ตตฺถ ททํ ภุญฺชถาติ อญฺเญสํ ทตฺวาว อตฺตนา ภุญฺชถ ฯ มา ปมาโทติ ทานาทีสุ ปุญฺเญสุ มา ปมชฺชิตฺถ ฯ จกฺกํ วตฺตย โกสลาธิปาติ กุสลชฺฌาสย มหาราช ปฏิรูปเทสวาสาทิกํ จตุพฺพิธํ ธมฺมจกฺกํ ปวตฺเตหิ ฯ จกฺกนฺติ รโถ ทฺวีหิ จกฺเกหิ คจฺฉติ ฯ อยํ ปน กาโย อิเมหิ จตูหิ จกฺเกหิ เทวโลกํ คจฺฉติ เตน เต ธมฺมจกฺกนฺติ สงฺขฺยํ คตา ฯ ตํ ตฺวํ จกฺกํ วตฺเตหิ ปวตฺเตหิ ฯ อธมฺมิโกติ ยถา อญฺเญ ฉนฺทาคตึ คจฺฉนฺตา โลกํ อุจฺฉุยนฺเตน ปีเฬตฺวา วิย ธนเมว สงฺกฑฺฒนฺตา อธมฺมิกา โหนฺติ ตถา ตฺวํ มา อธมฺมิโก ฯ อนุธมฺมํ ปาลยาติ

ทานํ สีลํ ปริจฺจาคํ อาชฺชวํ มทฺทวํ ตปํ

อกฺโกธํ อวิหึสญฺจ ขนฺตี จ อวิโรธนนฺติ อิมํ ปน ทสวิธราชธมฺมเมว ปาลย รกฺข มา ปริจฺจช ฯ

มหาสตฺโต ตสฺสา วจนํ สมฺปฏิจฺฉนฺโต