ตํ สุตฺวา กุนฺตินี ตติยํ คาถมาห

น กตสฺส จ กตฺตา จ มิตฺติ สนฺธิยเต ปุน

หทยํ นานุชานาติ คจฺฉญฺเญว รเถสภาติ ฯ

ตตฺถ น กตสฺส จ กตฺตา จาติ ปกตสฺส จ อภิภูตสฺส จ อุปฺปีฬิตสฺส ปุคฺคลสฺส อิทานิ วิภตฺติปริณามํ กตฺวา โย กตฺตา ตสฺส จาติ อิเมสํ ทฺวินฺนํ ปุคฺคลานํ ปุน มิตฺตภาโว นาม น สนฺธิยติ น ฆฏิยตีติ อตฺโถ ฯ หทยํ นานุชานาตีติ เตน การเณน มม หทยํ อิธ วาสํ นานุชานาติ ฯ คจฺฉญฺเญว รเถสภาติ ตสฺมา อหํ มหาราช คมิสฺสามิเยวาติ ฯ