สตฺตเม ทิวเส ราหุลมาตา กุมารํ อลงฺกริตฺวา ภควโต สนฺติกํ เปเสสิ ปสฺส ตาต เอวํ วีสติสหสฺสสมณปริวุตํ สุวณฺณวณฺณํ พฺรหฺมรูปวณฺณํ สมณํ อยํ เต ปิตา เอตสฺส มหนฺตา นิธิโย อเหสุํ ตฺยาสฺส นิกฺขมนโต ปฏฺฐาย น ปสฺสามิ คจฺฉ ตํ ทายชฺชํ ยาจ อหํ ตาต กุมาโร อภิเสกํ ปตฺวา จกฺกวตฺติ ภวิสฺสามิ ธเนน เม อตฺโถ ธนํ เม เทหิ สามิโก หิ ปุตฺโต ปิตุ สนฺตกสฺสาติ ฯ กุมาโร ภควโต สนฺติกํ คนฺตฺวาว ปิตุ สิเนหํ ปฏิลภิตฺวา หฏฺฐจิตฺโตว สุขา เต สมณ ฉายาติ วตฺวา อญฺญํ พหุํ อตฺตโน อนุรูปํ วทนฺโต อฏฺฐาสิ ฯ ภควา กตภตฺตกิจฺโจ อนุโมทนํ กตฺวา อุฏฺฐายาสนา ปกฺกามิ ฯ กุมาโรปิ ทายชฺชํ เม สมณ เทหิ ทายชฺชํ เม สมณ เทหีติ ภควนฺตํ อนุพนฺธิ ฯ ภควา กุมารํ น นิวตฺตาเปสิ ฯ ปริชโน ภควตา สทฺธึ คจฺฉนฺตํ นิวตฺเตตุํ นาสกฺขิ ฯ อิติ โส ภควตา สทฺธึ อารามเมว อคมาสิ ฯ ตโต ภควา จินฺเตสิ ยํ อยํ ปิตุสนฺตกํ ธนํ อิจฺฉติ ตํ วฏฺฏานุคตํ สวิฆาตํ หนฺทสฺส โพธิมณฺเฑ ปฏิลทฺธํ สตฺตวิธํ อริยธนํ เทมิ โลกุตฺตรทายชฺชสฺส สามิกํ กโรมีติ อายสฺมนฺตํ สารีปุตฺตํ อามนฺเตสิ เตนหิ ตฺวํ สารีปุตฺต ราหุลกุมารํ ปพฺพาเชหีติ ฯ ปพฺพชิเต ปน กุมาเร รญฺโญ อธิมตฺตํ ทุกฺขํ อุปฺปนฺนํ ฯ ตํ อธิวาเสตุํ อสกฺโกนฺโต ภควโต นิเวเทตฺวา สาธุ ภนฺเต อยฺยา มาตาปิตูหิ อนนุญฺญาตํ ปุตฺตํ น ปพฺพาเชยฺยุนฺติ วรํ ยาจิ ฯ ภควา ตสฺส ตํ วจนํ ปฏิสฺสุณิตฺวา ปุนทิวเส ราชนิเวสเน กตปาตราโส เอกมนฺตํ นิสินฺเนน รญฺญา ภนฺเต ตุมฺหากํ ทุกฺกรการกกาเล เอกา เทวตา มํ อุปสงฺกมิตฺวา ปุตฺโต เต กาลกโตติ อาห ตสฺสา วจนํ อสทฺทหนฺโต น มยฺหํ ปุตฺโต โพธึ อปฺปตฺวา กาลํ กโรตีติ ตํ ปฏิปกฺขิปินฺติ วุตฺเต อิทานิ กึ สทฺทหิสฺสถ เย ตุมฺเห ปุพฺเพปิ อฏฺฐิกานิ ทสฺเสตฺวา ปุตฺโต เต มโตติ วุตฺเต น สทฺทหิตฺถาติ อิมิสฺสา อตฺถุปฺปตฺติยา มหาธมฺมปาลชาตกํ กเถสิ ฯ คาถาปริโยสาเน ราชา อนาคามิผเล ปติฏฺฐหิ ฯ อิติ ภควา ปิตรํ ตีสุ ผเลสุ ปติฏฺฐาเปตฺวา ภิกฺขุสงฺฆปริวุโต ปุนเทว ราชคหํ คนฺตฺวา สีตวเน วิหาสิ ฯ

