โพธิสตฺตสฺส ปน มาตุกุจฺฉิมฺหิ ปฏิสนฺธิคหณกฺขเณเยว เอกปฺปหาเรเนว สกลทสสหสฺสี โลกธาตุ สงฺกมฺปิ สมฺปกมฺปิ สมฺปเวธิ ฯ ทฺวตฺตึส ปุพฺพนิมิตฺตานิ ปาตุรเหสุํ ฯ ทสสุ จกฺกวาฬสหสฺเสสุ อปฺปมาโณ โอภาโส ผริ ฯ ตสฺส ตํ สิรึ ทฏฺฐุกามา วิย อนฺธา จกฺขูนิ ปฏิลภึสุ ฯ พธิรา สทฺทํ สุณึสุ ฯ มูคา สมฺมาลปึสุ ฯ ขุชฺชา อุชุคตฺตา อเหสุํ ฯ ปงฺคุลา ปทสา คมนํ ปฏิลภึสุ ฯ พนฺธนคตา สพฺพสตฺตา อนฺทุพนฺธนาทีหิ มุจฺจึสุ ฯ สพฺพนรเกสุ อคฺคิ นิพฺพายิ ฯ ปิตฺติวิสเย ขุปฺปิปาสา วูปสมึสุ ฯ ติรจฺฉานคตานํ ภยํ นาโหสิ ฯ สพฺพสตฺตานํ โรโค เจว ราคาทิกิเลสคฺคิ จ วูปสมึสุ ฯ สพฺพสตฺตา ปิยวาจา อเหสุํ ฯ มธุเรนากาเรน อสฺสา หสึสุ วารณา คชฺชึสุ ฯ สพฺพตุริยานิ สกสกนินฺนาทํ มุญฺจึสุ อฆฏฺฏิตานิเยว ฯ มนุสฺสานํ หตฺถูปคานิ อาภรณานิ วิรวึสุ ฯ สพฺพา ทิสา วิปฺปสนฺนา อเหสุํ ฯ สตฺตานํ สุขํ อุปฺปาทยมาโน มุทุ สีตโล วาโต ปวายิ ฯ อกาลเมโฆ ปวสฺสิ ฯ ปฐวิโตปิ อุทกํ อุพฺภิชฺชิตฺวาปิ สนฺทติ ฯ ปกฺขิโน อากาสคมนํปิ วิชหึสุ ฯ นทิโย อสนฺทมานา อฏฺฐํสุ ฯ มหาสมุทฺเท มธุรํ อุทกํ อโหสิ ฯ สพฺพตฺถกเมว ปญฺจวณฺเณหิ ปทุเมหิ สญฺฉนฺนํ ตลํ อโหสิ ฯ ถลชชลชาทีนิ สพฺพปุปฺผานิ ปุปฺผึสุ ฯ รุกฺขานํ ขนฺเธสุ ขนฺธปทุมานิ สาขาสุ สาขปทุมานิ ลตาสุ ลตาปทุมานิ ปุปฺผึสุ ฯ ถเล สิลาตลานิ ภินฺทิตฺวา อุปรุปริ สตฺต สตฺต หุตฺวา ทณฺฑปทุมานิ นาม นิกฺขมึสุ ฯ อากาเส โอลมฺพิตปทุมานิ นิพฺพตฺตึสุ ฯ สมนฺตโต ปุปฺผวสฺสํ วสฺสิ ฯ อากาเส ทิพฺพตุริยานิ วชฺชึสุ ฯ สกลทสสหสฺสี โลกธาตุ วฏฺเฏตฺวา วิสฺสฏฺฐมาลาคุฬํ วิย อุปฺปีเฬตฺวา พนฺธมาลากลาโป วิย อลงฺกตปฏิยตฺตมาลาสยนํ วิย จ เอกมาลามาลินี วิปฺผุรนฺตวาลวีชนี ปุปฺผธูปคนฺธปริวาสิตา ปรมโสภคฺคปฺปตฺตา อโหสิ ฯ

