อตีเต พาราณสิยํ พฺรหฺมทตฺเต รชฺชํ กาเรนฺเต โพธิสตฺโต พาราณสิยํ ทฺวารคามเก พฺราหฺมณกุเล นิพฺพตฺติตฺวา กุฏุมฺพํ สณฺฐเปตฺวา กสิกมฺเมน ชีวิตํ กปฺเปสิ ฯ ตสฺส ปุตฺโต จ ธีตา จาติ เทฺว ทารกา อเหสุํ ฯ โส ปุตฺตสฺส วยปฺปตฺตสฺส สมานกุลโต กุมาริกํ อาเนสิ ฯ อิติ เต ทาสิยา สทฺธึ ฉ ชนา อเหสุํ โพธิสตฺโต ภริยา ปุตฺโต ธีตา สุณิสา ทาสีติ ฯ เต สมคฺคา สมฺโมทมานา ปิยสํวาสา อเหสุํ ฯ โพธิสตฺโต เสสานํ ปญฺจนฺนํ เอวํ โอวาทํ เทติ ตุมฺเห ยถาลทฺธนิยาเมเนว ทานํ เทถ สีลํ รกฺขถ อุโปสถกมฺมํ กโรถ มรณสตึ ภาเวถ ตุมฺหากํ มรณภาวํ สลฺลกฺเขถ อิเมสํ หิ สตฺตานํ มรณํ ธุวํ ชีวิตํ อทฺธุวํ สพฺเพ สงฺขารา อนิจฺจา ขยวยธมฺมิโนว รตฺติญฺจ ทิวา จ อปฺปมตฺตา โหถาติ ฯ เต สาธูติ โอวาทํ สมฺปฏิจฺฉิตฺวา อปฺปมตฺตา มรณสตึ ภาเวนฺติ ฯ อเถกทิวสํ โพธิสตฺโต ปุตฺเตน สทฺธึ เขตฺตํ คนฺตฺวา กสติ ฯ ปุตฺโต กจวรํ สงฺกฑฺฒิตฺวา ฌาเปสิ ฯ ตสฺสาวิทูเร เอกสฺมึ วมฺมิเก อาสีวิโส อตฺถิ ฯ ธูโม ตสฺส อกฺขีนิ ปหริ ฯ โส กุทฺโธ นิกฺขมิตฺวา อิมํ นิสฺสาย มยฺหํ ภยนฺติ จตสฺโส ทาฒา นิมฺมุชฺชาเปนฺโต ตํ ฑํสิ ฯ โส มริตฺวาว ปตติ ฯ โพธิสตฺโต ปริวตฺติตฺวา ตํ ปติตํ ทิสฺวา โคเณ ฐเปตฺวา คนฺตฺวา ตสฺส มตภาวํ ญตฺวา ตํ อุกฺขิปิตฺวา เอกสฺมึ รุกฺขมูเล นิปชฺชาเปตฺวา ปารุปิตฺวา เนว โรทติ น ปริเทวติ ฯ ภิชฺชนธมฺมํ ปน ภินฺนํ มรณธมฺมํ มตํ สพฺเพ สงฺขารา อนิจฺจา มรณนิปฺผตฺติกาติ อนิจฺจภาวเมว สลฺลกฺเขตฺวา กสิ ฯ โส เขตฺตสมีเปน คจฺฉนฺตํ เอกํ ปฏิวิสฺสกํ ปุริสํ ทิสฺวา ตาต เคหํ คจฺฉสีติ ปุจฺฉิตฺวา อามาติ วุตฺเต เตนหิ อมฺหากมฺปิ ฆรํ คนฺตฺวา พฺราหฺมณึ วเทยฺยาสิ อชฺช กิร ปุพฺเพ วิย ทฺวินฺนํ ภตฺตํ อนาหริตฺวา เอกสฺเสว อาหารํ อาหเรยฺยาถ ปุพฺเพ จ เอกิกาว ทาสี อาหารํ อาหรติ อชฺช ปน จตฺตาโรปิ ชนา สุทฺธวตฺถนิวตฺถา คนฺธปุปฺผหตฺถา อาคจฺเฉยฺยาถาติ ฯ โส สาธูติ คนฺตฺวา พฺราหฺมณิยา ตเถว กเถสิ ฯ เกน เต ตาต อิทํ สาสนํ ทินฺนนฺติ ฯ พฺราหฺมเณน อยฺเยติ ฯ สา ปุตฺโต เม มโตติ อญฺญาสิ ฯ กมฺปนมตฺตมฺปิสฺสา นาโหสิ ฯ เอวํ สุภาวิตจิตฺตา สุทฺธวตฺถนิวตฺถา ปน คนฺธปุปฺผหตฺถา อาหารํ คาหาเปตฺวา เสเสหิ สทฺธึ เขตฺตํ อคมาสิ ฯ เอกสฺสปิ โรทิตํ วา ปริเทวิตํ วา นาโหสิ ฯ โพธิสตฺโต ปุตฺตสฺส นิปนฺนจฺฉายายเมว นิสีทิตฺวา ภุญฺชิ ฯ ภุตฺตาวสาเน สพฺเพปิ ทารูนิ อุทฺธริตฺวา ตํ จิตกํ อาโรเปตฺวา คนฺธปุปฺเผหิ ปูเชตฺวา ฌาเปสุํ ฯ กสฺสจิ เอกพินฺทุปิ อสฺสุ นาโหสิ ฯ สพฺเพ สุภาวิตมรณสติโน ฯ เตสํ สีลเตเชน สกฺกสฺส ภวนํ อุณฺหาการํ ทสฺเสสิ ฯ โส โก นุโข มํ ฐานา จาเวตุกาโมติ อุปธาเรนฺโต เตสํ คุณเตเชน อุณฺหภาวํ ญตฺวา ปสนฺนมานโส หุตฺวา มยา เอเตสํ สนฺติกํ คนฺตฺวา สีหนาทํ นทาเปตฺวา สีหนาทปริโยสาเน เตสํ นิเวสนํ สตฺตรตนปุณฺณํ กตฺวา อาคนฺตุํ วฏฺฏตีติ เวเคน ตตฺถ คนฺตฺวา อาฬาหนปสฺเส ฐิโต ตาต กึ กโรถาติ อาห ฯ เอกํ มนุสฺสํ ฌาเปม สามีติ ฯ น ตุมฺเห มนุสฺสํ ฌาเปสฺสถ เอกํ ปน มิคํ มาเรตฺวา ปจถ มญฺเญติ ฯ นตฺเถตํ สามิ มนุสฺสเมว ฌาเปมาติ ฯ เตนหิ เวริมนุสฺโส โว ภวิสฺสตีติ ฯ อถ นํ โพธิสตฺโต โอรสปุตฺโต โน สามิ น เวริโกติ อาห ฯ เตนหิ เต อปฺปิยปุตฺโต ภวิสฺสตีติ ฯ อติปิยปุตฺโต เม สามีติ ฯ อถ กสฺมา น โรทสีติ ฯ โส อโรทนการณํ กเถนฺโต ปฐมํ คาถมาห