ตสฺมา ตฺวํ อิสิ มา โรทิ โรทิตํ โมฆมาหุ สนฺโต ฯ

กนฺทิเตน หเว พฺรหฺเม มโต เปโต สมุฏฺฐเห

สพฺเพ สงฺคมฺม โรทาม อญฺญมญฺญสฺส ญาตเกติ ฯ

ตตฺถ เย รุทนฺติ ลปนฺติ จาติ พฺราหฺมณ เย สตฺตา โรทนฺติ ปริเทวนฺติ จ สพฺเพ เต มตํว โย จ มริสฺสติ ตํ โรทนฺติ เตสํ เอวํ โรทนฺตานํ อสฺสุสุกฺขนกาโล นตฺถิ ตสฺมา ตฺวํ อิสิ มา โรทิ ฯ กึการณา ฯ โรทิตํ โมฆมาหุ สนฺโตติ ปณฺฑิตา หิ โรทิตํ นิปฺผลนฺติ วทนฺติ ฯ มโต เปโตติ ยทิ เอส เปโตติ สงฺขฺยํ คโต มโต โรทิเตน สมุฏฺฐเหยฺย ฯ เอวํ สนฺเต สพฺเพปิ มยํ สมาคนฺตฺวา อญฺญมญฺญสฺส ญาตเก โรทาม กึ นิกฺขมา อจฺฉามาติ ฯ