น เกวลญฺจ เนสํ สตฺถา เอตฺตกญฺเญว ธมฺมํ เทเสติ ฯ อปิจ โข อุปาสกา พุทฺธานุสฺสติกมฺมฏฺฐานนฺนาม ธมฺมานุสฺสติกมฺมฏฺฐานนฺนาม สงฺฆานุสฺสติกมฺมฏฺฐานนฺนาม โสตาปตฺติมคฺคํ เทติ โสตาปตฺติผลํ เทติ สกทาคามิอนาคามิอรหตฺตมคฺคํ เทติ อรหตฺตผลํ เทตีติ เอวมาทีหิ นเยหิ ธมฺมํ เทเสตฺวา เอวรูปํ นาม สรณํ ภินฺทนฺเตหิ อยุตฺตํ ตุมฺเหหิ กตนฺติ อาห ฯ เอตํ จ พุทฺธานุสฺสติกมฺมฏฺฐานาทีนํ โสตาปตฺติมคฺคาทิปฺปทานํ เอกธมฺโม ภิกฺขเว ภาวิโต พหุลีกโต เอกนฺตํ นิพฺพิทาย วิราคาย นิโรธาย อุปสมาย อภิญฺญาย สมฺโพธาย นิพฺพานาย สํวตฺตติ กตโม เอกธมฺโม พุทฺธานุสฺสตีติ เอวมาทีหิ สุตฺเตหิ ทีเปตพฺพํ ฯ เอวญฺจ ปน ภควา นานปฺปกาเรหิ อุปาสเก โอวทิตฺวา อุปาสกา ปุพฺเพปิ มนุสฺสา อสรณํ สรณนฺติ ตกฺกคาเหน วิรุทฺธคาเหน คเหตฺวา อมนุสฺสปริคฺคหิเต กนฺตาเร ยกฺขภกฺขา หุตฺวา มหาวินาสปฺปตฺตา อปณฺณกคาหมฺปน เอกํสิกคาหํ อวิรุทฺธคาหํ คหิตมนุสฺสา ตสฺมึเยว กนฺตาเร โสตฺถิภาวํ ปตฺตาติ วตฺวา ตุณฺหี อโหสิ ฯ อถ โข อนาถปิณฺฑิโก คหปติ อุฏฺฐายาสนา ภควนฺตํ วนฺทิตฺวา อภิตฺถวิตฺวา สิรสิ อญฺชลึ ปติฏฺฐเปตฺวา เอวมาห ภนฺเต อิทานิ ตาว อิเมสํ อุปาสกานํ อุตฺตมสรณํ ภินฺทิตฺวา ตกฺกคาหํ วิรุทฺธคาหํ สรณคหณํ อมฺหากํ ปากฏํ ปุพฺเพ ปน อมนุสฺสปริคฺคหิเต กนฺตาเร ตกฺกคาหํ คหิตมนุสฺสานญฺจ วินาโส อปณฺณกคาหํ คหิตมนุสฺสานญฺจ โสตฺถิภาโว อมฺหากํ ปฏิจฺฉนฺโน ตุมฺหากเมว ปากโฏ สาธุ วต โน ภควา อากาเส ปุณฺณจนฺทํ อุฏฺฐาเปนฺโต วิย อิมํ การณํ ปากฏํ กโรตูติ ฯ อถ ภควา มยา โข คหปติ อปริมิตกาเล ทสปารมิโย ปูเรตฺวา โลกสฺส กงฺขจฺเฉทนตฺถเมว สพฺพญฺญุตญาณํ ปฏิวิทฺธํ สีหวสาย สุวณฺณปาตึ ปูเรนฺโต วิย สกฺกจฺจํ โสตํ โอทหิตฺวา สุโณหีติ เสฏฺฐิโน สตุปฺปาทํ ชเนตฺวา หิมคพฺภํ ปทาเลตฺวา ปุณฺณจนฺทํ นีหรนฺโต วิย ภวนฺตเรนปิ ปฏิจฺฉนฺนการณํ ปากฏํ อกาสิ ฯ

