ตตฺถ เนตํ ตุมฺเหสูติ ยํ มม ปิยภาวกรณํ มกฺขาทิกํ เยน อหํ อตฺตนาปิ สมนฺนาคตา ตํ ตุมฺเหสุ นตฺถีติ อหมฺปิ เอตํ ชานาม ฯ สนฺติ โลเก อลกฺขิกาติ อญฺเญ ปน พาลา โลเก นิสฺสีลา นิปฺปญฺญา สนฺติ ฯ สงฺฆรนฺตีติ เต นิสฺสีลา นิปฺปญฺญาปิ สมานา เอเตหิ มกฺขิกาทีหิ พหุํ ธนํ สงฺฆรนฺติ ปิณฺฑํ กโรนฺติ ฯ อุโภ นนฺติ ตํ ปน เอเตหิ สงฺฆริตฺวา ฐปิตํ ธนํ อหญฺจ มยฺหเมว ภาตา เทโว จ นาม เทวปุตฺโต เต อุโภปิ เอกโต หุตฺวา วิธมามเส ฯ อมฺหากํ ปน เทวโลเก พหู ทิพฺพปริโภคา อตฺถิ ทิพฺพานิ สยนานิ ตฺวํ ทเทยฺยาสิ วา น วา โก เม ตยา ปนตฺโถติ วตฺวา ปกฺกามิ ฯ

ตสฺสา ปกฺกนฺตกาเล สิรีเทวธีตา สุวณฺณวณฺเณหิ คนฺธวิเลปเนหิ สุวณฺณาลงฺกาเรนาคนฺตฺวา อุปฏฺฐานทฺวาเร ปีตรํสึ วิสฺสชฺเชตฺวา สเมหิ ปาเทหิ สมํ ปฐวิยํ ปติฏฺฐาย สคารวา อฏฺฐาสิ ฯ ตํ ทิสฺวา มหาสตฺโต ปฐมํ คาถมาห

กา นุ ทิพฺเพน วณฺเณน ปฐพฺยา สุปติฏฺฐิตา

กา วา ตฺวํ กสฺส วา ธีตา กถํ ชาเนมุ ตํ มยนฺติ ฯ