อตีเต กาสิกรฏฺเฐ พาราณสิยํ พฺรหฺมทตฺเต รชฺชํ กาเรนฺเต โพธิสตฺโต สตฺถวาหกุเล ปฏิสนฺธึ คณฺหิ ฯ โส วยปฺปตฺโต ปญฺจหิ สกฏสเตหิ พณิชฺชํ กโรนฺโต วิจรติ ฯ โส เอกํ สฏฺฐิโยชนิกํ มรุกนฺตารํ ปฏิปชฺชิ ฯ ตสฺมึ ปน กนฺตาเร สุขุมา พาลุกา มุฏฺฐินา คหิตา หตฺเถ น ติฏฺฐนฺติ สุริยุคฺคมนโต ปฏฺฐาย องฺคารราสิ วิย อุณฺหา โหนฺติ น สกฺกา อติกฺกมิตุํ ตสฺมา ตํ ปฏิปชฺชนฺโต ทารุอุทกเตลตณฺฑุลาทีนิ สกเฏหิ อาทาย รตฺติเมว คนฺตฺวา อรุณุคฺคมเน สกฏานิ ปริวตฺตกานิ กตฺวา มตฺถเก มณฺฑปํ กาเรตฺวา กาลสฺเสว อาหารกิจฺจํ นิฏฺฐาเปตฺวา ฉายาย นิสินฺนา ทิวสํ เขเปตฺวา อฏฺฐงฺคเต สุริเย สายมาสํ ภุญฺชิตฺวา ภูมิยา สีตลาย ชาตาย สกฏานิ โยเชตฺวา คจฺฉนฺติ ฯ สมุทฺทคมนสทิสเมว คมนํ ตตฺถ โหติ ฯ ถลนิยามโก นาม ลทฺธุํ วฏฺฏตีติ โส ตารกสญฺญาย สตฺถคมนโยคํ กาเรติ ฯ โสปิ สตฺถวาโห ตสฺมึ กาเล อิมินา นิยาเมเนว ตํ กนฺตารํ คจฺฉนฺโต เอกูนสฏฺฐิโยชนานิ คนฺตฺวา อิทานิ เอกรตฺเตเนว มรุกนฺตารา นิกฺขมนํ ภวิสฺสตีติ สายมาสํ ภุญฺชิตฺวา สพฺพํ ทารูทกํ เขเปตฺวา สกฏานิ โยเชตฺวา ปายาสิ ฯ นิยามโก ปุริมสกเฏ อาสนํ สนฺถราเปตฺวา อากาเส ตารกํ โอโลเกนฺโต อิโต ปาเชถ เอตฺโต ปาเชถาติ วทมาโน นิปชฺชิ ฯ โส ทีฆมทฺธานํ อนิทฺทายนภาเวน กิลมนฺโต นิทฺทํ โอกฺกมิ โคเณ นิวตฺติตฺวา อาคมนมคฺคเมว คณฺหนฺเต น อญฺญาสิ ฯ โคณา สพฺพรตฺตึ อคมํสุ ฯ นิยามโก อรุณุคฺคมนเวลาย ปพุทฺโธ นกฺขตฺตํ โอโลเกตฺวา สกฏานิ นิวตฺเตถ สกฏานิ นิวตฺเตถาติ อาห ฯ สกฏานิ นิวตฺเตตฺวา ปฏิปาฏิยา กโรนฺตานญฺเญว จ อรุโณ อุคฺคโต ฯ มนุสฺสา หิยฺโย อมฺหากํ นิวุตฺถขนฺธาวารฏฺฐานเมเวตํ ทารูทกํปิ โน ขีณํ อิทานิ นฏฺฐมฺหาติ สกฏานิ โมเจตฺวา ปริวตฺตเกน ฐเปตฺวา มตฺถเก มณฺฑปํ กตฺวา อตฺตโน สกฏสฺส เหฏฺฐา อนุโสจนฺตา นิปชฺชึสุ ฯ โพธิสตฺโต มยิ วิริยํ โอสฺสชฺชนฺเต สพฺเพ เต วินสฺสนฺตีติ ปาโต สีตลเวลายเมว อาหิณฺฑนฺโต เอกํ ทพฺพติณคจฺฉํ ทิสฺวา อิมานิ ติณานิ เหฏฺฐา อุทกสีตเลน อุฏฺฐิตานิ ภวิสฺสนฺตีติ จินฺเตตฺวา กุทฺทาลํ คาหาเปตฺวา ตํ ปเทสํ ขณาเปสิ ฯ เต สฏฺฐิหตฺถฏฺฐานํ ขณึสุ ฯ เอตฺตกํ ฐานํ ขณิตฺวา ปหรนฺตานํ กุทฺทาโล เหฏฺฐา ปาสาเณ ปฏิหญฺญิ ฯ ปหฏมตฺเต สพฺเพ วิริยํ โอสฺสชฺชึสุ ฯ โพธิสตฺโตปิ อิมสฺส ปาสาณสฺส เหฏฺฐา อุทเกน ภวิตพฺพนฺติ โอตริตฺวา ปาสาเณ ฐิโต โอนมิตฺวา โสตํ โอทหิตฺวา สทฺทํ อาวชฺเชนฺโต เหฏฺฐา อุทกสฺส ปน สทฺทํ สุตฺวา อุตฺตริตฺวา จูฬุปฏฺฐากํ อาห ตาต ตยา วิริเย โอสฺสฏฺเฐ วินสฺสิสฺสาม ตฺวํ วิริยํ อโนสฺสชฺชิตฺวา อิมํ อยกูฏํ คเหตฺวา อาวาฏํ โอตริตฺวา เอตสฺมึ ปาสาเณ ปหารํ เทหีติ ฯ โส ตสฺส วจนํ สมฺปฏิจฺฉิตฺวา สพฺเพสุ วิริยํ โอสฺสชฺชิตฺวา ฐิเตสุปิ วิริยํ อโนสฺสชฺชนฺโต โอตริตฺวา ปาสาเณ ปหารํ เทติ ฯ ปาสาโณ ทฺวิธา ภินฺทิตฺวา เหฏฺฐา ปติตฺวา โสตํ สนฺนิรุมฺหิตฺวา อฏฺฐาสิ ฯ ตาลขนฺธปฺปมาณา อุทกวฏฺฏิ อุคฺคญฺฉิ ฯ สพฺเพ ปานียํ ปิวิตฺวา นฺหายึสุ ฯ อติเรกานิ อกฺขยุคาทีนิ ผาเลตฺวา ยาคุภตฺตํ ปจิตฺวา ภุญฺชิตฺวา โคเณ จ โภเชตฺวา สุริเย จ อฏฺฐงฺคเต อุทกาวาฏสมีเป ธชํ พนฺธิตฺวา อิจฺฉิติจฺฉิตฏฺฐานํ อคมํสุ ฯ เต ตตฺถ ภณฺฑํ วิกฺกิณิตฺวา ทฺวิคุณติคุณํ ลาภํ ลภิตฺวา อตฺตโน วสนฏฺฐานญฺเญว อคมํสุ ฯ เต ตตฺถ ยาวตายุกํ ฐตฺวา ยถากมฺมํ คตา ฯ โพธิสตฺโตปิ ทานาทีนิ ปุญฺญานิ กตฺวา ยถากมฺมเมว คโต ฯ