โส ทสสตปริวาโร ราชคหํ ปาวิสิ ภควาติ อิมาหิ คาถาหิ สตฺถุ วณฺณํ วทมาโน ปุรโต ปายาสิ ฯ มหาชโน มาณวกสฺส รูปสิรึ ทิสฺวา อติวิย อภิรูโป อยํ มาณวโก น โข ปนมฺเหหิ ทิฏฺฐปุพฺโพติ จินฺเตตฺวา กุโต อยํ มาณวโก กสฺส วา อยนฺติ อาห ฯ ตํ สุตฺวา มาณวโก

โย ธีโร สพฺพธี ทนฺโต เสฏฺโฐ อปฺปฏิปุคฺคโล

อรหํ สุคโต โลเก ตสฺสาหํ ปริจาริโกติ คาถํ อาห ฯ สตฺถา สกฺเกน กโตกาสํ มคฺคํ ปฏิปชฺชิตฺวา ภิกฺขุสหสฺสปริวุโต ราชคหํ ปาวิสิ ฯ ราชา พุทฺธปฺปมุขสฺส สงฺฆสฺส มหาทานํ ทตฺวา อหํ ภนฺเต ตีณิ รตนานิ วินา วตฺติตุํ น สกฺขิสฺสามิ เวลาย วา อเวลาย วา ภควโต สนฺติกํ อาคมิสฺสามิ ลฏฺฐิวนุยฺยานญฺจ นาม อติทูเร อิทํ ปน อมฺหากํ เวฬุวนนฺนาม อุยฺยานํ นาติทูเร นาจฺจาสนฺเน คมนาคมนสมฺปนฺนํ พุทฺธารหํ เสนาสนํ อิมํ เม ภควา ปฏิคฺคณฺหาตูติ สุวณฺณภิงฺคาเรน ปุปฺผคนฺธวาสิตํ มณิวณฺณํ อุทกํ อาทาย เวฬุวนํ อุยฺยานํ ปริจฺจชนฺโต ทสพลสฺส หตฺเถ อุทกํ ปาเปสิ ฯ ตสฺมึ อารามปฏิคฺคหเณ พุทฺธสาสนสฺส มูลานิ โอติณฺณานีติ มหาปฐวี กมฺปิ ฯ ชมฺพูทีปสฺมึ หิ ฐเปตฺวา เวฬุวนํ อญฺญํ ปฐวึ กมฺเปตฺวา คหิตเสนาสนนฺนาม นตฺถิ ฯ ตามฺพปณฺณิทีเปปิ ฐเปตฺวา มหาวิหารํ อญฺญํ ปฐวึ กมฺเปตฺวา คหิตเสนาสนนฺนาม นตฺถิ ฯ สตฺถา เวฬุวนารามํ ปฏิคฺคเหตฺวา รญฺโญ อนุโมทนํ กตฺวา อุฏฺฐายาสนา ภิกฺขุสงฺฆปริวุโต เวฬุวนํ อคมาสิ ฯ

ตสฺมึ โข ปน สมเย สารีปุตฺโต โมคฺคลฺลาโน จาติ เทฺวปิ ปริพฺพาชกา ราชคหํ อุปนิสฺสาย วิหรนฺติ อมตํ ปริเยสมานา ฯ เตสุ สารีปุตฺโต อสฺสชิตฺเถรํ ปิณฺฑาย ปวิฏฺฐํ ทิสฺวา ปสนฺนจิตฺโต ปยิรุปาสิตฺวา เย ธมฺมา เหตุปฺปภวาติ คาถํ สุตฺวา โสตาปตฺติผเล ปติฏฺฐาย อตฺตโน สหายกสฺส โมคฺคลฺลานสฺส ปริพฺพาชกสฺสาปิ ตเมว คาถํ อภาสิ ฯ โสปิ โสตาปตฺติผเล ปติฏฺฐหิ ฯ เต อุโภปิ สญฺชยํ โอโลเกตฺวา อตฺตโน ปริสาย สทฺธึ สตฺถุ สนฺติเก ปพฺพชิตฺวา เตสุ มหาโมคฺคลฺลาโน สตฺตาเหน อรหตฺตํ ปาปุณิ สารีปุตฺตตฺเถโร อฑฺฒมาเสน ฯ อุโภปิ ชเน อคฺคสาวกฏฺฐาเน ฐเปสิ สารีปุตฺตตฺเถเรน อรหตฺตปฺปตฺตทิวเสเยว จ สาวกสนฺนิปาตํ อกาสิ ฯ