ตทาหํ สุขิโต มุตฺโต มาตรํ ทฏฺฐุมาคโตติ ฯ

ตตฺถ โกสลสฺส นิเกตเวติ โกสลสฺส รญฺโญ นิเกเต วสนฏฺฐาเน ตสฺส สนฺติเก อรญฺญสฺมินฺติ อตฺโถ ฯ ทายสฺมินฺติ มิคานํ วสนตฺถาย ทินฺนอุยฺยาเน ฯ อารชฺชํ กตฺวานาติ ชิยาย สทฺธึ เอกโต หุตฺวา อาโรเปตฺวาติ อตฺโถ ฯ สนฺธายาติ สนฺนหิตฺวา โยเชตฺวา ฯ โอทหินฺติ โอฑฺเฑสึ ฯ มาตฺรํ ทฏฺฐุมาคโตติ เทสนาสีสเมตํ ฯ รญฺโญ ธมฺมํ เทเสตฺวา สพฺพสตฺตานํ อภยตฺถาย สุวณฺณเภริญฺจาราเปตฺวา มาตาปิตโร ทฏฺฐุมาคโตสฺมีติ อตฺโถ ฯ

สตฺถา อิมํ ธมฺมเทสนํ อาหริตฺวา สจฺจานิ ปกาเสตฺวา ชาตกํ สโมธาเนสิ สจฺจปริโยสาเน มาตุโปสกภิกฺขุ โสตาปตฺติผเล ปติฏฺฐหิ ตทา มาตาปิตโร มหาราชกุลานิ อเหสุํ พฺราหฺมโณ สารีปุตฺโต อโหสิ ราชา อานนฺโท อโหสิ นนฺทิยมิคราชา ปน อหเมวาติ ฯ

นนฺทิยมิคราชชาตกํ ทสมํ ฯ