กุทฺธํ อปฺปฏิกุชฺฌนฺโต ราชา รฏฺฐสฺส ปูชิโต ฯ

คาเม วา ยทิ วารญฺเญ นินฺเน วา ยทิ วา ถเล

สพฺพตฺถมนุสาสามิ มาสุ กุชฺฌ รเถสภาติ เทฺว คาถา วทติ ฯ

ตตฺถ รฏฺฐสฺส ปูชิโตติ เอวรูโป ราชา รฏฺฐสฺส ปูชิโต โหตีติ อตฺโถ ฯ สพฺพตฺถมนุสาสามีติ เอเตสุ คามาทีสุ ยตฺถกตฺถจิ วสนฺโต อหํ มหาราช อิมายเอว อนุสิฏฺฐิยา ตมนุสาสามิ เอเตสุ คามาทีสุ ยตฺถกตฺถจิ เอกสฺมึปิ เอกสตฺเตปิ อนุสาสามิ ฯ มาสุ กุชฺฌ รเถสภาติ เอวเมวาหํ ตํ อนุสาสามิ รญฺญา นาม กุชฺฌิตุํ น วฏฺฏติ ฯ กึการณา ฯ ราชาโน นาม วาจาวุธา เตสํ กุทฺธานํ วจนมตฺเตเนว พหู ชีวิตกฺขยํ ปาปุณนฺตีติ ฯ