ตตฺถ วชฺชาติ วเทยฺย ฯ ตํ ทุกฺกรตรนฺติ ตํ ททามีติ วจนํ ตโต อสิคิลนโต ทุกฺกรตรํ ฯ สพฺพญฺญนฺติ อสุกนฺนาม ตว ทสฺสามีติ วจนํ ฐเปตฺวา อญฺญํ สพฺพํปิ การณํ สุกรํ ฯ มาคธาติ ราชานํ โคตฺเตนาลปติ ฯ

รญฺโญ อายุรปณฺฑิตสฺส วจนํ สุตฺวา อสิคิลนโต กิร อิทํ นาม ทมฺมีติ วจนํ ทุกฺกรํ อหญฺจ ปุโรหิตปุตฺตสฺส เทวึ ทมฺมีติ อวจํ อติทุกฺกรํ วต เม กตนฺติ ตํ วีมํสนฺตสฺเสว หทเย โสโก โถกํ ตนุกํ คโต ฯ โส ตโต ปรสฺส อิทํ นาม ทมฺมีติ วจนโต ปนญฺญํ ทุกฺกรตรํ อตฺถิ นุ โขติ จินฺเตตฺวา ปุกฺกุสปณฺฑิเตน สทฺธึ สลฺลปนฺโต ตติยํ คาถมาห

พฺยากาสิ อายุโร ปญฺหํ อตฺถํ ธมฺมสฺส โกวิโท

ปุกฺกุสํ ทานิ ปุจฺฉามิ กึ ทุกฺกรตรํ ตโต