ติจีวรญฺจ ปตฺโต จ วาสิ สูจิ จ พนฺธนํ

ปริสฺสาวเนน อฏฺเฐเต ยุตฺตโยคสฺส ภิกฺขุโนติ ฯ อิเม อฏฺฐ ปริกฺขาเร อาหริตฺวา อทาสิ ฯ โพธิสตฺโต อรหตฺตทฺธชํ นิวาเสตฺวา อุตฺตมปพฺพชฺชาเวสํ คณฺหิตฺวา ฉนฺน มม วจเนน มาตาปิตูนมาโรคฺยํ วเทหีติ อุยฺโยเชสิ ฯ ฉนฺโน โพธิสตฺตํ วนฺทิตฺวา ปทกฺขิณํ กตฺวา ปกฺกามิ ฯ กนฺถโก ปน ฉนฺเนน สทฺธึ มนฺตยมานสฺส โพธิสตฺตสฺส วจนํ สุณนฺโต ฐตฺวา นตฺถิทานิ มยฺหํ ปุน สามิโน ทสฺสนนฺติ จกฺขุปถํ วิชหนฺโต โสกํ อธิวาเสตุํ อสกฺโกนฺโต หทเย ผลิเต กาลํ กตฺวา ตาวตึสภวเน กนฺถโก นาม เทวปุตฺโต หุตฺวา นิพฺพตฺติ ฯ ฉนฺนสฺส ปฐมํ เอโกว โสโก อโหสิ ฯ กนฺถกสฺส ปน กาลกิริยาย ทุติเยน โสเกน ปีฬิโต โรทนฺโต ปริเทวนฺโต อคมาสิ ฯ

โพธิสตฺโตปิ ปพฺพชิตฺวา ตสฺมึเยว ปเทเส อนุปิยนฺนาม อมฺพวนํ อตฺถิ ตตฺถ สตฺตาหํ ปพฺพชฺชาสุเขน วีตินาเมตฺวา เอกทิวเสเนว ตึสโยชนมคฺคํ ปทสา คนฺตฺวา ราชคหํ ปาวิสิ ปวิสิตฺวา จ ปน สปทานํ ปิณฺฑาย จริ ฯ สกลนครํ โพธิสตฺตสฺส รูปทสฺสเนน ธนปาลเกน ปวิฏฺฐราชคหํ วิย อสุรินฺเทน ปวิฏฺฐเทวนครํ วิย จ สงฺโขภิตํ อคมาสิ ฯ อถ ราชปุริสา อาคนฺตฺวา เทว เอวรูโป นาม สตฺโต นคเร ปิณฺฑาย วิจรติ เทโว วา มนุสฺโส วา นาโค วา สุปณฺโณ วา โก นาม เอโสติ น ชานามาติ อาโรเจสุํ ฯ ราชา ปาสาทตเล ฐตฺวา มหาปุริสํ ทิสฺวา อจฺฉริยพฺภุตชาโต ปุริเส อาณาเปสิ คจฺฉถ ภเณ วีมํสถ สเจ อมนุสฺโส ภวิสฺสติ นครา นิกฺขมิตฺวา อนฺตรธายิสฺสติ สเจ เทวตา ภวิสฺสติ อากาเสน คจฺฉิสฺสติ สเจ ปน นาโค ภวิสฺสติ ปฐวิยํ นิมุชฺชิตฺวา คมิสฺสติ สเจ มนุสฺโส ภวิสฺสติ ยถาลทฺธํ ภิกฺขํ ปริภุญฺชตีติ ฯ มหาปุริโสปิ โข มิสฺสกภตฺตํ สํหริตฺวา อลํ เม เอตฺตกํ ยาปนายาติ ญตฺวา ปวิฏฺฐทฺวาเรเนว นครา นิกฺขมิตฺวา ปณฺฑวปพฺพตจฺฉายาย ปุรตฺถาภิมุโข นิสีทิตฺวา อาหารํ ปริภุญฺชิตุํ อารทฺโธ ฯ อถสฺส อนฺตานิ ปริวตฺติตฺวา มุเขน นิกฺขมนาการปฺปตฺตานิ อเหสุํ ฯ ตโต เตน อตฺตภาเวน เอวรูปสฺส อาหารสฺส จกฺขุนาปิ อทิฏฺฐปุพฺพตาย ปฏิกฺกูลาหาเรน อฏฺฏิยมาโน เอวํ อตฺตนาว อตฺตานํ โอวทิ สิทฺธตฺถ ตฺวํ พหุสุลภอนฺนปาเน กุเล ติวสฺสิกคนฺธสาลิโภชนนานคฺครสโภชนฏฺฐาเน นิพฺพตฺติตฺวา เอกํ ปํสุกูลิกํ ทิสฺวา กทา นุ โข อหํปิ เอวรูโป หุตฺวา ปิณฺฑาย จริตฺวา ปริภุญฺชิสฺสามิ ภวิสฺสติ นุ โข เม โส กาโลติ จินฺเตตฺวา นิกฺขมนฺโต อิทานิ กินฺนาเมตํ กโรสีติ เอวํ อตฺตานํ โอวทิตฺวา นิพฺพิกาโร หุตฺวา อาหารํ ปริภุญฺชิ ฯ ราชปุริสา ตํ ปวุตฺตึ ทิสฺวา คนฺตฺวา รญฺโญ อาโรเจสุํ ฯ ราชา ทูตสฺเสว วจนํ สุตฺวา เวเคน นครา นิกฺขมิตฺวา โพธิสตฺตสฺส สนฺติกํ คนฺตฺวา อิริยาปถสฺมึเยว ปสีทิตฺวา โพธิสตฺตสฺส อิสฺสริยํ นิยฺยาเทสิ ฯ โพธิสตฺโต มยฺหํ มหาราช วตฺถุกาเมหิ วา กิเลสกาเมหิ วา อตฺโถ นตฺถิ อหํ ปรมาภิสมฺโพธึ ปฏฺฐยนฺโต นิกฺขนฺโตติ ฯ ราชา อเนกปฺปการํ ยาจนฺโตปิ ตสฺส จิตฺตํ อลภิตฺวา อทฺธา ตฺวํ พุทฺโธ ภวิสฺสสิ พุทฺธภูเตน ปน เต ปฐมํ มม วิชิตํ อาคนฺตพฺพนฺติ ฯ อยเมตฺถ สงฺเขโป ฯ วิตฺถาโร ปน ปพฺพชฺชํ กิตฺตยิสฺสามิ ยถา ปพฺพชิ จกฺขุมาติ อิมํ ปพฺพชฺชาสุตฺตสทฺทํ อฏฺฐกถาย โอโลเกตฺวา เวทิตพฺโพ ฯ