อตีเต กาสิกรฏฺเฐ พาราณสีนคเร พฺรหฺมทตฺโต นาม ราชา อโหสิ ฯ ตทา โพธิสตฺโต สตฺถวาหกุเล ปฏิสนฺธึ คเหตฺวา อนุปุพฺเพน วยปฺปตฺโต ปญฺจหิ สกฏสเตหิ วณิชฺชํ กโรนฺโต วิจรติ ฯ โส กทาจิ ปุพฺพนฺตโต อปรนฺตํ คจฺฉติ กทาจิ อปรนฺตโต ปุพฺพนฺตํ อาคจฺฉติ ฯ พาราณสิยํเยว หิ อญฺโญปิ สตฺถวาหปุตฺโต อตฺถิ ฯ โส พาโล อพฺยตฺโต อนุปายกุสโล อโหสิ ฯ ตทา โพธิสตฺโต พาราณสิโต มหคฺฆภณฺฑํ คเหตฺวา ปญฺจสกฏสตานิ ปูเรตฺวา คมนสชฺชานิ กตฺวา ฐเปสิ ฯ โสปิ พาลสตฺถวาหปุตฺโต ตเถว ปญฺจสกฏสตานิ ปูเรตฺวา คมนสชฺชานิ กตฺวา ฐเปสิ ฯ โพธิสตฺโต จินฺเตสิ สเจ อยํ พาลสตฺถวาหปุตฺโต มยา สทฺธึเยว คมิสฺสติ สกฏสหสฺเส เอกโต คจฺฉนฺเต มคฺโคปิ นปฺปโหสฺสติ มนุสฺสานํ ทารูทกาทีนิปิ พลิพทฺทานํ ติณานิปิ ทุลฺลภานิ ภวิสฺสนฺติ เอเตน วา มยา วา ปุรโต คนฺตุํ วฏฺฏตีติ ฯ โส ตํ ปกฺโกสาเปตฺวา ตมตฺถํ อาโรเจตฺวา ทฺวีหิ อมฺเหหิ เอกโต คนฺตุํ น สกฺกา กึ ตฺวํ ปุรโต คมิสฺสสิ อุทาหุ ปจฺฉโตติ อาห ฯ โส จินฺเตสิ มยิ ปุรโต คจฺฉนฺเต พหู อานิสํสา มคฺเคน อภินฺเนเนว คมิสฺสามิ โคณา อนามฏฺฐติณํ ขาทิสฺสนฺติ มนุสฺสานํ อนามฏฺฐสูเปยฺยํ ปณฺณํ ภวิสฺสติ ปสนฺนํ อุทกํ ภวิสฺสติ ยถารุจึ คจฺฉมาโน อคฺฆํ ฐเปตฺวา ภณฺฑํ วิกฺกิณิสฺสามีติ ฯ โส อหํ สมฺม ปุรโต คมิสฺสามีติ อาห ฯ โพธิสตฺโต ปจฺฉโต คมเน พหู อานิสํเส อทฺทส ฯ เอวํ อสฺส อโหสิ เอเต ปุรโต คจฺฉนฺตา มคฺเค วิสมฏฺฐานํ สมํ กริสฺสนฺติ อหํ เตหิ คตมคฺเคน คมิสฺสามิ ปุรโต คจฺฉนฺเตหิ พลิพทฺเทหิ ปริณตถทฺธติเณ ขาทิเต มม โคณา ปุน อุฏฺฐิตานิ มธุรติณานิ ขาทิสฺสนฺติ คหิตปณฺณฏฺฐานโต อุฏฺฐิตํ มนุสฺสานํ สูเปยฺยํ ปณฺณํ มธุรํ ภวิสฺสติ นิรุทกฏฺฐาเน อาวาฏํ ขณิตฺวา เอเต อุทกํ อุปฺปาเทสฺสนฺติ ปเรหิ กเตสุ อาวาเฏสุ มยํ อุทกํ ปิวิสฺสาม ภณฺฑคฺฆฏฺฐปนํ นาม มนุสฺสานํ ชีวิตา โวโรปนสทิสํ อหํ ปจฺฉโต คนฺตฺวา เอเตหิ ฐปิตคฺเฆน ภณฺฑํ วิกฺกิณิสฺสามีติ ฯ โส เอตฺตเก อานิสํเส ทิสฺวา สมฺม ตฺวํ ปุรโต คจฺฉาหีติ อาห ฯ สาธุ สมฺมาติ พาลสตฺถวาหปุตฺโต สกฏานิ มหนฺตานิ โยเชตฺวา นิกฺขนฺโต อนุปุพฺเพน มนุสฺสวาสํ อติกฺกมิตฺวา กนฺตารมุขํ ปาปุณิ ฯ