เอวํ มหาสตฺโต ราชานํ โอวทนฺโต จ อนุสาสนฺโต จ กาลมกาสิ ฯ ราชา อมจฺเจ ปกฺโกสาเปตฺวา อิมสฺส กปิราชสฺส ราชูนํ วิย สรีรกิจฺจํ กโรถาติ วตฺวา อิตฺถาคารํปิ อาณาเปสิ ตุมฺเห รตฺตวตฺถนิวตฺถา ปริกิณฺณเกสา ทณฺฑทีปิกหตฺถา กปิราชานํ ปริวาเรตฺวา อาหฬนํ คจฺฉถาติ ฯ อมจฺจา ทารูนํ สกฏมตฺเตน จิตฺตกํ กริตฺวา ราชูนํ กรณนิยาเมเนว มหาสตฺตสฺส สรีรกิจฺจํ กตฺวา สีสกปาลํ คเหตฺวา รญฺโญ สนฺติกํ อคมํสุ ฯ ราชา มหาสตฺตสฺส อาหฬเน เจติยํ กาเรตฺวา ทีเป ชาลาเปตฺวา คนฺธมาลาทีหิ ปูเชตฺวา สีสกปาลํ สุวณฺณขจิตํ กาเรตฺวา กุนฺตคฺเค ฐเปตฺวา ปุรโต กาเรตฺวา คนฺธมาลาทีหิ ปูเชนฺโต พาราณสึ คนฺตฺวา กุนฺตํ ราชทฺวาเร ฐเปตฺวา สกลนครํ สชฺชาเปตฺวา สตฺตาหํ ธาตุปูชํ กาเรสิ ฯ อถ นํ ธาตุํ คเหตฺวา เจติยํ กาเรตฺวา ยาวชีวํ คนฺธมาลาทีหิ ปูเชนฺโต โพธิสตฺตสฺส โอวาเท ปติฏฺฐาย ทานาทีนิ ปุญฺญานิ กโรนฺโต ธมฺเมน รชฺชํ กาเรตฺวา สคฺคปรายโน อโหสิ ฯ

สตฺถา อิมํ ธมฺมเทสนํ อาหริตฺวา สจฺจานิ ปกาเสตฺวา ชาตกํ สโมธาเนสิ ตทา ราชา อานนฺโท อโหสิ ทุฏฺฐกปิ เทวทตฺโต ปริสา พุทฺธปริสา กปิราชา ปน อหเมวาติ ฯ

มหากปิชาตกํ ทุติยํ ฯ