ยสฺส ชาลินี วิสตฺติกา

ตณฺหา นตฺถิ กุหิญฺจิ เนตเว

ตํ พุทฺธมนนฺตโคจรํ

อปทํ เกน ปเทน เนสฺสถาติ อิมา ธมฺมปเท พุทฺธวคฺเค เทฺว คาถา วทนฺโต ธมฺมํ กเถสิ ฯ ตา สจฺจํ กิร โน ปิตา อโวจ อรหํ สุคโต โลเก น ราเคน สุวานโยติ อาทีนิ วตฺวา ปิตุ สนฺติกํ อคมํสุ ฯ ภควาปิ ตตฺถ สตฺตาหํ วีตินาเมตฺวา มุจฺจลินฺทมูเล อคมาสิ ตตฺถ สตฺตาหํ วทฺทลิกาย อุปฺปนฺนาย สีตาทิปฏิวาหนตฺถํ มุจฺจลินฺเทน นาม นาคราเชน สตฺตกฺขตฺตุํ โภเคหิ ปริกฺขิตฺโต อสมฺพาธาย คนฺธกุฏิยํ วิหรนฺโต วิย วิมุตฺติสุขํ ปฏิสํเวทยมาโน สตฺตาหํ วีตินาเมตฺวา ราชายตนํ อุปสงฺกมิตฺวา ตตฺถาปิ สตฺตาหํ วิมุตฺติสุขปฏิสํเวทีเยว นิสีทิ ฯ เอตฺตาวตา สตฺตาหานิ ปริปุณฺณานิ ฯ เอตฺถนฺตเร เนว มุขโธวนํ น สรีรปฏิชคฺคนํ น อาหารกิจฺจํ อโหสิ ฯ ฌานสุเขน มคฺคสุเขน ผลสุเขน จ วีตินาเมสิ ฯ อถสฺส ตสฺมึ สตฺตสตฺตาหมตฺถเก เอกูนปญฺญาสมทิวเส ตตฺถ นิสินฺนสฺส มุขํ โธวิสฺสามีติ จิตฺตํ อุทปาทิ ฯ สกฺโก เทวานมินฺโท อตฺตนา หรีตกํ อาหริตฺวา อทาสิ ฯ สตฺถา ตํ ปริภุญฺชิ ฯ เตนสฺส สรีรวลญฺชํ อโหสิ ฯ อถสฺส สกฺโกเยว นาคลตาทนฺตกฏฺฐญฺเจว มุขโธวนอุทกญฺจ อทาสิ ฯ สตฺถา ทนฺตกฏฺฐํ ขาทิตฺวา อโนตตฺตทหอุทเกน มุขํ โธวิตฺวา ตตฺเถว ราชายตนมูเล นิสีทิ ฯ