โย ยาจนํ ปจฺจกฺขาติ ตมาหุ ปฏิโรทนํ

มํ มาทฺทสํสุ โรทนฺตํ ปญฺจาลา สุสมาคตา

ตุวํ วา ปฏิโรทนฺตํ ตสฺมา อิจฺฉามหํ รโหติ ฯ

ตตฺถ ราช พฺรหฺมทตฺตาติ ทฺวีหิปิ ราชานํ อาลปติ ฯ นิคจฺฉตีติ ปฏิลภติ วินฺทติ ฯ เอวํธมฺมาติ เอวํสภาวา ฯ อาหูติ ปณฺฑิตา กเถนฺติ ฯ ปญฺจาลานํ รเถสภาติ ปญฺจาลรฏฺฐสฺส อิสฺสร ฯ โย ยาจนํ ปจฺจกฺขาตีติ โย ปน ตํ ยาจนกํ นตฺถีติ ปฏิกฺขิปติ ฯ ตมาหูติ ตํ ปฏิกฺขิปนํ ปฏิโรทนนฺติ อาหุ กเถนฺติ ฯ มํ มาทฺทสํสูติ ตว รฏฺฐวาสิโน ปญฺจาลา สุสมาคตา อมฺหํ โรทนฺตํ มา อทฺทสํสูติ ฯ