฺกมิตุํ อสกฺโกนฺโต อวิทูเร ฐตฺวา อิทํ สามิ ททฺธภายนฏฺฐานนฺติ วตฺวา ปฐมํ คาถมาห