โพธิสตฺโต โพธิรุกฺขกฺขนฺธํ ปิฏฺฐิโต กตฺวา ปุรตฺถาภิมุโข ทฬฺหมานโส หุตฺวา

กามํ ตโจ นหารู จ อฏฺฐิ จ อวสิสฺสตุ

สพฺพํปิ หิทํ สรีเร มํสโลหิตํ อุปสุสฺสตุ ตตฺเถว สมฺมาสมฺโพธึ อปฺปตฺวา อิมํ ปลฺลงฺกํ น ภินฺทิสฺสามีติ อสนิสตสนฺนิปาเตนาปิ อเภชฺชรูปํ อปราชิตํ ปลฺลงฺกํ อาภุชิตฺวา นิสีทิ ฯ

ตสฺมึ สมเย มาโร เทวปุตฺโต สิทฺธตฺถกุมาโร มยฺหํ วสํ อติกฺกมิตุกาโม น ทานิมสฺส อติกฺกมิตุํ ทสฺสามีติ มารพลสฺส สนฺติกํ คนฺตฺวา เอตมตฺถํ อาโรเจตฺวา มารโฆสนนฺนาม โฆสาเปตฺวา มารพลํ อาทาย นิกฺขมิ ฯ สา ปน มารเสนา มารสฺส ปุรโต ทฺวาทสโยชนา โหติ ทกฺขิณโต จ วามโต จ ทฺวาทสโยชนา โหติ ฯ ปจฺฉโต ปน จกฺกวาฬปริยนฺตํ กตฺวา ฐิตา อุทฺธํ นวโยชนุพฺเพธา มารเสนา ยสฺสา อุนฺนทนฺติยา อุนฺนาทสทฺโท ปน โยชนสหสฺสโต ปฏฺฐาย ปฐวิยา อุทฺริยนสทฺโท วิย สุยฺยติ ฯ อถ มาโร เทวปุตฺโต ทิยฑฺฒโยชนสติกํ คิริเมขลนฺนาม หตฺถึ อภิรุยฺหิตฺวา พาหุสหสฺสํ มาเปตฺวา นานาวุธานิ อคฺคเหสิ ฯ อวเสสายปิ มารปริสาย เทฺว ชนา เอกสทิสํ อาวุธํ น คณฺหึสุ นานปฺปการมุขา หุตฺวา มหาสตฺตํ อชฺโฌตฺถรมานา วิย อาคมึสุ ฯ ทสสหสฺสจกฺกวาฬเทวตา ปน มหาสตฺตสฺส ถุติโย วทมานา อฏฺฐํสุ ฯ สกฺโก ปน เทวราชา วิชยุตฺตรสงฺขํ ธมมาโน อฏฺฐาสิ ฯ โส กิร สงฺโข วีสติหตฺถสติโก โหติ สกึ วาตํ คาหาเปตฺวา ธมนฺโต จตฺตาโร มาเส สทฺทํ กริตฺวา นิสฺสทฺโท โหติ ฯ มหากาลนาคราชา อติเรกํ ปทสเตน วณฺณํ วทมาโน อฏฺฐาสิ ฯ มหาพฺรหฺมา เสตจฺฉตฺตํ ธารยมาโน อฏฺฐาสิ ฯ มารพเล ปน โพธิมณฺฑํ อุปสงฺกมนฺเต เตสุ เอโกปิ ฐาตุํ นาสกฺขิ ฯ สมฺมุขสมฺมุขฏฺฐาเนว ปลายึสุ ฯ กาลนาคราชา ปฐวิยํ นิมุชฺชิตฺวา ปญฺจโยชนสติกมนฺทิรํ นาคภวนํ คนฺตฺวา อุโภหิ หตฺเถหิ มุขํ ปิทหิตฺวา นิปนฺโน ฯ สกฺโก วิชยุตฺตรสงฺขํ ปิฏฺฐิยํ กตฺวา จกฺกวาฬมุขวฏฺฏิยํ อฏฺฐาสิ ฯ มหาพฺรหฺมา เสตจฺฉตฺตํ โกฏิยํ คเหตฺวา พฺรหฺมโลกเมว อคมาสิ ฯ เอกเทวตาปิ ฐาตุํ สมตฺถา นาม นาโหสิ ฯ มหาปุริโส เอกโกว นิสีทิ ฯ