ตทาหํ สุขิโต มุตฺโต อปิ ปสฺเสมุ มาตรนฺติ ฯ

ตตฺถ นิวาปานีติ เตสุ เตสุ ฐาเนสุ นิวุตานิ นิวาปานิ ฯ ปานโภชนนฺติ ปานียญฺจ อวเสสติณญฺจ ฯ ตํ ราชปิณฺฑนฺติ ตํ รญฺโญ สนฺตกํ สงฺกฑฺฒิตฺวา สโมธานกฏฺเฐน ปิณฺฑํ ฯ อวภุตฺตุนฺติ ทุพฺภุตฺตํ ภุญฺชิตุํ ฯ รญฺโญ หิ กิจฺจํ อนิปฺผาเทนฺโต ตํ อวภุตฺตํ ภุญฺชติ นาม สฺวาหํ เอวํ อวภุตฺตุํ น อุสฺสหามีติ วทติ ฯ พฺราหฺมณมุสฺสเหติ เอตฺถ พฺราหฺมณาติ อาลปนํ มกาโร ปน ปทสนฺธิวเสน วุตฺโต ฯ โอทหิสฺสามหํ ปสฺสํ ขุรปาณิสฺส ราชิโนติ อหํ พฺราหฺมณ อตฺตโน วาเร สมฺปตฺเต ขุรปฺปํ สนฺนหิตฺวา อาคตสฺส รญฺโญ มิคยูถโต นิกฺขมิตฺวา เอกมนฺตํ ฐตฺวา มํ วิชฺฌ มหาราชาติ วตฺวา อตฺตโน มหาผาสุกปสฺสํ โอทหิสฺสามิ ฯ สุขิโต มุตฺโตติ ตทา อหํ มรณภยา มุตฺโต สุขิโต นิทฺทุกฺโข รญฺญา อนุญฺญาโต อปิ นาม มาตรํ ปสฺเสยฺยนฺติ ฯ

ตํ สุตฺวา พฺราหฺมโณ ปกฺกามิ ฯ อปรภาเค ตสฺส วารทิวเส ราชา มหนฺเตน ปริวาเรน อุยฺยานํ อาคจฺฉิ ฯ มหาสตฺโต เอกมนฺเต อฏฺฐาสิ ฯ ราชา มิคํ วิชฺฌิสฺสามีติ ขุรปฺปํ สนฺนหิ ฯ มหาสตฺโต ยถา อญฺเญ มรณภยตชฺชิตา ปลายนฺติ เอวํ อปลายิตฺวา นิพฺภโย หุตฺวา เมตฺตํ ปุเรจาริกํ กตฺวา มหาผาสุกปสฺสํ โอทหิตฺวา นิจฺจโลว อฏฺฐาสิ ฯ ราชา ตสฺส เมตฺตานุภาเวน สรํ วิสฺสชฺเชตุํ นาสกฺขิ ฯ มหาสตฺโต กึ มหาราช สรํ น มุจฺจสิ มุญฺจาหีติ อาห ฯ น สกฺโกมิ มิคราชาติ ฯ เตนหิ คุณวนฺตานํ คุณํ ชานถ มหาราชาติ ฯ ตทา ราชา โพธิสตฺเต ปสีทิตฺวา ธนุํ ฉฑฺเฑตฺวา อิทํ อจิตฺตกํ กลิงฺครกณฺฑํปิ ตาว ตว คุณํ ชานาติ สจิตฺตโก มนุสฺสภูโตปิ อหํ น ชานามิ มยฺหํ ขม อภยํ เต ทมฺมีติ อาห ฯ มหาราช มยฺหํ ตาว อภยํ เทสิ อยํ อุยฺยาเน มิคคโณ กึ กริสฺสตีติ ฯ เอเตสํปิ อภยํ ทมฺมีติ ฯ เอวํ มหาสตฺโต นิโคฺรธชาตเก วุตฺตนเยเนว สพฺเพสํ อรญฺญมิคานํ อากาสคตสกุณานํ ชลจรมจฺฉานํ จ อภยํ ทาเปตฺวา ราชานํ ปญฺจสุ สีเลสุ ปติฏฺฐาเปตฺวา มหาราช รญฺญา นาม อคติคมนํ ปหาย ทส ราชธมฺเม อโกเปนฺเตน ธมฺเมน สเมน รชฺชํ กาเรตุํ วฏฺฏตีติ

ทานํ สีลํ ปริจฺจาคํ อาชฺชวํ มทฺทวํ ตปํ