ผาตึ กยิรา อวิเหฐยํ ปรนฺติ ฯ

ตตฺถ ขรตฺตจนฺติ ถทฺธตจํ ฯ เพลฺลนฺติ มาตุลุงฺคํ ฯ พาลนฺติปิ ปาโฐ ฯ อยเมว อตฺโถ ฯ สตฺถวาติ สตฺถกหตฺโถ ฯ อโนมสนฺโตติ พหิตจํ ตนุกมฺปิ อตจฺฉนฺโต อิมํ ผลํ ติตฺตกํ กโรติ ฯ สมาหรนฺติ สมาหรนฺโต พหิตจํ ตจฺฉนฺโต อนฺโต จ อมฺพิลํ อนีหรนฺโต สาตํ กโรติ ฯ ปตฺถวาปิ ราชานมาลปติ ฯ ตนุพนฺธมุทฺธรนฺติ ตนุกํ ปน ตจํ อุทฺธรนฺโต สพฺพโส ติตฺตกสฺส อนปนีตตฺตา ตํ อสาธุเมว กยิรา ฯ เอวนฺติ เอวํ ปณฺฑิโต ราชาปิ อสาหสํ สาหสิยา ตณฺหาย วสํ อคจฺฉนฺโต อคติคมนํ ปหาย รฏฺฐํ อปีเฬตฺวา อุปจิกานํ วมฺมิกวฑฺฒนนิยาเมน มธุกรานํ เรณุํ คเหตฺวา มธุกรนิยาเมเนว ธนํ หรนฺโต

ทานํ สีลํ ปริจฺจาคํ อาชฺชวํ มทฺทวํ ตปํ

อกฺโกธํ อวิหึสญฺจ ขนฺตี จ อวิโรธนนฺติ อิเมสํ ทสนฺนํ ราชธมฺมานํ อนุวตฺตเนน ธมฺมานุวตฺตี หุตฺวา ปฏิ- ปชฺชมาโน โส อตฺตโน จ ปเรสญฺจ ผาตึ วุฑฺฒึ กเรยฺย ปรํ อวิเหฐยนฺโตเยวาติ ฯ