เตน โข ปน สมเยน อุรุเวลายํ เสนานิคเม เสนากุฏุมฺพิกสฺส เคเห นิพฺพตฺตา สุชาตา นาม ทาริกา วยปฺปตฺตา เอกสฺมึ นิโคฺรธรุกฺเข ปฏฺฐนํ อกาสิ สเจ สมชาติกํ กุลฆรํ คนฺตฺวา ปฐมคพฺเภ ปุตฺตํ ลภิสฺสามิ อนุสํวจฺฉรํ เต สตสหสฺสปริจฺจาเคน พลิกมฺมํ กริสฺสามีติ ฯ ตสฺสา สา ปตฺถนา สมิชฺฌิ ฯ สา มหาสตฺตสฺส ทุกฺกรการิกํ กโรนฺตสฺส ฉฏฺเฐ วสฺเส ปริปุณฺเณ วิสาขปุณฺณมายํ พลิกมฺมํ กาตุกามา หุตฺวา ปุเรตรํเยว จ เธนุสหสฺสํ ลฏฺฐิมธุกวเน จาราเปตฺวา ตาสํ ขีรํ ปญฺจ เธนุสตานิ ปาเยตฺวา ตาสํ ขีรํ อฑฺฒติยานีติ เอวํ ยาว โสฬสนฺนํ เธนูนํ ขีรํ อฏฺฐ เธนุโย ปิวนฺติ ตาว ขีรสฺส พหลตํ จ โอชวนฺตํ จ ปฏฺฐยมานา ขีรปริวตฺตนนฺนาม อกาสิ ฯ สา วิสาขปุณฺณมีทิวเส ปาโตว พลิกมฺมํ กริสฺสามีติ รตฺติยา ปจฺจูสสมยํ ปจฺจุฏฺฐาย ตา อฏฺฐ เธนุโย ทุหาเปสิ ฯ วจฺฉกา เธนูนํ ถนมูลํ น อคมํสุ ฯ ถนมูเล ปน นวภาชเนสุ อุปนีตมตฺเตสุ อตฺตโน ธมฺมตาย ขีรธารา ปวตฺตึสุ ฯ ตํ อจฺฉริยํ ทิสฺวา สุชาตา สหตฺเถเนว ขีรํ คเหตฺวา นวภาชเน ปกฺขิปิตฺวา สหตฺเถเนว อคฺคึ กตฺวา ปจิตุํ อารภิ ฯ ตสฺมึเยว ปายาเส ปจฺจมาเน มหนฺตา ปุพฺพุลา อุฏฺฐหิตฺวา ทกฺขิณาวตฺตา หุตฺวา สญฺจรนฺติ ฯ เอกผุสิตํปิ พหิ น ปตติ ฯ อุทฺธนโต อปฺปมตฺตโกปิ ธุโม น อุฏฺฐติ ฯ ตสฺมึ สมเย จตฺตาโร โลกปาลา อาคนฺตฺวา อุทฺธเน อารกฺขํ คณฺหึสุ ฯ มหาพฺรหฺมา ฉตฺตํ ธาเรสิ ฯ สกฺโก อลาตานิ สมาเนนฺโต อคฺคึ ชาเลสิ ฯ เทวตา หิ ทฺวิสหสฺสทีปปริวาเรสุ จตูสุ ทีเปสุ เทวานํ มนุสฺสานํ จ โอปกปฺปนกโอชํ อตฺตโน เทวตานุภาเวน ทณฺฑกพทฺธมธุปฏลํ ปีเฬตฺวา มธุํ คณฺหมานา วิย สํหริตฺวา ตตฺถ ปกฺขิปนฺติ ฯ อญฺเญสุ หิ กาเลสุ เทวตา กพเฬ โอชํ ปกฺขิปนฺติ สมฺโพธิทิวเส จ ปน ปรินิพฺพานทิวเส จ อุกฺขลิยํเยว ปกฺขิปนฺติ ฯ สุชาตา เอกทิวเสเนว ตตฺถ อตฺตโน ปากฏานิ อเนกานิ อจฺฉริยานิ ทิสฺวา ปุณฺณํ นาม ทาสึ อามนฺเตสิ อมฺม ปุณฺเณ อชฺช อมฺหากํ เทวตา อติวิย ปสนฺนา มยา เอตฺตเก กาเล เอวรูปํ อจฺฉริยํ นาม น ทิฏฺฐปุพฺพํ เวเคน คนฺตฺวา เทวฏฺฐานํ ปฏิชคฺคาหีติ ฯ สาธุ อยฺเยติ สา ตสฺสา วจนํ สมฺปฏิจฺฉิตฺวา ตุริตตุริตาเยว รุกฺขมูลํ อคมาสิ ฯ โพธิสตฺโตปิ โข ตสฺมึ รตฺติภาเค ปญฺจ มหาสุปิเน ทิสฺวา ปริคณฺหนฺโต นิสฺสํสเยนาหํ อชฺช พุทฺโธ ภวิสฺสามีติ กตสนฺนิฏฺฐาโน ตสฺสา รตฺติยา อจฺจเยน กตสรีรปฏิชคฺคโน ภิกฺขาจารเวลํ อาคมยมาโน ปาโตว อาคนฺตฺวา ตสฺมึ รุกฺขมูเล นิสีทิ อตฺตโน ปภาย สกลํ รุกฺขมูลํ โอภาสยมาโน ฯ อถ โข สา ปุณฺณา อาคนฺตฺวา อทฺทส โพธิสตฺตํ รุกฺขมูลํ ปาจีนโลกธาตุํ โอโลกยมานํ นิสินฺนํ ฯ สรีรโต จสฺส นิกฺขนฺตาหิ ปภาหิ สกลํ รุกฺขํ สุวณฺณวณฺณํ ทิสฺวา ตสฺสา เอตทโหสิ อชฺช อมฺหากํ เทวตา รุกฺขโต โอรุยฺห สหตฺเถเนว พลิกมฺมํ สมฺปฏิจฺฉิตุํ นิสินฺนา มญฺเญติ สํเวคปฺปตฺตา หุตฺวา เวเคน คนฺตฺวา สุชาตาย เอตมตฺถํ อาโรเจสิ ฯ สุชาตา ตสฺสา วจนํ สุตฺวา ตุฏฺฐมานสา หุตฺวา อชฺช อิทานิ ปฏฺฐาย มม เชฏฺฐธีตุฏฺฐาเน ติฏฺฐาหีติ ธีตุ อนุจฺฉวิกํ สพฺพาลงฺการํ อทาสิ ฯ ยสฺมา ปน พุทฺธภาวํ ปาปุณนทิวเส สตสหสฺสคฺฆนิกํ สุวณฺณปาตึ ลทฺธุํ วฏฺฏติ ตสฺมา สา สุวณฺณปาติยํ ปายาสํ ปกฺขิปิสฺสามีติ จิตฺตํ อุปฺปาเทตฺวา สตสหสฺสคฺฆนิกํ สุวณฺณปาตึ นีหราเปตฺวา ตตฺถ ปายาสํ ปกฺขิปิตุกามา ปกฺกโภชนํ อาวชฺเชสิ ฯ สพฺโพ ปายาโส ปทุมปตฺตโต อุทกํ วิย นิวตฺติตฺวา ปาติยํ ปติฏฺฐาสิ เอกปาติปูรณมตฺโตว อโหสิ ฯ สา ตํ ปาตึ อญฺญาย สุวณฺณปาติยา ปฏิกุชฺชิตฺวา โอทาตวตฺเถน เวเฐตฺวา สพฺพาลงฺกาเรหิ อตฺตภาวํ อลงฺกริตฺวา ตํ ปาตึ อตฺตโน สีเส ฐเปตฺวา มหนฺเตน อานุภาเวน นิโคฺรธรุกฺขมูลํ คนฺตฺวา โพธิสตฺตํ โอโลเกตฺวา พลวโสมนสฺสชาตา รุกฺขเทวตาติ สญฺญาย ทิฏฺฐฏฺฐานโต ปฏฺฐาย โอนโตนตา คนฺตฺวา สีสโต โอตริตฺวา วิวริตฺวา สุวณฺณภิงฺคาเรน คนฺธปุปฺผวาสิตํ อุทกํ คเหตฺวา โพธิสตฺตํ อุปคนฺตฺวา อฏฺฐาสิ ฯ ฆฏีการมหาพฺรหฺมุนา ทินฺโน มตฺติกาปตฺโต เอตฺตกํ อทฺธานํ โพธิสตฺตํ อวิชหิตฺวา ตสฺมึ ขเณ อทสฺสนงฺคโต ฯ โพธิสตฺโต ปตฺตํ อปสฺสนฺโต ทกฺขิณหตฺถํ ปสาเรตฺวา อุทกํ สมฺปฏิจฺฉิ ฯ สุชาตา สุวณฺณปาติปายาสํ มหาปุริสสฺส หตฺเถ ฐเปสิ ฯ มหาปุริโส สุชาตํ โอโลเกสิ ฯ สา อาการํ สลฺลกฺเขตฺวา อยฺย มยา ตุมฺหากํ ปริจฺจตฺตํ คเหตฺวา ยถารุจึ คจฺฉถาติ วนฺทิตฺวา ยถา มยฺหํ มโนรโถ นิปฺผนฺโน เอวํ ตุมฺหากํ นิปฺปชฺชตูติ วตฺวา สตสหสฺสคฺฆนิกาย สุวณฺณปาติยา ปุราณํ มตฺติกํ วิย อนเปกฺขา หุตฺวา ปกฺกามิ ฯ