เอวํ โพธิสตฺโต ตีสุ อตฺตภาเวสุ มาตุกุจฺฉิโต นิกฺขนฺตมตฺโตว วาจํ นิจฺฉาเรสิ ฯ ยถา จ ปฏิสนฺธิกฺขเณ เอวํ ชาตกฺขเณปิสฺส ทฺวตฺตึส ปุพฺพนิมิตฺตานิ ปาตุรเหสุํ ฯ ยสฺมึ ปน สมเย อมฺหากํ โพธิสตฺโต ลุมฺพินิวเน ชาโต ตสฺมึเยว สมเย ราหุลมาตา เทวี ฉนฺโน อมจฺโจ กาฬุทายิ อมจฺโจ อานนฺโท ราชกุมาโร กนฺถโก อสฺสราชา มหาโพธิรุกฺโข จตฺตาริ นิธิกุมฺภิโย จ ชาตา ฯ ตตฺถ เอกา คาวุตปฺปมาณา เอกา อฑฺฒโยชนปฺปมาณา เอกา ติคาวุตปฺปมาณา เอกา โยชนปฺปมาณา อโหสีติ อิเม สตฺต สหชาตา นาม ฯ อุภยนครวาสิโน โพธิสตฺตํ คเหตฺวา กปิลวตฺถุนครเมว อคมํสุ ฯ ตํ ทิวสํเยว กปิลวตฺถุนคเร สุทฺโธทนมหาราชสฺส ปุตฺโต ชาโต อยํ กุมาโร โพธิตเล นิสีทิตฺวา พุทฺโธ ภวิสฺสตีติ ตาวตึสภวเน หฏฺฐตุฏฺฐา เทวสงฺฆา เจลุกฺเขปาทีนิ ปวตฺเตนฺตา กีฬึสุ ฯ

ตสฺมึ สมเย สุทฺโธทนมหาราชสฺส กุลูปโก อฏฺฐสมาปตฺติลาภี กาฬเทวโล นาม ตาปโส ฯ โส ภตฺตกิจฺจํ กตฺวา ทิวาวิหารตฺถาย ตาวตึสภวนํ คนฺตฺวา ตตฺถ ทิวาวิหารํ นิสินฺโน ตา เทวตา ทิสฺวา กึการณา ตุมฺเห เอวํ ตุฏฺฐมานสา กีฬิตฺถ มยฺหเมตํ การณํ กเถถาติ ปุจฺฉิ ฯ ตํ เทวตา อาหํสุ มาริส สุทฺโธทนรญฺโญ ปุตฺโต ชาโต โส ตทา โพธิตเล นิสีทิตฺวา พุทฺโธ หุตฺวา ธมฺมจกฺกํ ปวตฺเตสฺสติ ตสฺส อนนฺตํ พุทฺธลีฬฺหํ ทฏฺฐุํ ธมฺมญฺจ โสตุํ ลจฺฉามาติ อิมินา การเณน ตุฏฺฐมฺหาติ ฯ โส ตาสํ วจนํ สุตฺวา ขิปฺปํ เทวโลกโต โอรุยฺห ราชนิเวสนํ ปวิสิตฺวา ปญฺญตฺตาสเน นิสินฺโน ปุตฺโต กิร เต มหาราช ชาโต ปสฺสิสฺสามิ นนฺติ อาห ฯ ราชา อลงฺกตปฏิยตฺตํ กุมารํ อานาเปตฺวา ตาปสํ วนฺทาเปตุํ อภิหริ ฯ โพธิสตฺตสฺส ปาทา ปริวตฺเตตฺวา ตาปสสฺส ชฏาสุ ปติฏฺฐหึสุ ฯ โพธิสตฺตสฺส หิ เตนตฺตภาเวน วนฺทิตพฺพยุตฺตโก นาม อญฺโญ ปุคฺคโล นตฺถิ ฯ สเจ อชานนฺตา โพธิสตฺตสฺส สีสํ ตาปสสฺส ปาทมูเล ฐเปยฺยุํ สตฺตธา ตสฺส มุทฺธา ผเลยฺยุํ ฯ ตาปโส น เม อตฺตานํ นาเสตุํ ยุตฺตนฺติ อุฏฺฐายาสนา โพธิสตฺตสฺส อญฺชลึ ปคฺคเหสิ ฯ ราชา ตํ อจฺฉริยํ ทิสฺวา อตฺตโน ปุตฺตํ วนฺทิ ฯ ตาปโส อตีเต จตฺตาฬีส กปฺเป อนาคเต จตฺตาฬีสาติ อสีติ กปฺเป อนุสฺสรติ โพธิสตฺตสฺส ลกฺขณสมฺปตฺตึ ทิสฺวา ภวิสฺสติ นุ โข พุทฺโธ อุทาหุ โนติ อุปธาเรนฺโต นิสฺสํสเยน พุทฺโธ ภวิสฺสตีติ ญตฺวา อจฺฉริยปุริโส อยนฺติ สิตํ อกาสิ ตโต อหํ อิมํ พุทฺธภูตํ ทฏฺฐุํ ลภิสฺสามิ นุ โข โนติ อุปธาเรนฺโต น ลภิสฺสามิ อนฺตราเยว กาลํ กตฺวา พุทฺธสเตนปิ พุทฺธสหสฺเสนปิ คนฺตฺวา โพเธตุํ อสกฺกุเณยฺยํ อรูปภเว นิพฺพตฺติสฺสามีติ ทิสฺวา เอวรูปํ นาม อจฺฉริยปุริสํ พุทฺธภูตํ ทฏฺฐุํ น ลภิสฺสามิ มหตี จ เม หานิ ภวิสฺสตีติ ปโรทิ ฯ มนุสฺสา ทิสฺวา อมฺหากํ อยฺโย อิทาเนว หสิตฺวา ปุน โรทิตุมุปฏฺฐิโต กินฺนุ โข ภนฺเต อมฺหากํ อยฺยปุตฺตสฺส โกจิ อนฺตราโย ภวิสฺสตีติ ปุจฺฉึสุ ฯ นตฺเถตสฺส อนฺตราโย นิสฺสํสเยน พุทฺโธ ภวิสฺสตีติ ฯ อถ กสฺมา ปโรทิตฺถาติ ฯ เอวรูปํ มหาปุริสํ พุทฺธภูตํ ทฏฺฐุํ น ลภิสฺสามิ มหตี วต เม หานิ ภวิสฺสตีติ อตฺตานํ อนุโสจนฺโต โรทามีติ อาห ฯ ตโต กึ นุ โข เม ญาติเกสุ โกจิ เอตํ พุทฺธภูตํ ทฏฺฐุํ ลภิสฺสตีติ อุปธาเรนฺโต ภาคิเนยฺยํ นาลกทารกํ อทฺทส ฯ โส ภคินิยา เคหํ คนฺตฺวา กหนฺเต ปุตฺโต นาลโกติ ฯ อตฺถิ เคเห อยฺยาติ ฯ ปกฺโกสาหิ นนฺติ ปกฺโกสาเปตฺวา อตฺตโน สนฺติกํ อาคตํ อาห ตาต สุทฺโธทนมหาราชสฺส กุเล ปุตฺโต ชาโต พุทฺธงฺกุโร เอส ปญฺจตึส วสฺสานิ อติกฺกมิตฺวา พุทฺโธ ภวิสฺสติ ตฺวํ เอตํ ทฏฺฐุํ ลภิสฺสสิ อชฺเชว ปพฺพชาหีติ ฯ สตฺตาสีติ- โกฏิธเน กุเล นิพฺพตฺตทารโก น มํ มาตุโล อนตฺเถ นิโยเชสฺสตีติ จินฺเตตฺวา ตาวเทว อนฺตราปณโต กาสายานิ เจว มตฺติกาปตฺตํ จ อาหราเปตฺวา เกสมสฺสุํ โอหาเรตฺวา กาสายานิ วตฺถานิ อจฺฉาเทตฺวา โย โลเก อุตฺตมปุคฺคโล ตํ อุทฺทิสฺส มยฺหํ ปพฺพชฺชาติ โพธิสตฺตาภิมุขํ อญฺชลึ ปคฺคยฺห ปญฺจปติฏฺฐิเตน วนฺทิตฺวา ปตฺตํ ถวิกายํ ปกฺขิปิตฺวา อํสกูเฏ ลคฺเคตฺวา หิมวนฺตํ ปวิสิตฺวา สมณธมฺมํ อกาสิ ฯ โส ปฐมาภิสมฺโพธิปฺปตฺตํ ตถาคตํ อุปสงฺกมิตฺวา นาลกปฏิปทํ กถาเปตฺวา ปุน หิมวนฺตํ ปวิสิตฺวา อรหตฺตํ ปตฺวา อุกฺกฏฺฐปฏิปทํ ปฏิปนฺโน สตฺต มาเส อายุํ ปาเลตฺวา เอกํ สุวณฺณปพฺพตํ นิสฺสาย ฐิตโกว อนุปาทิเสสาย นิพฺพานธาตุยา ปรินิพฺพายิ ฯ