โพธิสตฺโตปิ โข นิสินฺนฏฺฐานา วุฏฺฐาย รุกฺขํ ปทกฺขิณํ กตฺวา ปาตึ อาทาย เนรญฺชราย ตีรํ คนฺตฺวา อเนเกสํ โพธิสตฺตสตสหสฺสานํ สมฺพุชฺฌนทิวเส โอตริตฺวา นฺหานฏฺฐานํ สุปฺปติฏฺฐิตติฏฺฐนฺนาม อตฺถิ ตสฺส ตีเร ปาตึ ฐเปตฺวา โอตริตฺวา อเนกพุทฺธสตสหสฺสานํ นิวาสนํ อรหตฺตทฺธชํ นิวาเสตฺวา ปุรตฺถาภิมุโข นิสีทิตฺวา เอกฏฺฐิตาลปกฺกปฺปมาเณ เอกูนปณฺณาสปิณฺเฑ กตฺวา สพฺพํ อปฺโปทกมธุปายาสํ ปริภุญฺชติ ฯ โส เอวํ หิสฺส พุทฺธภูตสฺส สตฺตสตฺตาหํ โพธิมณฺเฑ วสนฺตสฺส เอกูนปญฺญาส ทิวสานิ อาหาโร อโหสิ ฯ ตตฺตเก กาเล เนว อญฺโญ อาหาโร อตฺถิ น นฺหานํ น มุขโธวนํ น สรีรวลญฺชํ ฌานสุเขน มคฺคสุเขน ผลสุเขเนว วีตินาเมติ ฯ ตํ ปน ปายาสํ ภุญฺชิตฺวา สุวณฺณปาตึ คเหตฺวา สจาหํ อชฺช พุทฺโธ ภวิตุํ สกฺขิสฺสามิ อยํ เม ปาติ ปฏิโสตํ คจฺฉตุ โน เจ สกฺขิสฺสามิ อนุโสตํ คจฺฉตูติ ปกฺขิปิ ฯ สา โสตํ ฉินฺทมานา นทีมชฺฌํ คนฺตฺวา มชฺฌฏฺฐาเนว ชวสมฺปนฺโน อสฺโส วิย อสีติหตฺถมตฺตฏฺฐานํ ปฏิโสตํ คนฺตฺวา เอกสฺมึ อาวตฺเต นิมุชฺชิตฺวา กาลนาคราชภวนํ คนฺตฺวา ติณฺณํ พุทฺธานํ ปริโภคปาติโย กิลิ กิลีติ รวํ การยมานา ปหริตฺวา ตาสํ สพฺพเหฏฺฐิมา หุตฺวา อฏฺฐาสิ ฯ กาโล นาคราชา ตํ สทฺทํ สุตฺวา หิยฺโย เอโก พุทฺโธ นิพฺพตฺติ ปุน อชฺช เอโก นิพฺพตฺโตติ อเนเกหิ ปทสเตหิ ถุติโย วทมาโน อฏฺฐาสิ ฯ ตสฺส กิร มหาปฐวิยา เอกโยชนติคาวุตปฺปมาณํ นภํ ปูเรตฺวา อาโรหนกาโล อชฺช วา หิยฺโย วาติ สทิโส อโหสิ ฯ

โพธิสตฺโตปิ นทีตีรมฺหิ สุปุปฺผิตสาลวเน ทิวาวิหารํ กตฺวา สายณฺหสมเย ปุปฺผานํ วณฺฑโต มุจฺจนกาเล เทวตาหิ อลงฺกเตน อฏฺฐุสภวิตฺถาเรน มคฺเคน สีโห วิย วิชมฺภมาโน โพธิรุกฺขาภิมุโข ปายาสิ ฯ นาคยกฺขสุปณฺณาทโย ทิพฺเพหิ คนฺธปุปฺผาทีหิ ปูชยึสุ ฯ ทสสหสฺสีโลกธาตุ เอกคนฺธา เอกมาลา เอกสาธุการา อโหสิ ฯ ตสฺมึ สมเย พฺราหฺมโณ โสตฺถิโย นาม ติณหารโก ติณํ อาทาย ปฏิปเถ อาคจฺฉนฺโต มหาปุริสสฺส อาการํ ญตฺวา อฏฺฐ ติณมุฏฺฐิโย ตสฺส อทาสิ ฯ โพธิสตฺโต ติณํ คเหตฺวา โพธิมณฺฑํ อารุยฺห ทกฺขิณทิสาภาเค อุตฺตราภิมุโข อฏฺฐาสิ ฯ ตสฺมึ ขเณ ทกฺขิณจกฺกวาฬํ โอสีทิตฺวา เหฏฺฐา อวีจิสมฺปตฺตํ วิย อโหสิ ฯ อุตฺตรจกฺกวาฬํ อุลฺลงฺฆิตฺวา อุปริ ภวคฺคปฺปตฺตํ วิย อโหสิ ฯ โพธิสตฺโต นยิทํ สมฺโพธิปาปุณนฏฺฐานํ ภวิสฺสติ มญฺเญติ ปทกฺขิณํ กโรนฺโต ปจฺฉิมทิสาภาคํ คนฺตฺวา ปุรตฺถาภิมุโข อฏฺฐาสิ ฯ ตโต ปจฺฉิมจกฺกวาฬํ โอสีทิตฺวา เหฏฺฐา อวีจิสมฺปตฺตํ วิย อโหสิ ฯ ปุรตฺถิมจกฺกวาฬํ อุลฺลงฺฆิตฺวา ยาว อุปริ ภวคฺคปฺปตฺตํ วิย อโหสิ ฯ ฐิตฐิตฏฺฐาเน กิรสฺส เนมิวฏฺฏปริยนฺเต อกฺกนฺตนาภิยา ปติฏฺฐิตํ มหาสกฏจกฺกํ วิย มหาปฐวี โอนตุนฺนตา อโหสิ ฯ โพธิสตฺโต นยิทํ สมฺโพธิปาปุณนฏฺฐานํ ภวิสฺสติ มญฺเญติ ปทกฺขิณํ กโรนฺโต อุตฺตรทิสาภาคํ คนฺตฺวา ทกฺขิณาภิมุโข อฏฺฐาสิ ฯ ตโต อุตฺตรจกฺกวาฬํ โอสีทิตฺวา เหฏฺฐา อวีจิสมฺปตฺตํ วิย อโหสิ ฯ ทกฺขิณจกฺกวาฬํ อุลฺลงฺฆิตฺวา อุปริ ภวคฺคปฺปตฺตํ วิย อโหสิ ฯ โพธิสตฺโต อิทํปิ สมฺโพธิปาปุณนฏฺฐานํ น ภวิสฺสติ มญฺเญติ ปทกฺขิณํ กโรนฺโต ปุรตฺถิมทิสาภาคํ คนฺตฺวา ปจฺฉิมาภิมุโข อฏฺฐาสิ ฯ ปุรตฺถิมทิสาภาเค ปน สพฺพพุทฺธานํ ปลฺลงฺกฏฺฐานํ ตํ เนว ฉมฺภติ น กมฺปติ ฯ มหาสตฺโต อิทํ สพฺพพุทฺธานํ อวิชหิตํ อจลฏฺฐานํ กิเลสปญฺชรวิทฺธํสนฏฺฐานนฺติ ญฺตวา ตานิ ติณานิ อคฺเค คเหตฺวา จาเลสิ ฯ ตาวเทว จุทฺทสหตฺโถ ปลฺลงฺโก อโหสิ ฯ ตานิปิ โข ติณานิ ตถารูเปน สนฺถาเรน สณฺฐหึสุ ยถารูเป สุกุสโลปิ จิตฺตกาโร วา โปตฺถกาโร วา อาลิขิตุํ สมตฺโถ นตฺถิ ฯ