โพธิสตฺโตปิ โข พาลสตฺถวาหปุตฺตสฺส นิกฺขนฺตทิวสโต ปฏฺฐาย มาสฑฺฒมาสํ วีตินาเมตฺวา ปญฺจหิ สกฏสเตหิ สทฺธึ นครโต นิกฺขมฺม อนุปุพฺเพน กนฺตารมุขํ ปาปุณิ ฯ โส ตตฺถ อุทกจาฏิโย ปูเรตฺวา พหุํ อุทกํ อาทาย อนฺโตขนฺธาวาเร เภริญฺจาราเปตฺวา มนุสฺเส สนฺนิปาเตตฺวา เอวมาห อมฺโภ มํ อนาปุจฺฉิตฺวา ปสตมตฺตํปิ อุทกํ มา อาสิญฺจิตฺถ กนฺตาเร วิสรุกฺขา นาม โหนฺติ ปตฺตํ วา ปุปฺผํ วา ผลํ วา ตุมฺเหหิ ปุเร จ อขาทิตปุพฺพํ มํปิ อนาปุจฺฉิตฺวา มา ขาทิตฺถาติ ฯ เอวํ มนุสฺสานํปิ โอวาทํ ทตฺวา ปญฺจหิ สกฏสเตหิ กนฺตารํ ปฏิปชฺชิ ฯ ตสฺมึ กนฺตารมชฺเฌ สมฺปตฺเต โส ยกฺโข ปุริมนเยเนว โพธิสตฺตสฺส ปฏิปเถ อตฺตานํ ทสฺเสสิ ฯ โพธิสตฺโต ตํ ทิสฺวาว อญฺญาสิ อิมสฺมึเยว กนฺตาเร อุทกํ นตฺถิ นิรุทกกนฺตาโร นาเมโส อยญฺจ นิพฺภโย รตฺตเนตฺโต ฉายาปิสฺส น ปญฺญายติ นิสฺสํสยํ อิมินา ปุรโต คโต พาลสตฺถวาหปุตฺโต สพฺพํ อุทกํ ฉฑฺฑาเปตฺวา กิลเมตฺวา สปริโส ขาทิโต ภวิสฺสติ มยฺหํ ปน ปณฺฑิตภาวํ อุปายโกสลฺลํ น ชานาติ มญฺเญติ ฯ ตโต นํ อาห คจฺฉถ ตุมฺเห มยํ พาณิชา นาม อญฺญํ อุทกํ อทิสฺวา คหิตอุทกํ น ฉฑฺเฑม ทิฏฺฐฏฺฐาเน ปน ฉฑฺเฑตฺวา สกฏานิ สลฺลหุกานิ กตฺวา คมิสฺสามาติ ฯ ยกฺโขปิ โถกํ คนฺตฺวา อทสฺสนํ อุปคมฺม อตฺตโน ยกฺขนครเมว คโต ฯ ยกฺเข ปน คเต สพฺเพ มนุสฺสา โพธิสตฺตํ อุปคนฺตฺวา อาหํสุ อยฺย เอเต มนุสฺสา เอสา นีลวนราชิ ปญฺญายติ ตโต ปฏฺฐาย นิพทฺธํ เทโว วสฺสตีติ วตฺวา อุปฺปลกุมุทมาลิโน ปทุมปุณฺฑรีกกลาเป อาทาย ภิสมูลานิ ขาทนฺตา อลฺลวตฺถา อลฺลเกสา อุทกพินฺทูหิ เจว กลเลหิ จ ปคฺฆรนฺเตหิ อาคตา อุทกํ ฉฑฺเฑตฺวา สลฺลหุเกหิ สกเฏหิ ขิปฺปํ คจฺฉามาติ ฯ โพธิสตฺโตปิ เตสํ วจนํ สุตฺวา สกฏานิ ฐปาเปตฺวา สพฺเพ มนุสฺเส สนฺนิปาตาเปตฺวา ตุมฺเหหิ อิมสฺมึ กนฺตาเร สโร วา โปกฺขรณี วา อตฺถีติ กสฺสจิ สุตปุพฺพนฺติ ปุจฺฉิ ฯ น อยฺย