ตสฺมึ สมเย มาโร เทวปุตฺโต เอตฺตกํ กาลํ อนุพนฺธนฺโต โอตาราเปกฺโขปิ อิมสฺส กิญฺจิ ขลิตํ นาทฺทส อติกฺกนฺโตทานิ เอส มม วิสยนฺติ โทมนสฺสปฺปตฺโต มหามคฺเค นิสีทิตฺวา โสฬส การณานิ จินฺเตนฺโต ภูมิยํ โสฬส เลขา นิกฑฺฒิ อหํ เอโส วิย ทานปารมึ น ปูเรสึ เตนมฺหิ อิมินา สทิโส น ชาโตติ เอกํ เลขํ อากฑฺฒิ ตถาหํ เอโส วิย สีลปารมึ เนกฺขมฺมปารมึ ปญฺญาปารมึ วิริยปารมึ ขนฺติปารมึ สจฺจปารมึ อธิฏฺฐานปารมึ เมตฺตาปารมึ อุเปกฺขาปารมึ น ปูเรสึ เตนมฺหิ อิมินา สทิโส น ชาโตติ ทสมํ เลขํ อากฑฺฒิ ตถาหํ เอโส วิย อสาธารณสฺส อาสยานุสยญาณสฺส อินฺทฺริยปโรปริยญาณสฺส มหากรุณาสมาปตฺติญาณสฺส ยมกปาฏิหาริยญาณสฺส อนาวรณญาณสฺส สพฺพญฺญุตญาณสฺส ปฏิเวธาย อุปนิสฺสยภูตา ทส ปารมิโย น ปูเรสึ เตนมฺหิ อิมินา สทิโส น ชาโตติ โสฬสมํ เลขํ อากฑฺฒิ ฯ เอวํ อิเมหิ การเณหิ มหามคฺเค โสฬส เลขา อากฑฺฒิยมาเน นิสินฺเน ตสฺมึ สมเย ตณฺหา อรตี ราคา จาติ ติสฺโส มารธีตโร ปิตา โน น ปญฺญายติ กหํ นุ โข เอตรหีติ โอโลกยมานา ตํ โทมนสฺสปฺปตฺตํ ภูมิยํ วิเลขมานํ ทิสฺวา ปิตุ สนฺติกํ คนฺตฺวา กสฺมา ตาต ทุกฺขี ทุมฺมโนสีติ ปุจฺฉึสุ ฯ อมฺมา อยํ มหาสมโณ มยฺหํ วสํ อติกฺกนฺโต เอตฺตกํ โอโลเกนฺโต โอตารมสฺส ทฏฺฐุํ นาสกฺขึ เตนาหํ ทุกฺขี ทุมฺมโนติ ฯ ยทิ เอวํ มา จินฺตยิตฺถ มยเมตํ อตฺตโน วเส ปวตฺตํ กตฺวา อาทาย อาคมิสฺสามาติ ฯ น สกฺกา อมฺมา เอส เกนจิ วเส กาตุํ อจลาย สทฺธาย ปติฏฺฐิโต เอส ปุริโสติ ฯ ตาต มยํ อิตฺถิโย นาม อิทาเนว ตํ ราคปาสาทีหิ พนฺธิตฺวา อาเนสฺสาม ตุมฺเห มา จินฺตยิตฺถาติ ฯ ตา อิโต ภควนฺตํ อุปสงฺกมิตฺวา ปาเท เต สมณ ปริจาเรสฺสามาติ อาหํสุ ฯ ภควา เนว ตาสํ วจนํ มนสิ อกาสิ น อกฺขีนิ อุมฺมิเลตฺวา โอโลเกสิ อนุตฺตเร อุปธิสงฺขเย วิมุตฺตมานโส วิเวกสุขญฺเจว อนุภวนฺโต นิสีทิ ฯ ปุน มารธีตโร อุจฺจาวจา โข ปุริสานํ อธิปฺปายา เกสญฺจิ กุมาริกาสุ เปมํ อโหสิ เกสญฺจิ ปฐมวเย ฐิตาสุ เกสญฺจิ มชฺฌิมวเย เกสญฺจิ ปจฺฉิมวเย ฐิตาสุ ยนฺนูน มยํ นานปฺปกาเรหิ รูเปหิ ปโลเภยฺยามาติ เอกเมกา กุมาริวณฺณาทิวเสน สตํ สตํ อตฺตภาเว อภินิมฺมินิตฺวา กุมาริโย อวิชาตา สกึวิชาตา ทุวิชาตา มชฺฌมิตฺถิโย มหาอิตฺถิโย จ หุตฺวา ฉกฺขตฺตุํ ภควนฺตํ อุปสงฺกมึสุ ปาเท เต สมณ ปริจาเรสฺสามาติ อาหํสุ ฯ ตํปิ ภควา น มนสากาสิ ยถาตํ อนุตฺตเร อุปธิสงฺขเย วิมุตฺโต ฯ เกจิ ปนาจริยา วทนฺติ ตา มหิตฺถีภาเวน อุปคตา ทิสฺวา ภควา เอวเมวํ เอตา ขณฺฑทนฺตา ปลิตเกสา โหนฺตูติ อธิฏฺฐาสีติ ฯ ตํ น คเหตพฺพํ ฯ น หิ สตฺถา เอวรูปํ อธิฏฺฐานํ กโรติ ภควา ปน อเปถ ตุมฺเห กีทิสา เอวํ วายมถ เอวรูปํ นาม อวีตราคาทีนํ ปุรโต กาตุํ วฏฺฏติ ตถาคตสฺส ปน ราโค ปหีโน โทโส โมโหติ อตฺตโน กิเลสปฺปหานํ อารภติ ฯ