ททฺธภายติ ภทฺทนฺเต ยสฺมึ เทเส วสามหํ

อหเมตํ น ชานามิ กิเมตํ ททฺธภายตีติ ฯ

ตตฺถ ททฺธภายตีติ ททฺธภาติ สทฺทํ กโรติ ฯ ภทฺทนฺเตติ ภทฺทํ ตว อตฺถุ ฯ กิเมตนฺติ ยสฺมึ ปเทเส อหํ วสามิ ตตฺถ ททฺธภายติ อหมฺปิ น ชานามิ กึ วา เอตํ ททฺธภายติ เกน วา การเณน ททฺธภายติ เกพลํ ททฺธภายนสทฺทํ อสฺโสสนฺติ ฯ

เอวํ วุตฺเต สีโห เวลุวรุกฺขมูลํ คนฺตฺวา ตาลปณฺณสฺส เหฏฺฐา สสกนิปนฺนฏฺฐานญฺเจว ตาลปณฺณสฺส มตฺถเก ปติตํ เวลุวปกฺกญฺจ ทิสฺวา ปฐวิยา อสํวฏฺฏนภาวํ ตตฺตโต ชานิตฺวา สสกํ ปิฏฺฐิยํ อาโรเปตฺวา สีหเวเคน ขิปฺปํ มิคสงฺฆานํ สนฺติกํ คนฺตฺวา สพฺพํ ปวุตฺตึ อาโรเจตฺวา ตุมฺเห มา ภายถาติ มิคคณํ อสฺสาเสตฺวา วิสชฺเชสิ ฯ สเจ หิ ตทา โพธิสตฺโต น ภเวยฺย สพฺเพ สมุทฺทํ ปวิสิตฺวา สนฺเสยฺยุํ โพธิสตฺตํ ปน นิสฺสาย สพฺเพ ชีวิตํ ลภีสูติ ฯ