ธมฺมญฺจเร สุจริตํ น ตํ ทุจฺจริตํ จเร

ธมฺมจารี สุขํ เสติ อสฺมึ โลเก ปรมฺหิ จาติ อิมํ ปน คาถํ สุตฺวา สกทาคามิผเล ปติฏฺฐาสิ ธมฺมปาลชาตกํ สุตฺวา อนาคามิผเล ปติฏฺฐาสิ มรณสมเย เสตจฺฉตฺตสฺส เหฏฺฐา สิริสยเน นิปนฺโนเยว อรหตฺตํ ปาปุณิ ฯ อรญฺญาวาเสน ปธานานุโยคกิจฺจํ รญฺโญ นาโหสิ ฯ โสตาปตฺติผลํ สจฺฉิกตฺวาเยว ปน ภควโต ปตฺตํ คเหตฺวา สปริสํ ภควนฺตํ มหาปาสาทํ อาโรเปตฺวา ปณีเตน ขาทนีเยน โภชนีเยน ปริวิสิ ฯ ภตฺตกิจฺจปริโยสาเน สพฺพํ อิตฺถาคารํ อาคนฺตฺวา ภควนฺตํ วนฺทิ ฐเปตฺวา ราหุลมาตรํ ฯ สา ปน คจฺฉ อยฺยปุตฺตํ วนฺทาหีติ ปริชเนน วุจฺจมานาปิ สเจ มยฺหํ คุโณ อตฺถิ สยเมว เม สนฺติกํ อยฺยปุตฺโต อาคมิสฺสติ อาคตเมว นํ วนฺทิสฺสามีติ น อคมาสิ ฯ ภควา ราชานํ ปตฺตํ คาหาเปตฺวา ทฺวีหิ อคฺคสาวเกหิ สทฺธึ ราชธีตาย สิริคพฺภํ คนฺตฺวา ราชธีตา ยถารุจึ วนฺทมานา น กิญฺจิ วตฺตพฺพาติ วตฺวา ปญฺญตฺเต อาสเน นิสีทิ ฯ สา เวเคนาคนฺตฺวา โคปฺผเกสุ คเหตฺวา ปาทปิฏฺฐิยํ สีสํ ปริวตฺเตตฺวา ยถาชฺฌาสยํ วนฺทิ ฯ ราชา ราชธีตาย ภควติ สิเนหพหุมานาทิคุณสมฺปตฺตึ กเถสิ ภนฺเต มม ธีตา ตุมฺเหหิ กาสายานิ วตฺถานิ นิวาสิตานีติ สุตฺวา ตโต ปฏฺฐาย กาสาววตฺถา ชาตา ตุมฺหากํ เอกภตฺติกภาวํ สุตฺวา เอกภตฺติกาว ชาตา ตุมฺเหหิ มหาสยนสฺส ฉฑฺฑิตภาวํ สุตฺวา ปฏฺฏิกมญฺจเกเยว นิปนฺนา ตุมฺหากํ มาลาคนฺธาทีหิ วิรหิตภาวํ ญตฺวา วิรหิตมาลาคนฺธาว ชาตา อตฺตโน ญาตเกสุ มยํ ปฏิชคฺคิสฺสามาติ สาสเน เปสิเต เอกํ ญาตกํปิ น โอโลเกสิ เอวํ คุณสมฺปนฺนา เม ภควา ธีตาติ ฯ อนจฺฉริยํ มหาราช ยํ อิทานิ ตยา รกฺขิยมานา ราชธีตา ปริปกฺเก ญาเณ อตฺตานํ รกฺเขยฺย เอสา ปุพฺเพ อนารกฺขา ปพฺพตปาเท วิจรมานา อปริปกฺเก ญาเณ อตฺตานํ รกฺขตีติ วตฺวา ตสฺสา โสกํ วิโนเทตฺวา จนฺทกินฺนรีชาตกํ กเถตฺวา โสตาปตฺติผลํ ทตฺวา อุฏฺฐายาสนา ปกฺกามิ ฯ ทุติยทิวเส นนฺทสฺส ราชกุมารสฺส อภิเสกเคหปฺปเวสนวิวาหมงฺคเลสุ วตฺตมาเนสุ ตสฺส เคหํ คนฺตฺวา กุมารํ ปตฺตํ คาหาเปตฺวา ปพฺพาเชตุกาโม มงฺคลํ วตฺวา อุฏฺฐายาสนา ปกฺกามิ ฯ ชนปทกลฺยาณี กุมารํ คจฺฉนฺตํปิ ทิสฺวา ตุวฏํ โข อยฺยปุตฺต อาคจฺเฉยฺยาสีติ วตฺวา คีวํ ปสาเรตฺวา โอโลเกสิ ฯ โสปิ ภควนฺตํ ปตฺตํ คณฺหถาติ วตฺตุํ อวิสหมาโน วิหารํเยว อคมาสิ ฯ ตํ อนิจฺฉมานํเยว ภควา ปพฺพาเชสิ ฯ อิติ ภควา กปิลปุรํ คนฺตฺวา ตติยทิวเส นนฺทํ ปพฺพาเชสิ ฯ