เอหิ ตํ อุปคุยฺหิสฺสํ กริสฺสํ ตํ ปทกฺขิณํ

น หิ ทานิ ปุน อตฺถิ มม ตุยฺตญฺจ สงฺคโมติ ฯ

สตฺตุโก ตสฺสา อธิปฺปายํ อชานนฺโต สาธุ ภทฺเท เอหิ อุปคุยฺหสฺสุ มนฺติ อาห ฯ สุลสา ตํ ติกฺขตฺตุํ ปทกฺขิณํ กตฺวา อุปคุยฺหิตฺวา อิทานิ ตํ สามิ จตูสุ ปสฺเสสุ วนฺทิสฺสามีติ วตฺวา ปาทปิฏฺฐิยํ สีสํ ฐเปตฺวา วามปสฺเส วนฺทิตฺวา ทกฺขิณปสฺเสปิ ปจฺฉิมปสฺสํ คนฺตฺวา วนฺทมานา วิย หุตฺวา นาคพลา คณิกา โจรํ ทฺวีสุ ปจฺฉาพาหาสุ คเหตฺวา เหฏฺฐาสีสํ กตฺวา สตโปริเส นรเก ปกฺขิปิ ฯ โส ตตฺเถว จุณฺณวิจุณฺณํ หุตฺวา มริ ฯ ตํ กิริยํ ทิสฺวา ปพฺพตมตฺถเก นิพฺพตฺตเทวตา อิมา คาถา อภาสิ

น หิ สพฺเพสุ ฐาเนสุ ปุริโส โหติ ปณฺฑิโต