ตตฺถ ธมฺโมติ สภาโว ฯ ปิตุปิตามโหติ ปิตูนญฺจ ปิตามหานญฺจ สนฺตโก ฯ อุทกนฺติ ปาทโธวนอุทกํ ฯ มชฺชนฺติ ปาทมกฺขนํ เตลํ ฯ สพฺเพตนฺติ สพฺพํ เอตํ ฯ นิปทามเสติ นิปการา อุปสคฺคา ฯ ทามเสติ อตฺโถ ฯ ททามาติ วุตฺตํ โหติ ฯ อิมินา ยาว สตฺตมา กุลปริวฏฺฏา ทายกวํโส อมฺหากํ วํโสติ ทสฺเสติ ฯ อุตฺตมํ วิย ญาตกนฺติ มาตรํ วิย ปิตรํ วิย จ มยํ ธมฺมิกํ สมณํ วา พฺราหฺมณํ วา ทิสฺวา สกฺกจฺจํ สหตฺเถน อุปฏฺฐหามาติ อตฺโถ ฯ

โพธิสตฺโต ปน กติปาหํ พาราณสีเสฏฺฐิโน ธมฺมํ เทเสนฺโต ตตฺถ วสิตฺวา ปุน หิมวนฺตเมว คนฺตฺวา อภิญฺญา จ สมาปตฺติโย จ นิพฺพตฺเตสิ ฯ

สตฺถา อิมํ ธมฺมเทสนํ อาหริตฺวา สจฺจานิ ปกาเสตฺวา ชาตกํ สโมธาเนสิ ฯ สจฺจปริโยสาเน โส ภิกฺขุ โสตาปตฺติผเล ปติฏฺฐหิ ฯ ตทา พาราณสีเสฏฺฐี อานนฺโท อโหสิ ฯ ตาปโส ปน อหเมวาติ ฯ

ปีฐชาตกํ สตฺตมํ