รุกฺขเทวตาย วจนํ สุตฺวา สุปณฺโณ โอสานคาถมาห

สงฺเกยฺย สงฺกิตพฺพานิ รกฺเขยฺยานาคตํ ภยํ

อนาคตภยา ธีโร อุโภ โลเก อเวกฺขตีติ ฯ

ตตฺถ อนาคตํ ภยนฺติ ปาณาติปาตาทีหิ วิรมนฺโต ทิฏฺฐธมฺมิกํปิ สมฺปรายิกํปิ อนาคตํ ภยํ รกฺขติ นาม ฯ ปาปมิตฺเต จ เวริปุคฺคเล จ อนุปสงฺกมนฺโต อนาคตํ ภยํ รกฺขติ นาม ฯ เอวํ อนาคตํ ภยํ รกฺเขยฺย ฯ อนาคตภยาติ อนาคเต ภยการณา ฯ ตํ ภยํ สมฺปสฺสนฺโต ธีโร อิธโลกญฺจ ปรโลกญฺจ อเวกฺขติ โอโลเกติ นาม ฯ