ปญฺจวคฺคิยา เถรา ตถาคตํ ทูรโตว อาคจฺฉนฺตํ ทิสฺวา อยํ อาวุโส สมโณ โคตโม ปจฺจยพาหุลฺลาย อาวตฺติตฺวา ปริปุณฺณกาโย ปิณินฺทฺริโย สุวณฺณวณฺโณ หุตฺวา อาคจฺฉติ อิมสฺส อภิวาทนาทีนิ น กริสฺสาม มหากุลปฺปสูโต โข ปเนส อาสนาภิหารํ อรหติ เตนสฺส อาสนมตฺตํ ปญฺญาเปสฺสามาติ กติกํ อกํสุ ฯ ภควา สเทวกสฺส โลกสฺส จิตฺตวารํ ชานนสมตฺเถน ญาเณน กึ นุ โข อิเม จินฺตยึสูติ อาวชฺเชตฺวา จิตฺตํ อญฺญาสิ ฯ อถ เน สพฺพเทวมนุสฺเสสุ อโนทิสฺสกวเสน ผรณสมตฺถํ เมตฺตจิตฺตํ สงฺขิปิตฺวา โอทิสฺสกวเสน เมตฺตจิตฺเตน ผริ ฯ เต ภควตา เมตฺเตน จิตฺเตน ผุฏฺฐา ตถาคเต อุปสงฺกมนฺเต สกาย กติกาย สณฺฐาตุํ อสกฺโกนฺตา อภิวาทนปจฺจุฏฺฐานาทีนิ สพฺพกิจฺจานิ อกํสุ สมฺมาสมฺพุทฺธภาวํ ปนสฺส อชานมานา เกวลํ นาเมน จ อาวุโสวาเทน จ วาจํ สมุทาจรนฺติ ฯ อถ เน ภควา มา ภิกฺขเว ตถาคตํ นาเมน จ อาวุโสวาเทน จ สมุทาจรถ อรหํ ภิกฺขเว ตถาคโต สมฺมาสมฺพุทฺโธติ อตฺตโน พุทฺธภาวํ สญฺญาเปตฺวา ปญฺญตฺตปวรพุทฺธาสเน นิสินฺโน อุตฺตราสาฬฺหนกฺขตฺตโยเค วตฺตมาเน อฏฺฐารสพฺรหฺมโกฏีหิ ปริวุโต ปญฺจวคฺคิเย เถเร อามนฺเตสิ ธมฺมจกฺกปฺปวตฺตนสุตฺตนฺตํ เทเสสิ ฯ เตสุ อญฺญาโกณฺฑญฺญตฺเถโร เทสนานุสาเรน ญาณํ เปเสนฺโต สุตฺตปริโยสาเน อฏฺฐารสหิ พฺรหฺมโกฏีหิ สทฺธึ โสตาปตฺติผเล ปติฏฺฐาสิ ฯ สตฺถา ตตฺเถว วสฺสํ อุปคนฺตฺวา ปุนทิวเส วปฺปตฺเถรํ โอวทนฺโต วิหาเรเยว นิสีทิ ฯ เสสา จตฺตาโร ปิณฺฑาย จรึสุ ฯ วปฺปตฺเถโร ปุพฺพณฺเหเยว โสตาปตฺติผลํ ปาปุณิ ฯ เอเตเนว อุปาเยน จ ปุนทิวเส ภทฺทิยตฺเถรํ ปุนทิวเส มหานามตฺเถรํ ปุนทิวเส อสฺสชิตฺเถรนฺติ สพฺเพ โสตาปตฺติผเล ปติฏฺฐาเปตฺวา ปญฺจมิยํ ปกฺขสฺส ปญฺจปิ ชเน สนฺนิปาเตตฺวา อนตฺตลกฺขณสุตฺตนฺตํ เทเสสิ ฯ เทสนาปริโยสาเน ปญฺจปิ เถรา อรหตฺเต ปติฏฺฐหึสุ ฯ

อถ สตฺถา ยสสฺส กุลปุตฺตสฺส อุปนิสฺสยํ ทิสฺวา ตํ รตฺติภาเค นิพฺพิชฺชิตฺวา เคหํ ปหาย นิกฺขนฺตํ เอหิ ยสาติ ปกฺโกสิตฺวา ตสฺมึเยว รตฺติภาเค โสตาปตฺติผเล ปติฏฺฐาเปสิ ฯ ปุนทิวเส อรหตฺเต ปติฏฺฐาเปตฺวา อปเรปิ ตสฺส สหายเก จตุปฺปญฺญาส ชเน เอหิภิกฺขุปพฺพชฺชาย ปพฺพาเชตฺวา อรหตฺตํ ปาเปสิ ฯ เอวํ หิ โลเก เอกสฏฺฐิยา อรหนฺเตสุ ชาเตสุ สตฺถา วุตฺถวสฺโส ปวาเรตฺวา จรถ ภิกฺขเว จาริกนฺติ สฏฺฐิภิกฺขู ทิสาสุ เปเสตฺวา สยํ อุรุเวลํ คจฺฉนฺโต อนฺตรามคฺเค กปฺปาสิกวนสณฺเฑ ตึสชเน ภทฺทวคฺคิยกุมาเร วิเนสิ ฯ เตสุ สพฺพปจฺฉิมโก โสตาปนฺโน สพฺพอุตฺตโม อนาคามี อโหสิ ฯ เตปิ สพฺเพ เอหิภิกฺขุภาเวเนว ปพฺพาเชตฺวา ทิสาสุ เปเสตฺวา อุรุเวลํ คนฺตฺวา อฑฺฒุฑฺฒานิ ปาฏิหาริยสหสฺสานิ ทสฺเสตฺวา อุรุเวลกสฺสปาทโย สหสฺสชฏิลปริวาเร เตภาติกชฏิเล วิเนตฺวา เอหิภิกฺขุภาเวเนว ปพฺพาเชตฺวา คยาสีเส นิสีทาเปตฺวา อาทิตฺตปริยายเทสนาย อรหตฺเต ปติฏฺฐาเปตฺวา เตน อรหนฺตสหสฺเสน ปริวุโต พิมฺพิสารรญฺโญ ทินฺนปฏิญฺญํ โมเจสฺสามีติ ราชคหนครูปจาเร ลฏฺฐิวนุยฺยานํ อคมาสิ ฯ ราชา อุยฺยานปาลสฺส สนฺติกา สตฺถา อาคโตติ สุตฺวา ทฺวาทสนหุเตหิ พฺราหฺมณคหปติเกหิ ปริวุโต สตฺถารํ อุปสงฺกมิตฺวา จกฺกวิจิตฺตตเลสุ สุวณฺณปฏฺฏวิตานํ วิย ปภาย สมุทยํ วิสฺสชฺเชนฺเตสุ ตถาคตสฺส ปาเทสุ สิรสา นิปติตฺวา เอกมนฺเต นิสีทิ สทฺธึ ปริสาย ฯ อถ โข เตสํ พฺราหฺมณคหปติกานํ เอตทโหสิ กึ นุ โข มหาสมโณ อุรุเวลกสฺสเป พฺรหฺมจริยํ จรติ อุทาหุ อุรุเวลกสฺสโป มหาสมเณติ ฯ ภควา เตสํ เจโตปริวิตกฺกมญฺญาย เถรํ คาถาย อชฺฌภาสิ