เตน สขิญฺจ มิตฺตญฺจ ธีโร สนฺธาตุมรหตีติ ฯ

ตตฺถ อลิกํ วตาติ มุสา วต ฯ อภูเตนาติ อวิชฺชมาเนน ฯ โก เตติ กตฺถ ตยา ฯ สุมุโขติ สุนฺทรมุโข ฯ อหิตุณฺฑิกาติ ตํ อาลปติ ฯ อหิคุณฺฑิกาติปิ ปาโฐ ฯ ฉาตนฺติ ชิฆจฺฉาภิภูตํ ทุพฺพลํ

๒. เสเวหิ ฯ กปณํ ฯ หนาสีติ เวฬุเปสิกาย ติกฺขตฺตุํ ปหรสิ ฯ ตาหนฺติ ตํ อหํ ฯ สรนฺติ สรนฺโต ฯ ทุกฺขเสยฺยนฺติ ตสฺมึ อาปเณ ทุกฺขสยนํ ฯ อปิ รชฺชมฺปิ การเยติ สเจปิ พาราณสีรชฺชํ คเหตฺวา มยฺหํ ทตฺวา มํ รชฺชํ กาเรยฺยาสิ เอวมฺปิ ตํ เนวาหํ ยาจิโต ทชฺชํ ตํ เอกมฺปิ อมฺพปกฺกํ อหํ ตยา ยาจิโต น ทเทยฺยํ ฯ กึการณา ฯ ตถาหิ ภยตชฺชิโตติ ตถาหิ อหํ ตยา ภเยน ตชฺชิโตติ อตฺโถ ฯ คพฺเภ ติตฺตนฺติ สุโภชเนน มาตุกุจฺฉิยํเยว อลงฺกตปฏิยตฺเต สยนคพฺเภเยว วา ติตฺตํ โภคาสาย อกปณํ ฯ สขิญฺจ มิตฺตญฺจาติ สขิภาวญฺจ มิตฺตภาวญฺจ ตถารูเปน กุเล ชาเตน ติตฺเตน อกปเณน อมจฺฉรินา สทฺธึ ปณฺฑิโต สนฺธาตุํ ปุน ฆเฏตุํ อรหติ ตยา กปเณน อหิตุณฺฑิเกน สทฺธึ โก ปน มิตฺตภาวํ ฆเฏตีติ อตฺโถ ฯ

เอวญฺจ ปน วตฺวา วานโร วนฆฏํ สหสา ปาวิสิ ฯ