ตถาคเต ปน ตสฺมิญฺเญว เวฬุวนุยฺยาเน วิหรนฺเต สุทฺโธทนมหาราชา ปุตฺโต กิร เม ฉ วสฺสานิ ทุกฺกรการิกํ จริตฺวา ปรมาภิสมฺโพธึ ปตฺวา ปวตฺติตปวรธมฺมจกฺโก ราชคหํ นิสฺสาย เวฬุวเน วิหรตีติ สุตฺวา อญฺญตรํ อมจฺจํ อามนฺเตสิ เอหิ ภเณ ปุริสสหสฺสปริวาโร ราชคหํ คนฺตฺวา มม วจเนน ปิตา เต สุทฺโธทนมหาราชา ทฏฺฐุกาโมติ วตฺวา ปุตฺตํ เม คณฺหิตฺวา เอหีติ อาห ฯ โส เอวํ เทวาติ รญฺโญ วจนํ สิรสา สมฺปฏิจฺฉิตฺวา ปุริสสหสฺสปริวาโร ขิปฺปเมว สฏฺฐิโยชนมคฺคํ คนฺตฺวา ทสพลสฺส จตุปริสมชฺเฌ นิสีทิตฺวา ธมฺมเทสนเวลาย วิหารํ ปาวิสิ ฯ โส ติฏฺฐตุ ตาว รญฺโญ ปหิตสาสนนฺติ ปริสปริยนฺเต ฐิโต สตฺถุ ธมฺมเทสนํ สุตฺวา ยถาฐิโตว สทฺธึ ปุริสสหสฺเสน อรหตฺตํ ปตฺวา ปพฺพชฺชํ ยาจิ ฯ ภควา เอถ ภิกฺขโวติ หตฺถํ ปสาเรสิ ฯ สพฺเพ ตํ ขณํเยว อิทฺธิมยปตฺตจีวรธรา วสฺสสติกตฺเถรา วิย อเหสุํ ฯ อรหตฺตปฺปตฺตกาลโต ปฏฺฐาย ปน อริยา นาม มชฺฌตฺตาว โหนฺติ ฯ ตสฺมา รญฺโญ ปหิตสาสนํ ทสพลสฺส น กเถสิ ฯ ราชา เนว คโตว อาคจฺฉติ น สาสนํ สุยฺยติ เอหิ ภเณ ตฺวํ คจฺฉาติ เตเนว นิยาเมน อญฺญํ อมจฺจํ เปเสสิ ฯ โสปิ คนฺตฺวา ปุริมนเยเนว สทฺธึ ปริสาย อรหตฺตํ ปตฺวา ตุณฺหี อโหสิ ฯ ราชา เอเตเนว นิยาเมน ปุริสสหสฺสปริวาเร นว อมจฺเจ เปเสสิ ฯ สพฺเพ อตฺตโน กิจฺจํ นิฏฺฐาเปตฺวา ตุณฺหีภูตา ตตฺเถว วิหรึสุ ฯ ราชา สาสนมตฺตํปิ อาหริตฺวา อาจิกฺขนฺตํ อลภิตฺวา จินฺเตสิ เอตฺตกา จ ชนา มยิ สิเนหาภาเวน สาสนมตฺตํปิ น ปจฺจาหรึสุ โก นุ โข เม วจนํ กริสฺสตีติ สพฺพราชพลํ โอโลเกนฺโต กาฬุทายึ อทฺทส ฯ โส กิร รญฺโญ สพฺพตฺถสาธโก อมจฺโจ อพฺภนฺตริโก อติวิยวิสฺสาสิโก โพธิสตฺเตน สทฺธึ เอกทิวเส ชาโต สหปํสุกีฬโก สหาโย ฯ อถ นํ ราชา อามนฺเตสิ ตาต อุทายิ อหํ มม ปุตฺตํ ปสฺสิตุกาโม นว ปุริสสหสฺสานิ เปเสสึ เอกปุริโสปิ อาคนฺตฺวา สาสนมตฺตํ อาโรเจนฺโตปิ นตฺถิ ทุชฺชาโน โข ปน เม ชีวิตนฺตราโย อหํ ชีวมาโน จ ปุตฺตํ ทุฏฺฐุํ อิจฺฉามิ สกฺขิสฺสสิ นุ โข เม ปุตฺตํ ทสฺเสตุนฺติ ฯ สกฺขิสฺสามิ เทว สเจ ปพฺพชิตุํ ลภิสฺสามีติ ฯ ตาต ตฺวํ ปพฺพชิตฺวา วา อปพฺพชิตฺวา วา มม ปุตฺตํ ทสฺเสหีติ อาห ฯ โส สาธุ เทวาติ รญฺโญ สาสนํ อาทาย ราชคหํ คนฺตฺวา สตฺถุ ธมฺมเทสนเวลาย ปริสปริยนฺเต ฐิโต ธมฺมํ สุตฺวา สปริวาโร อรหตฺตผลํ ปตฺวา เอหิภิกฺขุภาเว ปติฏฺฐาสิ ฯ