ตสฺมึ สมเย ตปุสฺสภลฺลิกา นาม เทฺว วาณิชา ปญฺจหิ สกฏสเตหิ อุกฺกลาชนปทา มชฺฌิมปฺปเทสํ คจฺฉนฺโต อตฺตโน ญาติสาโลหิตาย เทวตาย สกฏานิ สนฺนิรุมฺหิตฺวา สตฺถุ อาหารสมฺปาทเน อุสฺสาหิตา มนฺถญฺจ มธุปิณฺฑิกญฺจ อาทาย ปฏิคฺคณฺหาตุ โน ภนฺเต ภควา อิมํ อาหารํ อนุกมฺปํ อุปาทายาติ สตฺถารํ อุปสงฺกมิตฺวา อฏฺฐํสุ ฯ ภควา ปน ปายาสปฏิคฺคหณทิวเสเยว ปตฺตสฺส อนฺตรหิตตฺตา น โข ตถาคตา หตฺเถสุ ปฏิคฺคณฺหนฺติ กึ นุ โข อหํ ปฏิคฺคณฺเหยฺยนฺติ จินฺเตสิ ฯ อถสฺส จิตฺตํ ญตฺวา จตูหิ ทิสาหิ จตฺตาโร มหาราชาโน อินฺทนีลมณิมเย ปตฺเต อุปนาเมสุํ ฯ ภควา เต ปฏิกฺขิปิ ฯ ปุน มุคฺควณฺณเสลมเย จตฺตาโร ปตฺเต อุปนาเมสุํ ฯ ภควา จตุนฺนํปิ เทวปุตฺตานํ อนุกมฺปาย จตฺตาโร ปตฺเตปิ ปฏิคฺคเหตฺวา อุปรุปริ ฐเปตฺวา เอโก โหตูติ อธิฏฺฐหิ ฯ จตฺตาโรปิ มุขวฏฺฏิยํ ปญฺญายมานา เลขา หุตฺวา มชฺฌิเมน ปมาเณน เอกตฺตํ อุปคมึสุ ฯ ภควา ตสฺมึ ปจฺจกฺเข เสลมเย ปตฺเต อาหารํ ปฏิคฺคณฺหิตฺวา ปริภุญฺชิตฺวา อนุโมทนํ อกาสิ ฯ เทฺว ภาตโร วาณิชา พุทฺธญฺจ ธมฺมญฺจ สรณํ คนฺตฺวา เทฺววาจิกา อุปาสกา อเหสุํ ฯ อถ เนสํ เอกนฺโน ภนฺเต ปริจาริตพฺพฏฺฐานํ เทถาติ วทนฺตานํ ทกฺขิณหตฺเถน อตฺตโน สีสํ ปรามสิตฺวา เกสธาตุโย อทาสิ ฯ เต อตฺตโน นคเร เกสธาตุโย อนฺโต ปกฺขิปิตฺวา เจติยํ ปติฏฺฐาเปสุํ ฯ

สมฺมาสมฺพุทฺโธปิ โข ตโต ปฏฺฐาย ปุน อชปาลนิโคฺรธเมว คนฺตฺวา นิโคฺรธมูเล นิสีทิ ฯ อถสฺส ตตฺถ นิสินฺนมตฺตสฺเสว อตฺตนา อธิคตสฺส ธมฺมสฺส คมฺภีรตํ ปจฺจเวกฺขนฺตสฺส สพฺพพุทฺธานํ อาจิณฺโณ อธิคโต โข มยายํ ธมฺโมติ ปเรสํ ธมฺมํ อเทเสตุกามฺยตาการปฺปตฺโต วิตกฺโก อุทปาทิ ฯ อถ พฺรหฺมา สหมฺปติ นสฺสติ วต โภ โลโก วินสฺสติ วต โภ โลโกติ ทสหิ จกฺกวาฬสหสฺเสหิ สกฺกสุยามสนฺตุสิตวสวตฺติมหาพฺรหฺมาโน อาทาย สตฺถุ สนฺติกํ คนฺตฺวา เทเสตุ ภนฺเต ภควา ธมฺมนฺติ อาทินา นเยน ธมฺมเทสนํ อายาจิ ฯ สตฺถา ตสฺส ปฏิญฺญํ ทตฺวา กสฺส นุ โข อหํ ปฐมํ ธมฺมํ เทเสยฺยนฺติ จินฺเตนฺโต อาฬาโร ปณฺฑิโต โส อิมํ ธมฺมํ ขิปฺปํ อาชานิสฺสตีติ จิตฺตํ อุปฺปาเทตฺวา ปุน โอโลเกนฺโต ตสฺส สตฺตาหํ กาลกตภาวํ ญตฺวา อุทฺทกํ อาวชฺเชสิ ตสฺสาปิ อภิโทสกาลกตภาวํ ญตฺวา พหุปการา โข เม ปญฺจวคฺคิยา ภิกฺขูติ ปญฺจวคฺคิเย อารพฺภ มนสิการํ กตฺวา กหํ นุ โข เต เอตรหิ วิหรนฺตีติ อาวชฺเชนฺโต พาราณสิยํ มิคทาเยติ ญตฺวา ตตฺถ คนฺตฺวา ธมฺมจกฺกํ ปวตฺเตสฺสามีติ กติปาหํ โพธิมณฺฑสามนฺตาเยว ปิณฺฑาย จรนฺโต อาสาฬฺหปุณฺณมาสิยํ พาราณสึ คมิสฺสามีติ จาตุทฺทสิยํ ปจฺจูสสมเย ปภาตาย รตฺติยา กาลสฺเสว ปตฺตจีวรมาทาย อฏฺฐารสโยชนมคฺคํ ปฏิปนฺโน อนฺตรามคฺเค อุปกนฺนาม อาชีวกํ ทิสฺวา ตสฺส ตํ อตฺตโน พุทฺธภาวํ อาจิกฺขิตฺวา ตํ ทิวสํเยว สายณฺหสมเย อิสิปตนํ อคมาสิ ฯ