เอวํ สมฺปทเมเวตํ โย เปตมนุโสจติ

ทยฺหมาโน น ชานาติ ญาตีนํ ปริเทวตํ

ตสฺมา เอตํ น โสจามิ คโต โส ตสฺส ยา คตีติ คาถาทฺวยมาห ฯ

ตสฺสตฺโถ ยถา นาม อุทกกุมฺโภ อุกฺขิปิยมาโน ปติตฺวา สตฺตธา ภินฺโน ปุน ตานิ กปาลานิ ปฏิปาฏิยา ฐเปตฺวา สนฺธิหิตฺวา ปฏิปากติกํ กาตุํ น สกฺโกติ โย เปตํ อนุโสจติ ตสฺสาปิ เอตํ อนุโสจนํ เอวํ นิปฺผตฺติกเมว โหติ มตสฺส ปุน ชีวาเปตุํ อสกฺกุเณยฺยโต อิทฺธิมโต วา อิทฺธานุภาเวน ภินฺนํ กุมฺภํ สนฺธิหิตฺวา อุทกสฺส ปูเรตุํ สกฺกา ภเวยฺย กาลกโต ปน อิทฺธิพเลนาปิ น สกฺกา ปฏิปากติกํ กาตุนฺติ ฯ อิตรา คาถา วุตฺตตฺถาเยว ฯ