อตีเต พาราณสิยํ พฺรหฺมทตฺเต รชฺชํ กาเรนฺเต โพธิสตฺโต พฺราหฺมณกุเล นิพฺพตฺติตฺวา วยปฺปตฺโต ตกฺกสิลายํ สพฺพสิปฺปานิ อุคฺคณฺหิตฺวา อปรภาเค ตาปสปพฺพชฺชํ ปพฺพชิตฺวา หิมวนฺเต จิรํ วสิตฺวา โลณมฺพิลเสวนตฺถาย พาราณสึ ปตฺวา ราชุยฺยาเนเยว วสิตฺวา ปุนทิวเส นครํ ภิกฺขาย ปาวิสิ ฯ ตทา พาราณสีเสฏฺฐี สทฺโธ โหติ ปสนฺโน ฯ โพธิสตฺโต กตรํ กุลฆรํ สทฺธนฺติ ปุจฺฉิตฺวา เสฏฺฐิฆรนฺติ สุตฺวา เสฏฺฐิโน ฆรทฺวารํ อคมาสิ ฯ ตสฺมึ ขเณ เสฏฺฐี ราชุปฏฺฐานํ คโต ฯ มนุสฺสาปิ นํ น ปสฺสึสุ ฯ โส นิวตฺติตฺวา คจฺฉติ ฯ อถ นํ โส เสฏฺฐี ราชกุลา นิกฺขมนฺโต ทิสฺวา วนฺทิตฺวา ภิกฺขาภาชนํ คเหตฺวา ฆรํ เนตฺวา นิสีทาเปตฺวา ปาทโธวนมกฺขนยาคุขชฺชกาทีหิ สนฺตปฺเปตฺวา อนฺตราภตฺเต กิญฺจิ การณํ อปุจฺฉิตฺวา ๑- กตภตฺตกิจฺจํ วนฺทิตฺวา เอกมนฺตํ นิสินฺโน ภนฺเต อมฺหากํ ฆรทฺวารํ อาคตา นาม ยาจกา วา ธมฺมิกสมณพฺราหฺมณา วา สกฺการสมฺมานํ อลภิตฺวา คตปุพฺพา นาม นตฺถิ ตุมฺเห ปน อชฺช อมฺหากํ ทารเกหิ อทิฏฺฐตฺตา อาสนํ วา ปานียํ วา ปาทโธวนํ วา ยาคุภตฺตํ วา อลภิตฺวาว คตา อยํ อมฺหากํ โทโส ตํ โน ขมิตุํ วฏฺฏตีติ วตฺวา ปฐมํ คาถมาห

น เต ปีฐมทายิมฺหา น ปานํ นปิ โภชนํ

พฺรหฺมจารี ขมสฺสุ เม เอวํ ปสฺสาม อจฺจยนฺติ ฯ

ตตฺถ น เต ปีฐมทายิมฺหาติ ปีฐมฺปิ เต น ทาปยิมฺหา ฯ