๑ อปณฺณกชาตกํ

อิมํ ตาว อปณฺณกธมฺมเทสนํ ภควา สาวตฺถึ อุปนิสฺสาย เชตวนมหาวิหาเร วิหรนฺโต กเถสิ ฯ กํ ปน อารพฺภ อยํ กถา สมุฏฺฐิตาติ ฯ เสฏฺฐิสฺส สหายเก ปญฺจสเต ติตฺถิยสาวเกติ ฯ

เอกสฺมึ หิ ทิวเส อนาถปิณฺฑิโก เสฏฺฐี อตฺตโน สหายเก ปญฺจสเต อญฺญติตฺถิยสาวเก อาทาย พหุมาลาคนฺธวิเลปนญฺเจว เตลมธุผาณิตวตฺถจฺฉาทนานิ จ คาหาเปตฺวา เชตวนํ คนฺตฺวา ภควนฺตํ วนฺทิตฺวา คนฺธมาลาทีหิ ปูเชตฺวา เภสชฺชานิ เจว วตฺถานิ จ ภิกฺขุสงฺฆสฺส วิสฺสชฺเชตฺวา ฉ นิสชฺชโทเส วชฺเชตฺวา เอกมนฺตํ นิสีทิ ฯ เตปิ อญฺญติตฺถิยสาวกา ตถาคตํ วนฺทิตฺวา สตฺถุ ปุณฺณจนฺทสสฺสิรีกํ มุขํ ลกฺขณานุพฺยญฺชนปฏิมณฺฑิตํ พฺยามปฺปภาปริกฺขิตฺตํ พฺรหฺมกายํ อาเวฬาเวฬา ยมกยมกา หุตฺวา นิจฺฉรนฺติโย ฆนพุทฺธรํสิโย โอโลกยมานา อนาถปิณฺฑิกสฺส สมีเปเยว นิสีทึสุ ฯ อถ เนสํ สตฺถา มโนสิลาตเล สีหนาทํ นทนฺโต ตรุณสีโห วิย คชฺเชนฺโต ปาวุสฺสกเมโฆ วิย อากาสคงฺคํ โอตาเรนฺโต วิย รตนทามํ คนฺเถนฺโต วิย จ อฏฺฐงฺคสมนฺนาคเตน สวนีเยน พฺรหฺมสฺสเรน นานานยวิจิตฺตํ มธุรธมฺมกถํ กเถสิ ฯ เต สตฺถุ ธมฺมเทสนํ สุตฺวา ปสนฺนจิตฺตา อุฏฺฐาย ทสพลํ วนฺทิตฺวา อญฺญติตฺถิยสรณํ ภินฺทิตฺวา พุทฺธสรณํ อคมํสุ ฯ เต ตโต ปฏฺฐาย นิจฺจกาลํ อนาถปิณฺฑิเกน สทฺธึ คนฺธมาลาทิหตฺถา วิหารํ คนฺตฺวา ธมฺมํ สุณนฺติ ทานํ เทนฺติ สีลํ รกฺขนฺติ อุโปสถกมฺมํ กโรนฺติ ฯ อถ ภควา สาวตฺถิโต ปุนเทว ราชคหํ อคมาสิ ฯ เต ตถาคตสฺส คตกาเล ตํ สรณํ ภินฺทิตฺวา ปุน อญฺญติตฺถิยสรณํ คตา อตฺตโน มูลฏฺฐาเนเยว ปติฏฺฐิตา ฯ ภควาปิ สตฺตฏฺฐมาเส วีตินาเมตฺวา ปุน เชตวนเมว อคมาสิ ฯ อนาถปิณฺฑิโก ปุนปิ เต อาทาย สตฺถุ สนฺติกํ คนฺตฺวา สตฺถารํ คนฺธมาลาทีหิ ปูเชตฺวา วนฺทิตฺวา เอกมนฺตํ นิสีทิ ฯ เตปิ ภควนฺตํ วนฺทิตฺวา เอกมนฺตํ นิสีทึสุ ฯ อถ เนสํ อนาถปิณฺฑิโก ตถาคเต จาริกํ ปกฺกนฺเต คหิตสรณํ ภินฺทิตฺวา ปุน อญฺญติตฺถิยสรณเมว คเหตฺวา มูเล ปติฏฺฐิตภาวํ ภควโต อาโรเจสิ ฯ ภควา อปริมิตกปฺปโกฏิโย นิรนฺตรปวตฺติตวจีสุจริตานุภาเวน ทิพฺพคนฺธคนฺธีนํ นานาคนฺธปูริตํ รตนกรณฺฑกํ วิวรนฺโต วิย มุขมณฺฑลํ วิวริตฺวา มธุรสฺสรํ นิจฺฉาเรนฺโต สจฺจํ กิร ตุมฺเห อุปาสกา ตีณิ สรณานิ ภินฺทิตฺวา อญฺญติตฺถิยสรณํ คตาติ ปุจฺฉิ ฯ อถ เตหิ ปฏิจฺฉาเทตุํ อสกฺโกนฺเตหิ สจฺจํ ภควาติ วุตฺเต สตฺถา อุปาสกา เหฏฺฐา อวีจึ อุปริ ภวคฺคํ ปริจฺเฉทํ กตฺวา ติริยํ อปริมาณาสุ โลกธาตูสุ สีลาทีหิ คุเณหิ พุทฺเธน สทิโส นาม นตฺถิ กุโต อธิกตโรติ ยาวตา ภิกฺขเว สตฺตา อปทา วา ทฺวิปทา วา จตุปฺปทา วา พหุปฺปทา วา ฯเปฯ ตถาคโต เตสํ อคฺคมกฺขายติ ยงฺกิญฺจิ วิตฺตํ อิธ วา หุรํ วา ฯเปฯ อคฺคโต เว ปสนฺนานนฺติ อาทีหิ สุตฺเตหิ ปกาสิเต รตนตฺตยคุเณ ปกาเสตฺวา เอวํ อุตฺตมคุณสมนฺนาคตํ รตนตฺตยํ สรณํ คตา อุปาสกา วา อุปาสิกา วา นิรยาทีสุ นิพฺพตฺตนกา นาม นตฺถิ อปายนิพฺพตฺติโต ปน มุจฺจิตฺวา เทวโลเก อุปฺปชฺชิตฺวา มหาสมฺปตฺตึ อนุโภนฺติ กสฺมา ตุมฺเหหิ เอวรูปํ สรณํ ภินฺทิตฺวา อญฺญติตฺถิยสรณํ คจฺฉนฺเตหิ อยุตฺตํ กตนฺติ อาห ฯ