สุตปุพฺพนฺติ ฯ นิรุทกกนฺตาโร นาม เอโส อิทานิ เอกจฺเจ มนุสฺสา เอตาย นีลวนราชิยา ปุรโต เทโว วสฺสตีติ วทนฺติ วุฏฺฐิวาโต นาม กิตฺตกํ ฐานํ วายตีติ ฯ ติโยชนมตฺตํ อยฺยาติ ฯ กึ ปน โว เอกสฺสาปิ สรีรํ วุฏฺฐิวาโต ปหรตีติ ฯ นตฺถิ อยฺยาติ ฯ เมฆสีสนฺนาม กิตฺตเก ฐาเน ปญฺญายตีติ ฯ ติโยชนมตฺเต อยฺยาติ ฯ อตฺถิ ปน โว เกนจิ เอกํ เมฆสีสํ ทิฏฺฐนฺติ ฯ นตฺถิ อยฺยาติ ฯ วิชฺชุลตา นาม กิตฺตเก ฐาเน ปญฺญายตีติ ฯ จตุปญฺจโยชเน อยฺยาติ ฯ อตฺถิ ปน โว เกนจิ วิชฺชุลโตภาโส ทิฏฺโฐติ ฯ นตฺถิ อยฺยาติ ฯ เมฆสทฺโท นาม กิตฺตเก ฐาเน สุยฺยตีติ ฯ เอกทฺวิโยชเน อยฺยาติ ฯ อตฺถิ ปน โว เกนจิ เมฆสทฺโท สุยฺยตีติ ฯ นตฺถิ อยฺยาติ ฯ กึ ตุมฺเห เอเต ชานาถาติ ฯ น ชานาม อยฺยาติ ฯ น เอเต มนุสฺสา ยกฺขา เอเต อมฺเห อุทกํ ฉฑฺฑาเปตฺวา ทุพฺพเล กตฺวา ขาทิตุํ อาคตา ภวิสฺสนฺติ ปุรโต คโต พาลสตฺถวาหปุตฺโต อนุปายกุสโล อทฺธา โส เอเตหิ อุทกํ ฉฑฺฑาเปตฺวา กิลเมตฺวา ขาทิโต ภวิสฺสติ ปญฺจ สกฏสตานิ ยถาปูริตาเนว ฐิตานิ ภวิสฺสนฺติ อชฺช มยํ ตานิ ปสฺสิสฺสาม ปสตมตฺตมฺปิ อุทกํ อฉฑฺเฑตฺวา สีฆํ สีฆํ สกฏานิ ปาเชถาติ ฯ โส อาคจฺฉนฺโต ยถาปูริตาเนว ปญฺจ สกฏานิ โคณานํ มนุสฺสานํ จ หนุกฏฺฐิกาทีนิ ทิสาวิทิสาสุ วิปฺปกิณฺณานิ ทิสฺวา สกฏานิ โมจาเปตฺวา สกฏปริวตฺตเกน ขนฺธาวารํ พนฺธาเปตฺวา สกาลสฺเสว มนุสฺเส จ โคเณ จ สายมาสภตฺตํ โภชาเปตฺวา มนุสฺสานํ มชฺเฌ โคเณ นิปชฺชาเปตฺวา สยํ พลนายเก คเหตฺวา ขคฺคหตฺโถ ติยามรตฺตึ อารกฺขํ ฐเปตฺวา ฐิตโกว อรุณํ อุฏฺฐาเปสิ ฯ ปุนทิวเส ปาโตว สพฺพกิจฺจานิ นิฏฺฐาเปตฺวา โคเณ โภเชตฺวา ทุพฺพลสกฏานิ ฉฑฺฑาเปตฺวา ถิรสกฏานิ คาหาเปตฺวา อปฺปคฺฆํ ภณฺฑํ ฉฑฺฑาเปตฺวา มหคฺฆภณฺฑํ อาโรเปตฺวา ยถาอิจฺฉิติจฺฉิตฏฺฐานํ คนฺตฺวา ทฺวิคุณติคุเณน มูเลน ภณฺฑํ วิกฺกิณิตฺวา สพฺพํ ปริสํ อาทาย ปุน อตฺตโน นครเมว อคมาสิ ฯ