อิมญฺจ เต ปิตา ภทฺเท สูจึ ชญฺญา มยา กตํ

ตยา จ มํ นิมนฺเตยฺย ยญฺจตฺถญฺญํ ฆเร ธนนฺติ ฯ

ตตฺถ สูจินฺติ วิภตฺติวิปลฺลาโส กโต ฯ อิทํ วุตฺตํ โหติ สูจิ นาม ปชานตา ปณฺฑิเตน ปุริเสน กมฺมารคามสฺมึเยว วิกฺเกตพฺพา ฯ กึการณา ฯ อาจริยา ปชานนฺติ กมฺมํ สุกตทุกฺกฏนฺติ ตสฺส สิปฺปสฺส อาจริยา จ ตสฺมึ ตสฺมึ สิปฺเป สุกตทุกฺกฏํ กมฺมํ ชานนฺติ สฺวาหํ กมฺมารกมฺมํ อชานนฺตานํ คหปติกานํ คามํ คนฺตฺวา มม สูจิยา สุกตทุกฺกฏภาวํ กถํ ชานาเปสฺสามิ อิมสฺมึ ปน คาเม มม พลํ ชานาเปสฺสามีติ ฯ เอวํ โพธิสตฺโต อิมาย คาถาย อตฺตโน พลํ วณฺเณสิ ฯ ตยา จ มํ นิมนฺเตยฺยาติ ภทฺเท สเจ ตว ปิตา อิมํ มยา กตํ สูจึ อีทิสา วา เอสา เอวํ ปากฏาติ ชาเนยฺย อิมํ เต ธีตรํ ปาทปริจาริกํ ทมฺมิ คณฺหาติ นนฺติ เอวํ ตยา จ มํ นิมนฺเตยฺย ฯ ยญฺจตฺถญฺญํ ฆเร ธนนฺติ ยญฺจ อญฺญํ สวิญฺญาณกํ วา อวิญฺญาณกํ วา ฆเร ธนํ อตฺถิ เตน มํ นิมนฺเตยฺย ฯ ยญฺจสฺสญฺญนฺติปิ ปาโฐ ฯ ยญฺจ อสฺส ฆเร อญฺญํ ธนํ อตฺถีติ อตฺโถ ฯ

กมฺมารเชฏฺฐโก สพฺพํ เตสํ กถํ สุตฺวา อมฺมาติ ธีตรํ ปกฺโกสิตฺวา เกน สทฺธึ สลฺลปสีติ ปุจฺฉิ ฯ ตาต เอโก ปุริโส สูจึ วิกฺกีณติ เตน สทฺธินฺติ ฯ โส ปกฺโกสาหิ นนฺติ ฯ สา คนฺตฺวา ปกฺโกสิ ฯ โส โพธิสตฺโต เคหํ ปวิสิตฺวา กมฺมารเชฏฺฐกํ วนฺทิตฺวา อฏฺฐาสิ ฯ อถ นํ โส กตรคามวาสิโกสีติ ปุจฺฉิ ฯ อสุกคามวาสิโกมฺหิ อสุกกมฺมารสฺส นาม ปุตฺโตติ ฯ กสฺมา อิธาคโตสีติ ฯ สูจิวิกฺกีณตฺถายาติ อาห ฯ สูจึ เต ปสฺสามาติ ฯ โพธิสตฺโต อตฺตโน คุณํ สพฺเพสํ มชฺเฌ ปกาเสตุกาโม นนุ เอกกานํ โวโลกิตโต สพฺเพสํ มชฺเฌ โวโลกิตุํ วรตรนฺติ อาห ฯ โส สาธุ ตาตาติ สพฺเพ กมฺมาเร สนฺนิปาเตตฺวา เตหิ ปริวุโต อาหร ตาต มยํ ปสฺสาม เต สูจินฺติ อาห ฯ อาจริย เอกํ อธิกรณญฺจ อุทกปุณฺณญฺจ กํสถาลํ อาหราเปถาติ ฯ โส อาหราเปสิ ฯ โพธิสตฺโต โอวฏฺฏิกโต สูจินาฬิกํ วิวริตฺวา อทาสิ ฯ กมฺมารเชฏฺฐโก ตโต สูจึ นีหริตฺวา อยํ ตาต สูจีติ ปุจฺฉิ ฯ นายํ สูจิ สูจิโกสโก เอโสติ ฯ โส อุปธาเรนฺโต เนวนฺตํ น โกฏึ อทฺทส ฯ โพธิสตฺโต อาหราเปตฺวา นเขน โกสกํ อปเนตฺวา อยํ สูจิ อยํ โกสโกติ มหาชนสฺส ทสฺเสตฺวา สูจึ อาจริยสฺส หตฺเถ โกสกํ ปาทมูเล ฐเปสิ ฯ ปุน เตน อยํ มญฺเญ ตาต สูจีติ วุตฺโต อยํปิ น สูจิ สูจิโกสโกเยวาติ วตฺวา นเขน ปหรนฺโต ปฏิปาฏิยา ฉ โกสเก กมฺมารเชฏฺฐกสฺส ปาทมูเล ฐเปตฺวา อยํ สูจีติ ตสฺส หตฺเถ ฐเปสิ ฯ กมฺมารสหสฺสา องฺคุลิโย โปเฐสุํ เจลุกฺเขปา ปวตฺตยึสุ ฯ อถ นํ กมฺมารเชฏฺฐโก ตาต อิมาย สูจิยา กึ พลนฺติ ปุจฺฉิ ฯ อาจริย พลวตา ปุริเสน อธิกรณํ อุกฺขิปาเปตฺวา อธิกรณิยา เหฏฺฐา อุทกปาฏึ ฐปาเปตฺวา อธิกรณิยา มชฺเฌ อิมํ สูจึ ปหรถาติ ฯ โส ตถา กาเรตฺวา อธิกรณิยา มชฺเฌ สูจึ อคฺเค ปหริ ฯ สา อธิกรณึ วินิวิชฺฌิตฺวา อุทกปิฏฺเฐ เกสคฺคมตฺตมฺปิ อุทฺธํ วา อโธ วา อหุตฺวา ติริยํ ปติฏฺฐาสิ ฯ สพฺเพ กมฺมารา อมฺเหหิ เอตฺตกํ กาลํ กมฺมารา นาม เอทิสา โหนฺตีติ สุตวเสนปิ น สุตปุพฺพนฺติ องฺคุลิโย โปเฐตฺวา เจลุกฺเขปสหสฺสานิ ปวตฺตยึสุ ฯ กมฺมารเชฏฺฐโก ธีตรํ ปกฺโกสาเปตฺวา ตสฺมึเยว จ ปริสมชฺเฌ อยํ กุมาริกา ตุยฺหํเยว อนุจฺฉวิกาติ อุทกํ ปาเตตฺวา อทาสิ ฯ โส อปรภาเค กมฺมารเชฏฺฐกสฺส อจฺจเยน ตสฺมึ คาเม กมฺมารเชฏฺฐโก อโหสิ ฯ