สกฺโก สพฺเพสํ ธมฺมกถํ สุตฺวาว ปสีทิตฺวา ตุมฺเหหิ อปฺปมตฺเตหิ มรณสติ ภาวิตา มา ตุมฺเห อิโต ปฏฺฐาย สหตฺถา กมฺมํ กริตฺถ อหํ สกฺโก เทวราชา อหํ โว เคเห อปริมาณานิ สตฺตรตนานิ กริสฺสามิ ตุมฺเห ทานํ เทถ สีลํ รกฺขถ

อุโปสถํ อุปวสถ อปฺปมตฺตา โหถาติ เตสํ โอวาทํ ทตฺวา เคหํ อปริมิตํ ธนํ กตฺวา ปกฺกามิ ฯ

สตฺถา อิมํ ธมฺมเทสนํ อาหริตฺวา สจฺจานิ ปกาเสตฺวา ชาตกํ สโมธาเนสิ ฯ สจฺจปริโยสาเน กุฏุมฺพิโก โสตาปตฺติผเล ปติฏฺฐหิ ฯ ตทา ทาสี ขุชฺชุตฺตรา อโหสิ ฯ ธีตา อุปฺปลวณฺณา ฯ ปุตฺโต ราหุโล ฯ มาตา เขมา ฯ พฺราหฺมโณ ปน อหเมวาติ ฯ

อุรคชาตกํ จตุตฺถํ