ตสฺมึ สมเย อนาถปิณฺฑิโก คหปติ ปญฺจหิ สกฏสเตหิ ภณฺฑํ อาทาย ราชคเห อตฺตโน ปิยสหายสฺส เสฏฺฐิโน เคหํ คนฺตฺวา ตตฺถ พุทฺธสฺส ภควโต อุปฺปนฺนภาวํ สุตฺวา พลวปจฺจูเส เทวตานุภาเวน วิวเฏน ทฺวาเรน สตฺถารํ อุปสงฺกมิตฺวา ธมฺมํ สุตฺวา โสตาปตฺติผเล ปติฏฺฐาย ทุติยทิวเส พุทฺธปฺปมุขสฺส สงฺฆสฺส มหาทานํ ทตฺวา สาวตฺถึ อาคมนตฺถาย สตฺถุ ปฏิญฺญํ คเหตฺวา อนฺตรามคฺเค ปญฺจจตฺตาฬีสโยชเน ฐาเน สตสหสฺสํ ทตฺวา โยชนิกํ วิหารํ กาเรตฺวา เชตวนํ โกฏิสนฺถาเรน อฏฺฐารสหิรญฺญโกฏีหิ กิณิตฺวา นวกมฺมํ นิฏฺฐาเปสิ มชฺเฌ ทสพลสฺส คนฺธกุฏึ กาเรตฺวา ตํ ปริวาเรตฺวา อสีติมหาเถรานํ ปฏิปาฏิยา เอกสนฺนิวาเสน อาวาเสน เอกกุฏิกทฺวิกุฏิกหํสวฏฺฏิกทีฆสาลมณฺฑปาทิวเสน เสนาสนานิ โปกฺขรณีจงฺกมนรตฺติฏฺฐานทิวาฏฺฐานานิ จาติ อฏฺฐารสโกฏิปริจฺจาเคน รมณีเย ภูมิภาเค มโนรมํ วิหารํ กาเรตฺวา ทสพลสฺส อาคมนตฺถาย ทูตํ เปเสสิ ฯ สตฺถา ทูตสฺส วจนํ สุตฺวา มหาภิกฺขุสงฺฆปริวาโร ราชคหา นิกฺขมิตฺวา อนุปุพฺเพน สาวตฺถีนครํ ปาปุณิ ฯ มหาเสฏฺฐีปิ โข วิหารมหํ สชฺเชตฺวา ตถาคตสฺส เชตวนํ ปวิสนทิวเส ปุตฺตํ สพฺพาลงฺการปฏิมณฺฑิตํ กตฺวา อลงฺกตปฏิยตฺเตเหว ปญฺจหิ กุมารสเตหิ สทฺธึ เปเสสิ ฯ โส สปริวาโร ปญฺจวณฺณวตฺถสมุชฺชลานิ ปญฺจธชสตานิ คเหตฺวา ทสพลสฺส ปุรโต อโหสิ ฯ เตสํ ปจฺฉโต สุภทฺทา จุลฺลสุภทฺทาติ เทฺว เสฏฺฐิธีตโร ปญฺจหิ กุมาริสเตหิ สทฺธึ ปุณฺณฆเฏ คเหตฺวา นิกฺขมึสุ ฯ ตาสํ ปจฺฉโต เสฏฺฐิภริยา สพฺพาลงฺการปฏิมณฺฑิตา ปญฺจหิ มาตุคามสเตหิ สทฺธึ ปุณฺณปาติโย คเหตฺวา นิกฺขมิ ฯ สพฺเพสํ ปจฺฉโต สยํ มหาเสฏฺฐี อหตวตฺถนิวตฺโถ อหตวตฺถนิวตฺเถเหว ปญฺจหิ เสฏฺฐิสเตหิ ภควนฺตํ อพฺภุคฺคญฺฉิ ฯ ภควา อิมํ อุปาสกปริสํ ปุรโต กตฺวา มหาภิกฺขุสงฺฆปริวุโต อตฺตโน สรีรปฺปภาย สุวณฺณรสเสกปิญฺชรานิ วิย วนนฺตรานิ กุรุมาโน อนนฺตราย พุทฺธลีฬฺหาย อปฺปฏิสมาย พุทฺธสิริยา เชตวนวิหารํ ปาวิสิ ฯ อถ นํ อนาถปิณฺฑิโก ปุจฺฉิ กถาหํ ภนฺเต อิมสฺมึ วิหาเร ปฏิปชฺชามีติ ฯ เตนหิ คหปติ อิมํ วิหารํ อาคตาคตสฺส ภิกฺขุสงฺฆสฺส เทหีติ ฯ สาธุ ภนฺเตติ มหาเสฏฺฐี สุวณฺณภิงฺคารํ อาทาย ทสพลสฺส หตฺเถ อุทกํ ปาเตตฺวา อิมํ เชตวนวิหารํ อาคตสฺส จาตุทฺทิสสฺส พุทฺธปฺปมุขสฺส สงฺฆสฺส ทมฺมีติ อทาสิ ฯ สตฺถา วิหารํ ปฏิคฺคเหตฺวา อนุโมทนํ กโรนฺโต