ปุพฺเพว ทานา สุมโน ททํ จิตฺตํ ปสาทเย

ทตฺวา อตฺตมโน โหติ เอสา ปุญฺญสฺส สมฺปทา ฯ อิติ มหาราช อาคนฺตุกเสฏฺฐี ตครสิขิปจฺเจกพุทฺธสฺส ทินฺนปจฺจเยน พหุํ ธนํ ปฏิลภิตฺวา อปรเจตนํ ปณีตํ กาตุํ อสมตฺถตาย โภเค ภุญฺชิตุํ นาสกฺขีติ ฯ ปุตฺตํ ปน กสฺมา น ลภิ ภนฺเตติ ฯ สตฺถา ปุตฺตสฺส อลภนการณํปิ เตเนว กตํ มหาราชาติ เตน ยาจิโต อตีตํ อาหริ

อตีเต พาราณสิยํ พฺรหฺมทตฺเต รชฺชํ กาเรนฺเต โพธิสตฺโต อสีติโกฏิวิภเว เสฏฺฐิกุเล นิพฺพตฺติตฺวา วยปฺปตฺโต มาตาปิตูนํ อจฺจเยน กนิฏฺฐํ สงฺคณฺหิตฺวา กุฏุมฺพํ วิจาเรนฺโต ฆรทฺวาเร ทานสาลํ กาเรตฺวา มหาทานํ ปวตฺเตนฺโต อคารํ อชฺฌาวสิ ฯ อถสฺส เอโก ปุตฺโต วิชายิ ฯ โส ตสฺส ปทสา คมนกาเล กาเมสุ อาทีนวํ ทิสฺวา เนกฺขมฺเม อานิสํสํ ทิสฺวา สทฺธึ ปุตฺตทาเรน สพฺพํ ฆรวิภวํ กนิฏฺฐสฺส นิยฺยาเทตฺวา อปฺปมตฺโต ทานํ ปวตฺเตหีติ โอวาทํ ทตฺวา อิสิปพฺพชฺชํ ปพฺพชิตฺวา อภิญฺญา จ สมาปตฺติโย จ นิพฺพตฺเตตฺวา หิมวนฺตปฺปเทเส วิหาสิ ฯ กนิฏฺโฐปิสฺส เอกํ ปุตฺตํ ปฏิลภติ ฯ โส ตํ วฑฺฒนฺตํ ทิสฺวา จินฺเตสิ มม ภาตุ ปุตฺเต ชีวนฺเต กุฏุมฺพํ ภินฺทิตฺวา ทฺวิธา ภวิสฺสติ ภาตุ ปุตฺตํ มาเรสฺสามีติ ฯ อถ นํ เอกทิวสํ นทิยํ โอปิลาเปตฺวา มาเรสิ ฯ ตเมนํ นหาตฺวา อาคตํ ภาตุ ชายา กุหึ มม ปุตฺโตติ ปุจฺฉิ ฯ นทิยํ อุทกกีฬํ กีฬิ อถ นํ วิจินนฺโต นาทฺทสนฺติ ฯ สา โรทิตฺวา ตุณฺหี อโหสิ ฯ โพธิสตฺโต ตํ ปวตฺตึ ญตฺวา อิทํ กิจฺจํ ปากฏํ กริสฺสามีติ อากาเสนาคนฺตฺวา พาราณสึ โอตริตฺวา สุนิวตฺโถ สุปารุโต ตสฺส ฆรทฺวาเร ฐตฺวา ทานสาลํ อทิสฺวา ทานสาลาปิ อิมินา อสปฺปุริเสน นาสิตาติ จินฺเตสิ ฯ กนิฏฺโฐปิสฺส ตสฺส อาคตภาวํ สุตฺวา อาคนฺตฺวา มหาสตฺตํ วนฺทิตฺวา ปาสาทํ อาโรเปตฺวา สุโภชนํ โภเชสิ ฯ โส ภตฺตกิจฺจาวสาเน สุขกถาย นิสินฺโน ทารโก น ปญฺญายติ กถํ นุ โข โสติ ปุจฺฉิ ฯ มโต ภนฺเตติ ฯ เกน การเณนาติ ฯ อุทกกีฬนฏฺฐาเน อสุกการเณนาติ น ชานามีติ ฯ กึ ตฺวํ อสปฺปุริส น ชานิสฺสสิ ตยา กตกิจฺจํ มยฺหํ ปากฏํ นนุ ตฺวํ อิมินา นาม การเณน ตํ มาเรสิ กึ นุ โข ตฺวํ ราชาทีนํ วเสน นสฺสมานํ ธนํ รกฺขิตุํ สกฺกุเณยฺยาสิ มยฺหกสกุณสฺส จ ตุยฺหญฺจ กึนานากรณนฺติ ฯ อถสฺส มหาสตฺโต พุทฺธลีฬาย ธมฺมํ เทเสนฺโต อิมา คาถา อภาสิ