ราชา ตสฺสา กถาย พชฺฌิตฺวา ปุน อมจฺเจ สนฺนิปาเตตฺวา ทสนามกํ กาเรตฺวา นามํ คเวสนฺโต อปรมฺปิ สํวจฺฉรํ วสิ ฯ ตสฺสา ทสนามเกปิ นามํ นาโหสิ อสุกํ นามาติ วุตฺเต โพธิสตฺโต ปฏิกฺขิปเตว ฯ ปุน ราชา กึ เม อิมายาติ ตุรงฺคํ อารุยฺห ปายาสิ ฯ สาปิ ปุน วาตปาเน ฐตฺวา อตฺตานํ ทสฺเสสิ ฯ ตํ ทิสฺวา ราชา ติฏฺฐ ตฺวํ มยํ คมิสฺสามาติ อาห ฯ กสฺมา ยาสิ มหาราชาติ ฯ ตว นามํ ชานิตุํ น สกฺโกมีติ ฯ มหาราช กสฺมา นามํ น ชานิสฺสติ อาสา นาม อสมิชฺฌนกา นตฺถิ มม วจนํ สุณาหิ เอโก กิร พโก ปพฺพตมุทฺธนิ ฐิโต อตฺตนา ปตฺถิตํ ลภิ ตฺวํ กสฺมา น ลภิสฺสสิ อธิวาเสหิ มหาราชาติ ฯ เอโก กิร พโก เอกสฺมึ ปทุมสเร โคจรํ คเหตฺวา อุปฺปติตฺวา ปพฺพตมตฺถเก นิลียิ ฯ โส ตํทิวสํ ตตฺเถว วสิตฺวา ปุนทิวเส จินฺเตสิ อหํ อิมสฺมึ ปพฺพตมตฺถเก สุขํ นิสินฺโน สเจ อิโต อนุจฺจาเวตฺวา เอตฺเถว นิสินฺโน โคจรํ คเหตฺวา ปานียํ ปิวิตฺวา อิมํ ทิวสํ วเสยฺยํ ภทฺรกํ วต อสฺสาติ ฯ อถ ตํทิวสเมว สกฺโก เทวราชา อสุรนิมฺมถนํ กตฺวา ตาวตึสภวเน เทวิสฺสริยํ ลทฺโธ จินฺเตสิ มม ตาว มโนรโถ มตฺถกํ ปตฺโต อตฺถิ นุ โข อญฺโญ โกจิ อปริปุณฺณมโนรโถติ โส อุปธาเรนฺโต ตํ พกํ ทิสฺวา อิมสฺส มโนรถํ มตฺถกํ ปาเปสฺสามีติ พกสฺส นิสินฺนฏฺฐานโต อวิทูเร เอกา นที อตฺถิ ตํ นทึ โอฆปุณฺณํ กตฺวา ปพฺพตมตฺถเกน เปเสสิ ฯ พโก ตสฺเสว นิสินฺโน มจฺเฉ ขาทิตฺวา ปานียํ ปิตฺวา ตํ ทิวสํ ตตฺเถว วสิ อถ อุทกํปิ ภสฺสิตฺวา คตํ เอวํ มหาราช พโกปิ ตาว อตฺตโน อาสา ผลํ ลภิ ตฺวํ กสฺมา น ลภิสฺสสีติ วตฺวา อาสึสเถวาติ อาทิมาห ฯ

ตตฺถ อาสึสเถวาติ อาสึสิเยว ปตฺเถสิเยว ฯ ปกฺขีติ ปกฺเขหิ ยุตฺตตฺตา ปกฺขี ฯ ทฺวิกฺขตฺตุํ ชาตตาย ทิโช ฯ ตาว ทูรคตา สตีติ ปพฺพตมตฺถกโต มจฺฉานญฺจ อุทกสฺส จ ทูรภาวํ ปสฺสํ เอวํ ทูรคตา สมานา สกฺกสฺส อานุภาเวน พกสฺส อาสา ปูรติเยวาติ ฯ

อถ ราชา ตสฺสา กถํ สุตฺวา รูเป พชฺฌิตฺวา กถาย อลฺลีโน คนฺตุํ อสกฺโกนฺโต อมจฺเจ สนฺนิปาเตตฺวา สตนามํ กาเรสิ ฯ สตนามวเสน นามํ คเวสนฺตสฺสาปิสฺส อญฺญํ สํวจฺฉรํ อตีตํ ฯ โส ติณฺณํ สํวจฺฉรานํ อจฺจเยน โพธิสตฺตํ อุปสงฺกมิตฺวา สตนามวเสน อสุกํ นาม อสุกํ นาม ภวิสฺสติ ภนฺเตติ ปุจฺฉิ ฯ น ชานาสิ มหาราชาติ ฯ โส คมิสฺสามทานิ มยนฺติ โพธิสตฺตํ วนฺทิตฺวา ปายาสิ ฯ อาสงฺกา กุมาริกา ปุน ผลิกวาตปานํ นิสฺสาย ฐิตาว ฯ ราชา ตํ ทิสฺวา ตฺวํ อจฺฉ มยํ คมิสฺสามาติ อาห ฯ กสฺมา มหาราชาติ ฯ ตฺวํ มํ วจเนเนว สนฺตปฺเปสิ น จ กามรติยา ตว มธุรวจเนน พชฺฌิตฺวา วสนฺตสฺส มม ตีณิ สํวจฺฉรานิ อติกฺกนฺตานิ อิทานิ คมิสฺสามีติ วตฺวา อิมา คาถา อาห