ฉฬงฺควา มนฺต พฺยากรึสูติ อิเม อฏฺฐ พฺราหฺมณา ลกฺขณปฏิคฺคาหกา อเหสุํ ฯ ปฏิสนฺธิคหณทิวเส สุปิโนปิ เอเตเหว ปฏิคฺคหิโต ฯ เตสุ สตฺต ชนา เทฺว องฺคุลิโย อุกฺขิปิตฺวา เทฺวธา พฺยากรึสุ อิเมหิ ลกฺขเณหิ สมนฺนาคโต อคารํ อชฺฌาวสมาโน ราชา โหติ จกฺกวตฺติ ปพฺพชมาโน พุทฺโธติ สพฺพํ จกฺกวตฺติรญฺเญ สิริวิภวํ อาจิกฺขึสุ ฯ เตสํ ปน สพฺพทหโร โคตฺเตน โกณฺฑญฺโญ นาม มาณโว โพธิสตฺตสฺส ลกฺขณานํ นิปฺผตฺตึ โอโลเกตฺวา เอตสฺส อคารมชฺเฌ ฐานการณํ นตฺถิ เอกนฺเตเนว วิวฏจฺฉโท พุทฺโธ ภวิสฺสตีติ เอกเมว องฺคุลึ อุกฺขิปิตฺวา เอกํ พฺยากรณํ อกาสิ ฯ อยํ หิ กตาธิกาโร ปจฺฉิมภวิกสตฺโต ปญฺญาย อิตเร สตฺต ชเน อภิภวิตฺวา อิเมหิ ลกฺขเณหิ สมนฺนาคตสฺส อคารมชฺเฌ ฐานํ นาม นตฺถิ อสํสยํ พุทฺโธ ภวิสฺสตีติ เอกเมว คตึ อทฺทส ตสฺมา เอกํ องฺคุลึ อุกฺขิปิตฺวา เอกํ พฺยากาสิ ฯ อถ เต พฺราหฺมณา อตฺตโน ฆรานิ คนฺตฺวา ปุตฺเต อามนฺตยึสุ ตาตา อมฺเห มหลฺลกา สุทฺโธทนมหาราชสฺส ปุตฺตํ สพฺพญฺญุตปฺปตฺตํ มยํ ลเภยฺยาม วา โน วา ตุมฺเห ตสฺมึ กุมาเร สพฺพญฺญุตํ สมฺปตฺเต ตสฺส สาสเน ปพฺพเชยฺยาถาติ ฯ เต สตฺตปิ ชนา ยาวตายุกํ ฐตฺวา ยถากมฺมํ คตา ฯ โกณฺฑญฺญมาณโว อโรโค อโหสิ ฯ โส มหาสตฺเต วุฑฺฒิมนฺวาย มหาภินิกฺขมนํ อภินิกฺขมิตฺวา อนุกฺกเมน อุรุเวลํ คนฺตฺวา รมณีโย วต อยํ ภูมิภาโค อลํ วติทํ กุลปุตฺตสฺส ปธานตฺถิกสฺส ปธานายาติ จิตฺตํ อุปฺปาเทตฺวา ตตฺถ วาสํ อุปคเต มหาปุริโส ปพฺพชิโตติ สุตฺวา เตสํ พฺราหฺมณานํ ปุตฺเต อุปสงฺกมิตฺวา เอวมาห สิทฺธตฺถกุมาโร กิร ปพฺพชิโต โส นิสฺสํสยํ พุทฺโธ ภวิสฺสติ สเจ ตุมฺหากํ ปิตโร อโรคา อสฺสุํ อชฺช นิกฺขมิตฺวา ปพฺพเชยฺยุํ สเจ ตุมฺเห ตํปิ อิจฺเฉยฺยาถ เอถ อหํ ตํ มหาปุริสํ อนุปพฺพชิสฺสามีติ ฯ เต สพฺเพ เอกจฺฉนฺทา ภวิตุํ นาสกฺขึสุ ฯ ตโย ชนา ปพฺพชึสุ ฯ โกณฺฑญฺญพฺราหฺมณํ เชฏฺฐกํ กตฺวา อิตเร จตฺตาโร ปพฺพชึสุ ฯ เต ปญฺจชนา ปญฺจวคฺคิยตฺเถรา นาม ชาตา ฯ

ตทา ปน ราชา กึ ทิสฺวา มยฺหํ ปุตฺโต ปพฺพชิสฺสตีติ ปุจฺฉิ ฯ จตฺตาริ ปุพฺพนิมิตฺตานีติ ฯ กตรญฺจ กตรญฺจาติ ฯ ชราชิณฺณํ พฺยาธิตํ มตํ ปพฺพชิตนฺติ ฯ ราชา อิโต ปฏฺฐาย เอวรูปานํ มม ปุตฺตสฺส สนฺติกํ อุปสงฺกมิตุํ มา อทตฺถ มยฺหํ ปุตฺตสฺส พุทฺธภาเวน กมฺมํ นตฺถิ อหํ มม ปุตฺตํ ทฺวิสหสฺสปริตฺตทีปปริวารานํ จตุนฺนํ มหาทีปานํ อิสฺสริยาธิปจฺจํ รชฺชํ กาเรนฺตํ ฉตฺตึสโยชนปริมณฺฑลาย ปริสาย ปริวุตํ คคนตเล วิจรมานํ ปสฺสิตุกาโมมฺหีติ ฯ เอวญฺจ ปน วตฺวา อิเมสํ จตุปฺปการานํ ปริสานํ กุมารสฺส จกฺขุปเถ อาคมนนิวารณตฺถํ จตูสุ ทิสาสุ คาวุเต คาวุเต อารกฺขํ ฐเปสิ ฯ ตํ ทิวสญฺจ ปน มงฺคลฏฺฐาเน สนฺนิปติเตสุ อสีติยา ญาติกุลสหสฺเสสุ เอกเมโกว เอกเมกํ ปุตฺตํ ปฏิชานึสุ อยํ พุทฺโธ วา โหตุ ราชา วา มยํ เอกเมกํ ปุตฺตํ ทสฺสาม สเจปิ พุทฺโธ ภวิสฺสติ ขตฺติยสมเณเหว ปุรกฺขิตปริวาริโต วิจริสฺสติ สเจปิ ราชา ภวิสฺสติ ขตฺติยกุมาเรเหว ปุรกฺขิตปริวาริโต วิจริสฺสตีติ ฯ ราชาปิ โพธิสตฺตสฺส อุตฺตมรูปธรา วิคตสพฺพโทสา ธาติโย ปจฺจุปฏฺฐเปสิ ฯ โพธิสตฺโต อนนฺเตน ปริวาเรน มหนฺเตน สิริโสภคฺเคน วฑฺฒติ ฯ