ลูขานิ ติณวีชานิ อปฺปเสฺนหานิ ภุญฺชสิ

อถ เกน นุ วณฺเณน ถูโล ตฺวมสิ วฏฺฏกาติ ฯ

ตตฺถ ทฬฺหิยนฺติ เอวรูปสฺส มยฺหํ กากสฺส กุโต ทฬฺหิภาโว ฯ กุโต ถูลนฺติ อตฺโถ ฯ อุพฺพิคฺคิโนติ อุพฺเพคฺควนฺโต ฯ ธงฺโกติ กากานเมว นามํ ฯ ปาเปน กมฺมุนา ลทฺโธติ กาเกน ปรสนฺตกวิลุมฺปน- สงฺขาเตน ปาปกมฺเมน ลทฺโธ ปิณฺโฑ ฯ น ปีเณตีติ น ตปฺเปติ ฯ เตนสฺมีติ เตน การเณนาหํ กิโส อสฺมิ ฯ อปฺปเสฺนหานีติ มนฺทโอชานิ ฯ อิทํ กาโก โพธิสตฺตํ ปณีตโคจรํ ขาทตีติ สญฺญี หุตฺวาปิ วฏฺฏกานํ ปกติโคจรํ ปุจฺฉนฺโต อาห ฯ

ตํ สุตฺวา โพธิสตฺโต อตฺตโน ถูลภาวการณํ กเถนฺโต อิมา คาถา อภาสิ