เย จ สีเลน สมฺปนฺนา ปญฺญายุปสเม รตา

อารกา ๒- วิรตา ธีรา น โหนฺติ ปรปตฺติยาติ อิมา ติสฺโส อภิสมฺพุทฺธคาถา ฯ

ตตฺถ เวลุวนฺติ เวลุวปกฺกํ ฯ ททฺธภนฺติ เอวํ สทฺทํ กุรุมานํ ฯ สนฺตตฺตาติ อุตฺราสา ฯ มิควาหินีติ อเนกสหสฺสสงฺขาตา มิคคณา มิคเสนา ฯ ปทวิญฺญาณนฺติ วิญฺญาณปทํ โสตวิญฺญาณโกฏฺฐาสํ อสมฺปาปุณิตฺวาติ อตฺโถ ฯ เต โหนฺติ ปรปตฺติยาติ เต ปรโฆสานุสาริโน ตเมว ปรโฆสสงฺขาตํ ปนาทํ ปรมนฺติ มญฺญมานา อนฺธพาลา ปุถุชฺชนา วิญฺญาณปทสฺส อปฺปตฺตตาย ปรปตฺติยาว โหนฺติ ปเรสํ วจนํ สทฺทหิตฺวา ยํ วา ตํ วา กโรนฺติ ฯ สีเลนาติ อริยมคฺเคน อาคตสีเลน สมนฺนาคตา ฯ ปญฺญายุปสเม รตาติ มคฺเคเนวาคตปญฺญาย กิเลสอุปสเม รตา ฯ ยถา จ สีเลน เอวํ ปญฺญายปิ สมนฺนาคตา กิเลสุปสเม รตาติปิ อตฺโถ ฯ อารกา วิรตา ธีราติ ปาปกิริยโต อารกา วิรตา ปณฺฑิตา ฯ น โหนฺตีติ เต เอวรูปา โสตาปนฺนา ปาปโต โอรตภาเวน กิเลสุปสเม อภิรตภาเวน จ เอกวารํ มคฺคญาเณน ปฏิวิทฺธธมฺมา อญฺเญสํ กเถนฺตานมฺปิ น สทฺทหนฺติ น คณฺหนฺติ ฯ กสฺมา ฯ อตฺตโน ปจฺจกฺขตฺตาติ ฯ เตน วุตฺตํ

๒ อารตา ฯ