เอวํ คหิตปฏิสนฺธิกสฺส โพธิสตฺตสฺส ปฏิสนฺธิโต ปฏฺฐาย โพธิสตฺตสฺส เจว โพธิสตฺตสฺส มาตุยา จ อุปทฺทวนิวารณตฺถํ ขคฺคหตฺถา จตฺตาโร เทวปุตฺตา อารกฺขํ คณฺหึสุ ฯ โพธิสตฺตมาตุยา ปุริเสสุ ราคจิตฺตํ นุปฺปชฺชิ ฯ ลาภคฺคยสคฺคปฺปตฺตา จ อโหสิ สุขินี อกิลนฺตกายา โพธิสตฺตญฺจ อนฺโตกุจฺฉิคตํ วิปฺปสนฺเน มณิรตเน อาวุตปณฺฑรสุตฺตํ วิย ปสฺสติ ฯ ยสฺมา โพธิสตฺเตน วสิตกุจฺฉิ นาม เจติยคพฺภสทิสา น สกฺกา โหติ อญฺเญน สตฺเตน อาวสิตุํ วา ปริภุญฺชิตุํ วา ตสฺมา โพธิสตฺตมาตา สตฺตาหชาเต โพธิสตฺเต กาลํ กตฺวา ตุสิตปุเร นิพฺพตฺติ ฯ ยถา จ อญฺญา อิตฺถิโย ทสมาเส อปฺปตฺวาปิ อติกฺกมิตฺวาปิ นิสินฺนาปิ นิปนฺนาปิ วิชายนฺติ น เอวํ โพธิสตฺตมาตา ฯ สา ปน โพธิสตฺตํ ทสมาเส กุจฺฉิยา ปริหริตฺวา ฐิตา จ วิชายติ ฯ อยญฺเจสา โพธิสตฺตมาตุ ธมฺมตา ฯ มหามายาปิ เทวี ปตฺเตน เตลํ วิย ทสมาเส กุจฺฉิยา โพธิสตฺตํ ปริหริตฺวา ปริปุณฺณคพฺภา ญาติฆรํ คนฺตุกามา สุทฺโธทนมหาราชสฺส อาโรเจสิ อิจฺฉามหํ เทว กุลสนฺตกํ เทวทหนครํ คนฺตุนฺติ ฯ ราชา สาธูติ สมฺปฏิจฺฉิตฺวา กปิลวตฺถุโต ยาว เทวทหนครา มคฺคํ สมํ กาเรตฺวา กทฺทลิปุณฺณฆฏธชปฏากาหิ อลงฺการาเปตฺวา เทวึ สุวณฺณสีวิกาย นิสีทาเปตฺวา อมจฺจสหสฺเสน อุกฺขิปาเปตฺวา มหนฺเตน ปริวาเรน เปเสสิ ฯ ทฺวินฺนํ ปน นครานํ อนฺตเร อุภยนครวาสีนํปิ ลุมฺพินิวนํ นาม มงฺคลสาลวนํ อตฺถิ ฯ ตสฺมึ สมเย มูลโต ยาว อคฺคสาขา สพฺพํ เอกผาลิผุลฺลํ อโหสิ ฯ สาขนฺตเรหิ เจว ปุปฺผนฺตเรหิ จ ปญฺจวณฺณา ภมรวณฺณา นานปฺปการา จ สกุณสงฺฆา มธุรสฺสเรน วิกูชนฺตา วิจรนฺติ ฯ สกลํ ลุมฺพินิวนํ จิตฺตลตาวนสทิสํ มหานุภาวสฺส รญฺโญ สุสชฺชิตํ อาปานตลมณฺฑลํ วิย โหติ ฯ เทวิยา ตํ ทิสฺวา สาลวนกีฬํ กีฬิตุกามตา อุทปาทิ ฯ อมจฺจา เทวึ คเหตฺวา สาลวนํ ปวิสึสุ ฯ สา มงฺคลสาลมูลํ คนฺตฺวา สาลสาขายํ คณฺหิตุกามา อโหสิ ฯ สาลสาขา สุเสทิตเวตฺตคฺคํ วิย โอนมิตฺวา เทวิยา หตฺถปถํ อุปคจฺฉิ ฯ สา หตฺถํ ปสาเรตฺวา สาขํ อคฺคเหสิ ฯ